सत्ता गठबन्धनमा सुरु भयो प्रदेशको भागवण्डा, कहाँ कसकाे दाबी ?

A+ A A-

नयाँ बनेको सत्ता गठबन्धनमा प्रदेश सरकारका बारेमा पनि छलफल सुरु भएको छ । केन्द्रमा नयाँ गठबन्धन बनेसँगै प्रदेशमा पनि कसले कुन प्रदेश सरकारको नेतृत्व गर्ने भन्नेबारेमा प्रारम्भिक चरणको छलफल सुरु भएको माओवादीनिकट स्रोतले बताएकाे छ ।

माओवादी, एमाले, नेकपा एस, नागरिक उन्मुक्ति र जसपाबीच प्रदेशका सरकार भागवण्डाका लागि छलफल सुरु भएको छ । सत्ता गठबन्धनमा रहेको रास्वपाको भने प्रदेशमा सांसद छैनन् । त्यही भएर रास्वपाको प्रदेश सरकार निर्माणमा कुनै भूमिका छैन ।

संघका खासै भूमिका नभएका साना दलहरू अहिले प्रदेश सरकार निर्माणमा निर्णायक शक्ति बनेका छन् । सुदूरपश्चिममा नाउपा निर्णायक शक्ति बनेको छ । सुदूरपश्चिममा नयाँ गठबन्धनको सरकार बन्नका लागि नाउपा नै निर्णायक छ । मधेशमा जसपा निर्णायक छ । त्यही भएर सत्ता गठबन्धनले साना दलहरूलाई पनि प्रदेश सरकारमा महत्त्व दिन थालेकाे हाे ।

गठबन्धनमा प्रारम्भिक चरणको छलफलमा कोशी प्रदेशमा अब एमालेको नेतृत्वमा सरकार बनाउने प्रस्ताव भएको छ । कोशीमा पूरा कार्यकाल एमालेले सरकार चलाउने गरी छलफल भएको स्रोतले बतायाे । त्यस्तै, मधेश प्रदेशमा जसपा र एमालेले मिलेर चार वर्षसम्म सरकार सञ्चालन गर्ने विषयमा छलफल जारी रहेको छ । मधेश प्रदेशमा पहिलो कार्यकाल जसपाको नेतृत्वमा सरकार सञ्चालन हुने र दोस्रो कार्यकाल एमालेले नेतृत्व गर्नेबारे छलफलमा गठबन्धन रहेको बताइन्छ ।

बागमती प्रदेशमा पहिला माओवादीको सरकारलाई नै निरन्तरता दिने गरी छलफल थालिएकाे छ । माओवादीले बागमतीमा आफूले नै निरन्तरता पाउनुपर्ने माग राखेको स्रोतले बतायो । बागमतीमा एमाले–माओवादी र हाम्रो नेपाल पार्टी मिल्दा सत्ता गठबन्धनको बहुमत पुग्छ । अहिले मुख्यमन्त्री शालिकराम जम्मकट्टेल छन् । जम्मकट्टेल नेतृत्वको सरकारलाई नै निरन्तरता दिन माओवादीले प्रस्ताव गरेको हाे ।

गण्डकी प्रदेशमा पहिला पनि एमालेको नेतृत्वमा सरकार बनेको थियो । अहिले पनि एमालेको नेतृत्वमा सरकार बन्ने पक्कापक्कीजस्तै बनेको बताइन्छ । लुम्बिनी प्रदेशमा पनि पहिलो कार्यकाल एमालेले नै मुख्यमन्त्री पाउने प्रस्ताव भएको छ । योभन्दा पहिला पनि माओवादी एमालेको गठबन्धनमा एमालेका लीला गिरी मुख्यमन्त्री बनेका थिए ।

कर्णाली प्रदेश सुरुमा नै माओवादीको भागमा परेको थियो । माओवादीका राजकुमार शर्मा मुख्यमन्त्री छन् । माओवादीले कर्णालीमा पनि अहिलेको सरकारलाई नै निरन्तरता दिने गरी छलफल चलाएकाे छ । एमालेलाई दिने हो भने अर्को कार्यकाल दिने तर अरु प्रदेशमा पूरा कार्यकाल एमालेले मुख्यमन्त्री भए कर्णालीमा माओवादी पनि पूरा कार्यकाल सरकारको नेतृत्व आफ्नो हुनुपर्ने दाबी गरेकाे छ ।

सुदूरपश्चिम प्रदेशमा भने गठबन्धन अलि कमजोर छ । माओवादी र एमाले मिलेर मात्र सरकार बन्दैन । त्यही भएर उसले नाउपालाई साथमा लिने तयारी गरेको छ । यहाँको सरकारको नेतृत्व पहिला एक वर्ष माओवादीले गर्ने र अर्को एक वर्ष एमालेले गर्ने र बाँकी दुई वर्ष नाउपालाई मुख्यमन्त्री दिने गरी छलफलको प्रस्ताव ल्याइएको एक माओवादी नेताले बताए । ती नेताका अनुसार सुदूरपश्चिममा एमाले–माओवादी एक–एक वर्ष र नाउपाले दुई वर्ष सरकारको नेतृत्व गर्ने प्रस्ताव छ ।

माओवादीले बागमती र कर्णालीमा आफ्नो सरकारको निरन्तरता चाहेको छ । यदि यस्तो भएन भने कर्णालीमा विद्रोह गरेर भए पनि आफ्नै नेतृत्वमा सरकार बनाउने तयारीमा माओवादी छलफलमा रहेको स्रोतले बताएकाे छ । स्रोतले भन्याे, ‘कर्णालीमा पहिला एमालेलाई सरकारको नेतृत्व दिने गरी निर्णय भए माओवादी कर्णालीको नेतृत्वले नस्वीकार्ने अवस्था आउन सक्छ । एमालेलाई पहिला नेतृत्व दिनुभन्दा कांग्रेससँग मिलेर आफ्नै नेतृत्वकाे सरकारलाई निरन्तरता दिने गरी पनि छलफल जारी रहेको छ ।’

प्रकाशित मिति: सोमबार, फागुन २८, २०८० १५:२२