जब ३५ हजार फिटमाथि उडिरहेको विमानमा सुत्केरी व्यथा लाग्यो

प्रसवमा महिलालाई सहयोग गर्दै डा. हसन खान । तस्वीर सौजन्यः स्काइन्युज ।

A+ A A-

गत साता ३५ हजार फिट उचाइ लिएर विज एयरको विमान उडिरहेको थियो । जोर्डनबाट लन्डनका लागि उडान भरेको विमानभित्र दुई सयभन्दा बढी यात्री र चालक दलका सदस्य थिए ।

३५ हजार फिटमाथि पुगेपछि एक महिलालाई सुत्केरी व्यथा लाग्यो । पीडा हुन थालेपछि उनी चिच्याउन थालिन् । यो कुरा थाहा पाएपछि चालक दलका सदस्यहरू पनि यताउती दौडादौड गर्न लागे । लगत्तै उनीहरूले यात्रीहरूमा एउटा आह्वान गरे- तपाईंहरूमध्ये कोही डाक्टर हुनुहुन्छ भने कृपया, प्रसवमा रहेकी एक महिलालाई मद्दत गर्नुहोस् ।

गत साताको अन्त्यमा युरोपेली आकाशमा भएको यो घटनाबारे बेलायतका जुनियर डाक्टर हसन खानले मिडियामा कुराकानी गरेका छन् । स्काइन न्युजका अनुसार, धन्न, त्यो प्लेनमा डाक्टरहरूको एउटा समूह नै यात्रारत थियो, जुन समूहमा रहेका मध्ये एक डाक्टरले महिलालाई बच्चा जन्माउन मद्दत गरे ।

२८ वर्षीय डाक्टर खान आफ्ना साथीहरूको समूहसँगै उडिरहेका थिए । संयोगले त्यो समूहमा सबै डाक्टर थिए ।

चालक दलले महिलाको मद्दत गर्न आह्वान गरेपछि डाक्टर साथीहरूको समूहमा छलफल भयो । सुरुमा डा. खानका सबै साथी स्वेच्छाले अघि सरे ।

तर, फेरि समूहले डा. खानलाई त्यो अवस्थाको सामना गर्न सर्वोत्तम मान्यो । बेलायत एसेक्सको बेसिलडन अस्पतालमा काम गर्ने चिकित्सक खानका लागि भने यो त्यति सजिलो काम थिएन । महिलाले बच्चा जन्माउनै लागेकी थिइन् । यसरी बिनाकुनै सुरक्षा वा तयारी जन्मिएको बच्चा जीवित नरहन सक्थ्यो ।

अर्को चुनौती भनेको, महिला अंग्रेजीको एक शब्द पनि बोल्न जान्दिनथिन् ।

भाषाको समस्या र प्रसूतिका लागि चाहिने सामान्यभन्दा सामान्य उपकरणको अभावका माझ पनि डाक्टर खान अघि सरे । जन्मलाई पूरा गर्न उनले आवश्यक केही चीज मागे । जस्तो कि तौली ।

उनले भने, ‘बच्चा बाहिर आउनासाथै उसलाई सुकाउन र गर्मीमा राख्नका लागि तौलीजस्तै केही साधारण चीज चाहिएको थियो । कतिपय एयरलाइन्स हावामा हुने जन्मका लागि विल्कुल तयार छैनन् ।’

सन् २०१९ मा इन्टरनेसनल सोसाइटी अफ ट्राभल मेडिसिनमा प्रकाशित एक अध्ययन प्रतिवेदनअनुसार, सन् १९२९ र २०१८ का बीच व्यापारिक उडानमा ७४ शिशुको जन्म भएको छ, तीमध्ये ७१ शिशु प्रसवपछि जीवित रहे ।

खासमा जन्मको दुर्लभताका बावजुद विमानमा चिकित्सकीय रूपले प्रशिक्षित यात्री प्रसवमा मद्दत गर्नका लागि महत्त्वपूर्ण थिए ।

डा. खानले साउथेन्ड इकोलाई भनेका छन्, ‘त्यो परिस्थिति सम्हाल्न म निकै व्यस्त थिएँ । हामी एउटा विमानमा छौँ भन्ने कुरा मैले करिब भुलिसकेको थिएँ । दुई सयभन्दा बढी अज्ञात यात्री र चालक दलका माझ एउटा बच्चालाई सुरक्षित रूपले जन्म दिनमा मद्दत गर्नु अवास्तविक लाग्यो ।’

विज एयरको सो विमानलाई उडानका बीच दक्षिणी इटालीतिर मोड्नका लागि बाध्य पारियो । आमा र बच्चाको हेरचाह गर्न सकियोस् भनेर यसो गरिएको थियो । डाक्टरका अनुसार, यी सबैभन्दा त्यहाँका यात्री ‘जो भयो, त्यसप्रति बढी चकित’ थिए ।

उनले भने, ‘त्यहाँ हेर्न आएका बेला उनीहरू सबै भनिरहेका थिए- यो चमत्कार हो ।’

जन्मपछि उनले एक सकारात्मक अपडेट पाए, ‘उनको मद्दतमा जन्मेकी बच्ची स्वस्थ थिइन् ।’

त्यसपछि उनले अन्य कुनै सूचना पाएनन् । तर उनले भने, ‘कुनै समाचार राम्रो समाचार होइन, म मान्न मात्र सक्छु ।’

डा. खानलाई पत्रकारले सोधे, ‘त्यो बच्चा केटा हुन्थ्यो र उसको नाम तपाईंको नामबाट राखिएको भए तपाईंलाई राम्रो लाग्थ्यो ?’

डाक्टरले हाँस्दै भने, ‘यो एउटा राम्रो संकेत हुन्थ्यो ।’ (स्काइन्युजबाट)

प्रकाशित मिति: शनिबार, चैत ३, २०८० ०६:२५