संसद र सरकारमा नयाँ अनुहार अघि सारेर एमालेले दिएकाे सन्देश

A+ A A-

अघिल्लाे साताबाट प्रतिपक्षीय बेञ्चबाट सत्तापक्षीय बनेकाे एमाले नयाँ गठबन्धनको सबैभन्दा ठूलाे दल हो । प्रधानमन्त्री पुष्पकमल दाहाल प्रचण्ड नेतृत्वकाे सरकारमा उसले पठाएका मन्त्रीकाे चर्चा अझै सेलाएकाे छैन । प्रतिनिधिसभामा ७७ सदस्य रहेकाे एमालेले सरकारमा अधिकांश नयाँ अनुहार पठायाे । दोस्रो पुस्ताबाट उपप्रधान तथा भाैतिक पूर्वाधारमन्त्री रघुवीर महासेठबाहेक ६ जना गत वर्ष छाेटाे समय मन्त्री भएका सांसद हुन् भने बलराम अधिकारीकाे गतवर्ष अन्तिम चरणमा नाम काटिएकाे थियाे । त्यसरी हेर्दा एमालेले दाेस्राे पुस्ताका एक जना र अरु सबै तेस्रो पुस्ताका नेतालाई मन्त्री बनाएको छ ।

४ मंसिर २०७९ काे आम चुनावलगत्तै मिसन २०८४ थालेर संगठन निर्माणमा जुटेकाे एमालेले संसद र सरकारमा पठाएका अनुहारले केही नयाँ सन्देश दिन खाेजेकाे छ । एकातर्फ नयाँ दलहरूका युवा अनुहारसँग प्रतिस्पर्धा गर्न खाेजेकाे छ भने अर्काे अवसरकाे वितरणमा नयाँ नीति लिएकाे देखिन्छ । एमाले उपमहासचिव विष्णु रिमाल गतवर्ष निकै छाेटाे समयमै बाहिरिएका मन्त्रीलाई पुनः अवसर दिइएकाे बताउँछन् । 'मापदण्ड नै त्यसरी बनाइयाे । जसका कारण दुई नेताबाहेक अरु सबै अघिल्लाे मन्त्रिपरिषद्का सदस्य हुनुहुन्छ', उनले भने, हामीले याे सरकारलाई १० पुस २०७९ कै गठबन्धनकाे निरन्तरता मानेका छाैँ ।

एमालेले प्रमुख सचेतक पदम गिरी मन्त्री भएपछि सचेतक महेश बर्ताैलाकाे पदाेन्नति गरेकाे छ । सचेतकमा युवा नेतृ सुनिता बराल मनाेनीत भएकी छिन् । त्यस्तै राष्ट्रियसभा प्रमुख सचेतकमा भगवती न्याैपानेलाई ल्याएकाे छ । संसदमा राष्ट्रिय स्वतन्त्र पार्टी लगायत नयाँ दलहरूकाे प्रवेशले एमालेलाई युवातर्फ फर्किन दबाब परेकाे बुझ्न कठिन छैन । मन्त्रिपरिषद्‌मा पनि त्यही छनक दिएकाे छ ।

एमालेले योपटक दुई जना नयाँ मन्त्री पठाएको छ, महासेठ र बलराम अधिकारी । एमालेले अर्थ र गृह दुवै मन्त्रालय नपाएपछि अघिल्लाे सरकारमा नेतृत्व गरेका उपाध्यक्ष विष्णु पाैडेल नगएकाले महासेठले अवसर पाएका हुन् । त्यस्तै तत्कालीन राष्ट्रियसभा सदस्य विमला पाैड्याल राईकाे कार्यकाल सकिएकाले उनलाई एमालेले दाेहाेर्‍याएन । यसपटक सकेसम्म प्रत्येक्ष निर्वाचित सांसद नै पठाइएकाे छ', रिमाल भन्छन्, 'धेरै मन्त्री युवा हुनुहुन्छ । काम गरेर देखाउने विश्वास छ ।’

जनताका पक्षमा खरो उत्रनुपर्ने दबाब

एमालेबाट अहिले सबै मन्त्रीहरू तेस्रो पुस्ताका छन् । राजनीतिमा पहिलो पुस्तामा अध्यक्ष केपी शर्मा ओली, वरिष्ठ उपाध्यक्ष ईश्वर पोखरेल, अष्टलक्ष्मी शाक्य, युवराज ज्ञवाली मानिन्छन् । दोस्रा पुस्तामा केही उपाध्यक्षदेखि सचिवसम्मलाई मानिन्छ । त्योभन्दा तलका कमिटीमा भएका नेताहरू तेस्रो पुस्तामा गणना हुन्छन् । यही पुस्ताले अहिले एमालेबाट सरकारमा सहभागिता जनाएकाे छ ।

यो पुस्तालाई एमालेले भरोसा गरेर संसददेखि सरकारसम्म नेतृत्व दिएको छ । हुन त युवाहरूलाई पार्टीका नेताहरूले अवसर दिँदैनन् भन्ने भाष्य एमालेले गत वर्ष नै तोडेको थियो । त्यसको निरन्तरता अहिले पनि जारी छ । अहिले मन्त्री भएका एमालेका नेताहरू कांग्रेस माओवादी र नेकपा एसले गठबन्धन गरेर निर्वाचन लड्दा पनि प्रत्यक्षमा जितेका थिए । जनताले विश्वास गरेका युवाहरूलाई मौका दिनुपर्छ भनेर पार्टीले गत वर्ष नै मन्त्री बनाएको थियो । तर, त्यो समयमा छिट्टै गठबन्धन भत्कँदा काम गर्ने अवसर नपाएको र यसपटक काम गर्ने अवसरसहित सरकारमा पठाएको उपमहासचिव पृथ्वीसुब्बा गुरुङ बताउँछन् । उनले भने, ‘युवाहरूले अवसर पाउँदैनन्, पुराना नेताहरूले मात्र अवसर लिन्छन् भन्ने आरोप थियो । एमालेले त्यो मान्यतालाई भत्काएको छ ।’ युवा भनेर मात्र भएन, युवाहरूको सोच विचार, तौरतरिका पनि युवा नै हुनुपर्ने उपमहासचिव गुरुङ बताउँछन् ।

अवसर पाएको समयमा जनताको पक्षमा काम गर्न सके सबैले स्याबास् भन्ने तर पुरानाकै जस्तो काम गर्न नसके सबै एकै रहेछन् भन्ने भाष्य दोहोरिइरहने राजनीतिक विश्लेषक श्याम श्रेष्ठ बताउँछन् । उनले भने, ‘युवाहरू मन्त्री भएर मात्र हुँदैन । युवाहरू आएपछि राम्रा काम हुनुपर्छ । फरक ढंगले नयाँ काम हुनुपर्छ । भुईं मान्छेले महसुस गर्ने गरी काम गर्न सक्नुभयो भने चुनौतीलाई अवसरमा बदलेको ठहर हुन्छ ।’

एमालेले मन्त्री मात्र होइन, धेरै सिनियर र अनुभवी नेताहरू हुँदाहुँदै पहिलोपटक संसदमा प्रतिनिधित्व गरेका युवा महेश बर्तौलालाई मुख्य सचेतक र सुनिता बराललाई सचेतक बनाएको छ । यसलाई पनि एमालेले युवाहरूमाथि गरेको भरोसाका रूपमा हेरिएकाे छ । एमालेले युवाहरूलाई अवसर दिएर नेतृत्व निर्माणको सुरुवात गरेको श्रेष्ठ बताउँछन् । उनले भने, ‘पार्टीले युवाहरूलाई राम्रो अवसर दिएको छ । युवाहरूले काम गरेर अवसरलाई परिणाममा देखाउनुपर्छ । याे अवसरका साथै ठूलो चुनौती पनि हो । जनताको पक्षमा काम भयाे भने त सधैँलाई इतिहास हुन्छ ।’

युवाहरूले काम गरेर देखाउन सके राजनीतिप्रति बढिरहेकाे वितृष्णा घटेर जाने उपमहासचिव गुरुङ बताउँछन् । उनले भने, ‘राम्रो काम गरेर देखाउनुपर्छ । नीति नयाँ हुनुपर्छ । एक्टिभ हुनुपर्छ । समाजवादको जग बसाल्ने गरी काम गर्नुपर्छ । यसो हुन सक्यो भने पार्टी र जनताले विश्वास गर्छन् । राजनीतिप्रति देखिएकाे वितृष्णा पनि हटेर जान्छ ।’

एमालेले युवाहरू मात्र पठाउँदा गठबन्धनप्रति विश्वास नगरेको भन्ने भ्रम चिर्नका लागि पनि काम गरेर देखाउन सक्नुपर्ने एमाले युवानेता ठाकुर गैरे बताउँछन् । उनले भने, ‘युवाहरूले अवसर पाउनुभएको छ । सुशासन र समृद्धिका लागि काम गर्नुपर्छ । काम गर्ने सके सबैले युवाहरूलाई विश्वास र भरोसा गर्ने वातावरण बन्छ ।’

मुख्य सचेतक र सचेतकको भूमिका संसदमा महत्त्वपूर्ण हुन्छ । पार्टीको प्रस्तुति संसदमा कसरी निभाउने भन्ने मुख्य काम सचेतकहरूको नै हुन्छ । याे महत्वपूर्ण जिम्मेवारीमा ओलीले युवाहरूलाई खटाएका छन् । 'उहाँहरूले साँच्चै संसदमा राम्रो भूमिका निभाउन सक्नुभयो भने युवाहरूप्रति अन्य दलहरूले पनि विश्वास गर्ने वातावरण बन्छ । होइन, पाएको जिम्मेवारी निभाउन सकेनन् भने त सबै यस्तै रहेछन् भन्ने आममानिसमा पर्छ', श्रेष्ठ भन्छन् ।

प्रकाशित मिति: मंगलबार, फागुन २९, २०८० २०:११