एक्सनमा वीरेन्द्रनगरकी मेयर मोहनमाया, भत्किए सरकारी जग्गामा बनेका संरचना

A+ A A-

कर्णाली प्रदेशको राजधानी सुर्खेतको वीरेन्द्रनगर नगरपालिकाका कर्मचारीहरू बुधबार विहान डोजर लिएर निस्के । उक्त टोली ११ बजेको समयमा वीरेन्द्रनगर नगरपालिका–६, को घण्टाघर पुग्यो । नगरपालिकाको पूर्व सूचना बमोजिम सरकारी जग्गामा बनेका संरचना भत्काउन नगरपालिकाको टोली डोजर र टिपर लिएर त्यहाँ पुगेको थियो ।

सरकारी जग्गामा व्यक्तिको रजाइँ

नगरपालिकाले बुधबारलाई अन्तिम मिति दिएर सुर्खेत उपत्यका नगर विकास समितिको स्वामित्वमा रहेको जग्गा भाडा लिएर बनाइएका संरचनाहरू भत्काउन निर्देशन दिएको थियो । उक्त निर्देशनमा यी जग्गामा विभिन्न व्यक्तिले भाडामा लिएर व्यवसायिक प्रयोजनका लागि बनाइएका संरचनाहरू खाली गर्नुपर्ने अन्यथा नगरपालिकाले डोजर प्रयोग गरेर भत्काइदिने चेतावनी दिइएको थियो ।

पुनः सचेतनाका लागि नगरपालिकाले सोमबारबाट नगर क्षेत्रमा माइकिङ्ग गर्दै संरचना खालि गराउन आह्वान गर्दै आएको थियो । तर, व्यवसायीले अटेर गरेपछि घण्टाघर क्षेत्रमा बनेका संरचनामा नगरपालिकाले डोजर चलाउन सुरु गरेको छ । संरचना खाली गर्न अल्टिमेटम दिएको लामो समयसम्म पनि टेरपुच्छर नलगाएका व्यवसायी शनिबारदेखि नगरपालिकाका विरुद्धमा आन्दोलित बनेका थिए ।

पटक–पटक सूचना प्रकाशित गरेर विकल्प खोज्न नगरपालिकाले आग्रह गरे पनि शक्तिको आडमा नगरपालिकालाई व्यवसायीले आजित बनाएपछि वीरेन्द्रनगर नगरपालिकाकी मेयर मोहनमाया ढकाल अन्ततः डोजर चलाउने निर्णयमा पुगिन् । ढकालको उक्त निर्णयलाई लिएर नगरपालिका र व्यवसायीबीच केही बेर घम्साघम्सी चल्यो ।

वीरेन्द्रनगरनगरकाे सरकारी जग्गामा पहुँचवालाकाे रजाइँ, दलहरूले पनि तिरेनन् भाडा

उग्र बनेका केही व्यवसायीले संरचना हटाउन पुगेको नगरपालिकाको डोजरमाथि ढुङ्गामुढा प्रहार गरे । ढुङ्गामुढाले डोजरको सिसा क्षति पुग्यो भने चालकसहित नगरकका तीन जना कर्मचारी घाइते भएका छन् । केही बेर घण्टाघर क्षेत्र अशान्त बन्यो । व्यवसायीहरू नगरपालिकाको डोजरमाथि जाइलागेपछि अवस्था तनावग्रस्त बनेको हो । सरकारी सम्पत्तिमाथि तोडफोड हुँदा सुरक्षाका लागि नजिकै खटिइएको प्रहरीले भने एक्सन लिएन । प्रहरीको असयोगका कारणपछि हटेको नगरपालिकाले पुनः सुरक्षा निकायसँगको छलफलपछि डोजर खटायो ।

प्रहरीले सुरक्षा दिएपछि अन्ततः मेयर मोहनमाया ढकालले घोषणा गरेको लामो समयपछि वीरेन्द्रनगरमा सरकारी जग्गा खालि गराउन सफल भएकी छन् । नगरपालिकाले नगर क्षेत्रभित्र बनेका १ सय २५ वटा व्यवसायिक संरचनाहरू खाली गराउने छ । उच्च राजनीतिक दवावका बीच ढकालले अतिकम भाडा कबुल गरी जग्गा भाडामा लिएर आफूखुसी संरचना बनाई व्यवसायिक प्रयोजनमा लगाएर मोटो रकम असुल्ने बिचौलियाको हातबाट नगरको जग्गा फिर्ता ल्याउन सफल भएकी छिन् ।

नगरपालिकाले कोठा भाडा नलगाउन निर्देशन दिन्छ, मान्दैनन् दलहरू

गत वर्ष ३२ जेठमै संरचना हटाउने निर्णय गरेको नगरपालिकाले व्यवसायीहरूको मागअनुसार झण्डै एक वर्षसम्म निर्णय कार्यान्वयन गरेको थिएन । संरचना खाली गराउन दिइएको लामो समयसम्म पनि व्यवसायीले अटेर गरेपछि १८ माघमा संरचना हटाउन अन्तिमपटक ३५ दिने सूचना जारी गरेको थियो ।

सुर्खेत उपत्यका नगर विकास समितिको अध्यक्षसमेत रहेकी मेयर ढकालले नगर विकास समितिको स्वामित्वभित्रका सरकारी जग्गामा निर्माण गरिएका अस्थायी संरचनाहरू खाली गराएर त्यसलाई पार्किङको रुपमा विकास गरिने बताउँदै आएकी छन् ।

वीरेन्द्रनगर कर्णाली प्रदेशको राजधानी बनेसँगै पार्किङको समस्या बढ्दै जान थालेको दृष्टान्तलाई ध्यानमा राख्दै समितिले सार्वजनिक जग्गा संरक्षणको नीति लिएको थियो । सोही बमोजिम नगरपालिकाको सहरी गुरुयोजना तयार गरी व्यवस्थित हरित शहर निर्माणका लागि समितिको मातहतमा रहेका जग्गाहरू खाली गराउने प्रतिवद्धता मेयर ढकालले गर्दै आएकी थिइन् ।

नगरपालिकाले ती क्षेत्रका संरचनाहरू हटाएसँगै साढे दुई विगा जग्गा समितिको मातहतमा आउनेछ । यसअघि मेयर ढकालले नेकपा एमाले, नेकपा माओवादी केन्द्रलगायत दलले व्यवसायिक भाडामा लगाएका सटरहरू खाली गराएर सरकारी जग्गा खाली गराउने अभियानको थालनी गरेकी थिइन् ।

प्रकाशित मिति: बुधबार, फागुन ३०, २०८० १७:००