संसदीय समितिमा सांसदहरूको माग- सुर्ती, खैनी तथा गुट्खा उत्पादनमा प्रतिबन्ध लगाउनुपर्छ

संसदीय समितिमा सांसदहरूको माग- सुर्ती, खैनी तथा गुट्खा उत्पादनमा प्रतिबन्ध लगाउनुपर्छ

A+ A A-

सांसदहरूले सुर्ती, खैनी तथा गुट्खा उत्पादनमा प्रतिबन्ध लगाउनुपर्ने माग गरेका छन् ।

मंगलबार सिंहदरबारमा बसेको प्रतिनिधिसभाअन्तर्गतको उद्योग तथा वाणिज्य र श्रम तथा उपभोक्ता हित समितिको बैठकमा सांसदहरूले सुर्ती, खैनी तथा गुट्खा उत्पादनमा प्रतिबन्ध लगाउनुपर्ने माग गरेका हुन् ।

उनीहरूले सुर्तीजन्य उद्योगको उत्पादनका लागि मात्रै क्षमता अभिवृद्धि गर्ने हो भने पञ्चायतकालमा सञ्चालन भएको जनकपुर चुरोट कारखाना सञ्चालन गर्नुपर्ने बताए । सांसदहरूले उद्योगको पुँजी वृद्धि तथा क्षमता अभिवृद्धिको अनुमति दिइसकेपछि त्यस विषयमा छलफल गर्नुको औचित्य नरहेको बताएका छन् । उनीहरूले स्वास्थ्यमा जनतालाई असर गर्ने कुरामा राजस्वका दृष्टिकोणले मात्रै हेर्न नहुनेमा जोड दिएका छन् ।

पैसा कमाउने उद्देश्य मात्रै राज्यले लिन नहुने उनीहरूको जोड छ । बैठकमा कांग्रेस सांसद कान्तिका सेजुवालले सुर्तीजन्य गुट्खाहरूको उद्योग सञ्चालनका लागि मात्रै क्षमता अभिवृद्धि गर्ने हो भने पञ्चायतकालमा सञ्चालनमा आएको जनकपुर चुरोट कारखाना सञ्चालन गर्नुपर्ने बताइन् । उनले सुर्तीजन्य उद्योगहरूको क्षमता अभिवृद्धि गर्ने नभई रोक्ने दिशामा अघि बढ्न आवश्यक रहेको बताइन् ।

बैठकमा कांग्रेसकी सांसद रमा कोइराला पौड्यालले स्वास्थ्यमा जनतालाई प्रभाव पार्ने कुराले राजस्वका लागि सुर्तीजन्य पदार्थहरूको उत्पादनमा अभिवृद्धि गर्ने कुरा राम्रो नहुने बताइन् । उनले राज्यले जनतालाई असर पर्ने कुरामा पैसा मात्रै कमाउने उद्देश्यबाट प्रेरित हुन नहुने बताइन् । यस विषयमा राज्य व्यवस्था समिति र उद्योग समितिमा संयुक्त छलफल गरेर अघि बढ्न आवश्यक रहेको उनले बताइन् । उनले पुँजी अभिवृद्धिको स्वीकृति दिइसकेपछि छलफल गर्नुको औचित्य नरहेको बताइन् ।

एमाले सांसद लालप्रसाद सावा लिम्बूले गुट्खा उद्योगको पुँजी अभिवृद्धि तथा क्षमता अभिवृद्धि गर्ने अनुमति दिइसकेपछि छलफल गर्नुको औचित्य नरहने बताए । अनुमति दिनुपूर्व नै छलफल हुनुपर्ने कुराको जवाफ सरकारले दिनुपर्ने उनले बताए । उनले क्षमता अभिवृद्धि किन गरिएको हो ? भन्ने प्रश्न उठेको बताए । उनले स्वास्थ्यसम्बन्धीको असरलाई हेरेर छलफल गहन रूपले हुनुपर्नेमा जोड दिए ।

जनता समाजवादी पार्टीकी सांसद रेखा यादवले सरकारले युवाहरूलाई श्रम दिने कुरामा ध्यान दिने हो भने रुग्ण उद्योगलाई सञ्चालन गर्नुपर्ने बताइन् । उनले गुट्खा, खैनीबाहेकका रुग्ण उद्योगमा थप लगानी गरेर स्वदेशमै रोजगारी सिर्जना गर्न सकिने बताइन् । उनले नेपालमा खैनी तथा सुर्तीजन्य सामग्री बेच्न नदिने भए उद्योग, वाणिज्य तथा आपूर्ति मन्त्रालयले बाहिर पठाउने योजना र कार्यक्रम अघि सार्नुपर्ने बताइन् ।

बैठकमा राष्ट्रिय स्वतन्त्र पार्टीका सांसद गणेश पराजुलीले गुट्खा उद्योगको पुँजी अभिवृद्धि तथा क्षमता अभिवृद्धि गर्ने अनुमति दिइसकेपछि समितिमा छलफल गर्नुको औचित्यमाथि प्रश्न उठेको बताए । उनले सरकारको कानुन मानेर खोलिएका उद्योगहरू सरकारले सञ्चालन गर्न दिनुपर्ने बताए । उनले सुर्तीजन्य पदार्थको नियमन र नियन्त्रणका लागि र बिक्री वितरणका लागि तोकिएको नियमनका प्रक्रियाको कार्यान्वयन गर्न आवश्यक रहेको बताए । उनले गुट्खा, खैनी र सुर्तीजन्य पदार्थको बिक्री वितरण र उत्पादनसम्बन्धीको मापदण्ड निर्मम भएर लागू गर्ने हो भने धेरै कुरा नियन्त्रण हुने बताए ।

बैठकमा नेकपा माओवादी केन्द्रका सांसद महेन्द्रबहादुर शाहीले गुट्खा, खैनी र सुर्तीजन्य उद्योगहरू कति छन् ? भन्नेबारेमा सरकारसँग यकीन तथ्यांक नरहेको बताए । उनले भएका उद्योगहरू कसरी चलिरहेका छन्, उनीहरूले उत्पादन गरेका वस्तुको गुणस्तरीयताको मापन कसरी भइरहेको छ ? भन्ने प्रश्न गरे । उनले आवश्यकताका आधारमा उद्योग बन्द गर्नुपर्ने बताए । उनले उद्योग बन्द गर्दा त्यसले पार्ने असरमा पनि सरकारले ध्यान दिनुपर्ने बताए । उनले नेपालमा सुर्तीजन्य पदार्थ उत्पादन गर्ने उद्योगहरू बन्द गर्दा बाहिरबाट हुने आयातबारे पनि विशेष ध्यान दिनुपर्ने बताए ।

उनले सुर्तीजन्य पदार्थको उत्पादन नियन्त्रण गर्न आवश्यक रहेको बताए । समितिको बैठकमा अन्य सांसदहरूले चलिरहेका उद्योगलाई अबबाट उत्पादन वृद्धि गर्न नदिने गरी सरकार अघि बढ्नुपर्ने बताए ।

प्रकाशित मिति: मंगलबार, फागुन २९, २०८० १७:५१