संसदमा घट्दो प्रधानमन्त्री प्रचण्डमाथिको विश्वास, सत्तापक्षकै आलोचनात्मक समर्थन

संसदमा घट्दो प्रधानमन्त्री प्रचण्डमाथिको विश्वास, सत्तापक्षकै आलोचनात्मक समर्थन

A+ A A-

१५ महिनामा तेस्रोपटक संसदमा विश्वासको मत लिँदा प्रधानमन्त्री पुष्पकमल दाहाल प्रचण्डप्रतिको विश्वासमा ठूलो ह्रास आएको छ । पहिलोपटक २६ पुसमा उनले संसदको झण्डै ९७ प्रतिशत मत प्राप्त गरेका थिए । ६ चैतमा दोस्रोपटक संसदको सामना गर्दा त्यो विश्वास घटेर ६३ प्रतिशतमा झरेको थियो भने आज ३० फागुनमा प्रधानमन्त्रीप्रतिको संसदको विश्वास ५७ प्रतिशतमा झरेको छ ।

चुनावी गठबन्धन तोडेर माओवादी केन्द्रका अध्यक्ष प्रचण्ड १० पुस २०७९ मा एमालेसहितका दलको समर्थनमा प्रधानमन्त्री बनेका थिए । तर, २६ पुसमा कांग्रेससहित १० दलले उनलाई विश्वासको मत दिएका थिए । २७५ सदस्यीय प्रतिनिधिसभाका २६८ सांसदले प्रधानमन्त्री प्रचण्डलाई त्यतिबेला विश्वासको मत दिएका थिए । एमाले अध्यक्ष केपी ओलीले त्यतिबेलै प्रमुख प्रतिपक्ष दल कांग्रेसले प्रचण्डलाई विश्वासको मत दिएर गठबन्धन भत्काउन ‘ढोक्सा’ थापेको बताएका थिए । नभन्दै राष्ट्रपति निर्वाचनसम्म आइपुग्दा प्रचण्ड कांग्रेस गठबन्धनमै फर्किए । फलस्वरुपः कांग्रेस नेता रामचन्द्र पौडेल राष्ट्रपति निर्वाचित भए ।

एमाले सरकारबाट बाहिरिएपछि ६ चैतमा विश्वासको मत लिँदा प्रचण्डले १७२ मत प्राप्त गरेका थिए । विपक्षमा ८९ मत मात्र थियो । २१ फागुन २०८० मा एमाले नेतृत्वको गठबन्धनमा फर्किएर विश्वासको मत लिँदा प्रचण्डप्रति संसदको समर्थन अझै खस्किएको छ । बुधबार संसद बैठकमा उपस्थित २६८ सांसदमध्ये प्रधानमन्त्रीको विश्वासको मत प्रस्तावको पक्षमा १५७ र विपक्षमा ११० मत परेको छ । यी तथ्यले प्रधानमन्त्री प्रचण्डको विपक्षमा संसदमा मत बढ्दै गएको छ ।

सत्तापक्षकै आलोचनात्मक विश्वास

प्रधानमन्त्री प्रचण्डले विश्वासको मत लिने क्रममा बुधबार संसद्‌मा भएको छलफलमा विपक्षी दल मात्र होइन, सत्तारुढ दलहरूकै चर्को आलोचना सामना गर्नुपर्‍यो । माधव नेपाल नेतृत्वको एकीकृत समाजवादी पार्टीका उपाध्यक्ष राजेन्द्र पाण्डेले संविधानको रक्षाका लागि पार्टीभित्रको व्यक्तिवादी चरित्रविरुद्ध विद्रोह गरेर आफैँले बनाएको पार्टी तोडेर विष पिएर उभिएको पार्टीलाई प्रधानमन्त्री प्रचण्डले बाटोमा छोडेर हिँडेको आरोप लगाए ।

'संविधानको रक्षाका लागि पार्टीभित्रको व्यक्तिवादी चरित्रविरुद्ध हामीले विद्रोह गरेर आफैँले बनाएको पार्टी तोडेर विष पिएर तपाईंको पक्षमा उभिएका थियौँ । हामीलाई बाटोमा छोडेर हिँड्नुभयो,' उनले प्रश्न गर्दै भने, 'योभन्दा अनैतिकता के हुन्छ ? एकपटक हाम्रो पार्टीको ठाउँमा उभिएर सोच्नुहोस् ।'

उपाध्यक्ष पाण्डे प्रधानमन्त्री प्रचण्डलाई एमाले अध्यक्ष केपी शर्मा ओली र कांग्रेस सभापति शेरबहादुर देउवाले घाँटी जोडेका दिन प्रधानमन्त्री पदको हालत के हुन्छ भन्ने प्रश्न पनि गरे । 'ओलीजी र देउवाजीले घाँटी जोडेका दिन तपाईंको प्रधानमन्त्रीको पदको हालत के हुन्छ ? हेक्का राख्नुहोला,' उनले भने ।

बैठकमा जसपाका राजकिशाेर यादवले पनि प्रधानमन्त्री प्रचण्डको कार्यशैलीप्रति असन्तोष पोखे । यादवले १५ महिनाभित्र तेस्रोपटक विश्वासको मत माग्नु विचित्रको विडम्बना भएको बताए । उनले प्रधानमन्त्रीलाई कुन रूपमा शुभकामना दिऊँ भनेर प्रश्न पनि गरे । '१५ महिनाभित्र तेस्रोपटक विश्वासको मत माग्नुभयो । सहयात्रीहरू फेरिएका छन् । प्रधानमन्त्रीले विश्वासको मत पाइराख्नुभएको छ । यो विचित्रको विडम्बना हो,' उनले भने, 'शुभकामाना दिन मन छ तर त्यो शुभकामना कुन रूपमा दिऊँ ?'

यादवले प्रधानमन्त्री प्रचण्डको कार्यकाल कति लामो हुन्छ भन्ने कुरा यकिनका साथ भन्न नसकिने बताए । 'कार्यकाल कति लामो हुन्छ, मैले यकिनका साथ भन्न सक्दिनँ । सरकारको आयु तपाईंकै हातमा छ । तर, यो राष्ट्रका लागि तपाईंको कार्यकाल उपलब्धिमूलक होस् ।' यादवले पनि सहयात्री दललाई थाहा नै नदिई गठबन्धन फेरेको भन्दै असन्तुष्टि जनाए । उनले भने, 'प्रधानमन्त्रीजीले उथलपुथल गर्छु भन्नुहुन्छ । उहाँले उथलपुथल गर्दा सहयात्रीलाई थाहा नै हुँदैन । अन्य देशमा सहयात्रीका कारण सत्ता उथलपुथल हुन्छ तर हाम्रोमा प्रधानमन्त्री आफैँले उथलपुथल गर्नुहुन्छ । तथापि हामीले सहकार्य गर्दै आएका छौँ ।'

उनले प्रचण्ड गणितीय रूपमा प्रधानमन्त्री भए पनि मुलुक, व्यवस्था र जनताका सामु विश्वासको खडेरी उत्पन्न भएको बताए । 'गणितीय रूपमा तपाईं प्रधानमन्त्री हुनुभएको छ । तर, अहिले मुलुक, व्यवस्था र जनताका सामु विश्वासको खडेरी उत्पन्न भएको छ,' उनले भने, 'नेताहरूलाई जनताले पत्याउन छोडेका छन् । त्यसैले समयअनुसार कुरा नफेरौँ ।' यादवले प्रधानमन्त्री प्रचण्डले विश्वासको मत पाए पनि अनुहारमा भने ओज हराउँदै गएको भन्दै व्यंग्य गरे । 'मैले पछाडिबाट हेरिरहेको थिएँ, जुन प्रकारको अनुहारमा ओज हिजो प्रधानमन्त्री हुँदा थियो, त्यो आज देखिएन,' उनले भने ।

प्रकाशित मिति: बुधबार, फागुन ३०, २०८० १७:१५