मुख्यमन्त्री बन्न खगराजको कसरत, ओलीले भने- उता छलफल गर्नू, राप्रपालाई म मिलाउँछु

मुख्यमन्त्री बन्न खगराजको कसरत, ओलीले भने- उता छलफल गर्नू, राप्रपालाई म मिलाउँछु

A+ A A-

नेकपा एमाले नेता खगराज अधिकारी केन्द्रमा नयाँ गठबन्धन बनेसँगै गण्डकी प्रदेशको मुख्यमन्त्री बन्न कस्सिएका छन् । काठमाडौंबाट फर्केको दुई दिनमै उनी आइतबार फेरि काठमाडौं पुगेका छन् ।

गत २१ फागुन दिउँसो प्रदेशसभा बैठक चलिरहँदा उनी बीचमै छोडेर काठमाडौं उडेका थिए । काठमाडौं पुगेर अधिकारीले पछिल्लो राजनीतिक घटनाक्रमले गण्डकीको अवस्था के छ भन्ने विषय अध्यक्ष केपी शर्मा ओलीलाई सुनाए । राप्रपा संघको गठबन्धनमा नरहेको र प्रदेशमा साथ नदिए सरकार गठनमा अप्ठ्यारो पर्ने सुनाएपछि ओलीले त्यसमा चिन्ता नलिन दलका नेता अधिकारीलाई सुझाए ।

अध्यक्ष ओलीसँगको भेटको विषय दल नेता अधिकारीले आइतबार संसदीय दलको बैठकमा सदस्यलाई ब्रिफिङ गरेका थिए । ‘त्यहाँको दलहरूसँग तपाईंको तहबाट कुराकानी अघि बढाउनुस् । यता हामी छलफल गर्छौं, मिलाउँछु भन्नुभएछ,’ एमालेका एक जना सांसदले शिलापत्रसँग भने ।

अध्यक्ष ओलीले राप्रपासँग कुरा मिलाउने आश्वासन दिएपछि अधिकारी पोखरा फर्किए । सांसदहरूसँग सरकार गठनको प्रक्रियामा ध्यान दिनुपर्ने विषय के-के छन् भन्ने विषयमा आइतबार छलफल गरे । बैठकमा सहभागी सांसदहरूले छुट्टै अस्तित्व मागिरहेका डा. बाबुराम भट्टराईनिकट माओवादी संसदीय दलका सदस्य फणीन्द्र देवकोटाको विषयमा सोच्नुपर्ने बताएका थिए । त्यतिमात्र होइन, नेसपा अध्यक्ष डा. भट्टराईसँग भेट गरेर सरकार गठनमा सहयोग गर्न आग्रह गर्न पनि सांसदले सुझाव दिए । तर, कानुनी जटिलता रहेको, छुट्टै दलको अस्तित्व पाउने सम्भावना नरहेको र माओवादीको ह्वीप लाग्ने भएकाले चिन्ता लिन आवश्यक नरहेको नेता अधिकारीले ब्रिफिङ गरेका थिए ।

स्वतन्त्र निर्वाचित एकीकृत समाजवादीका सांसद राजीव गुरुङ (दीपक मनाङे) को विषय पनि बैठकमा उठेको थियो । उनले पनि साथ नदिने र देवकोटाले पनि साथ नदिए परिस्थिति जटिल बन्ने विषयले छलफलमा प्रवेश पाएको थियो । जवाफमा दल नेता अधिकारीले सांसदहरूलाई भने, ‘हामी मध्यावधिमा जाने पक्षमा छैनौँ । सकभर हाम्रै नेतृत्वमा सरकार बनाउनुपर्छ ।’

राप्रपाले आफू निर्णायक भएको ठाउँमा के गर्ने भन्नेमा कुनै निर्णय नदिएकाले अलमलको अवस्था छ । यही विषयमा पहल गरिदिन आग्रह गर्दै दल नेता अधिकारी आइतबार काठमाडौं पुगेका हुन् । उनले सोमबार अध्यक्ष केपी ओली र महासचिव शंकर पोखरेललाई भेट्ने छन् ।

६० सदस्यीय गण्डकी प्रदेशसभामा कांग्रेसका २७, एमालेका २२, माओवादी केन्द्रका सभामुखसहित ८, राप्रपाका २ र एकीकृत समाजवादीका एक सांसद छन् । एमाले दल नेता अधिकारी र माओवादी दल नेता हरिबहादुर चुमानमध्ये जो मुख्यमन्त्री बन्ने भए पनि ३१ मत चाहिन्छ । एमालेका २२ र माओवादीको ७ मत गर्दा २९ हुन्छ । राप्रपाले साथ दिएको अवस्थामा ३१ मत पुग्छ । माओवादी संसदीय दलका सदस्य फणीन्द्र देवकोटाले अप्ठ्यारो पारेको अवस्थामा स्वतन्त्र निर्वाचित भएर एकीकृत समाजवादी प्रवेश गरेका सांसद राजीव गुरुङले नयाँ गठबन्धनलाई साथ दिएमा कुनै अप्ठ्यारो पर्दैन ।

गत २३ फागुनमा माओवादीले समर्थन फिर्ता लिएसँगै मुख्यमन्त्री सुरेन्द्रराज पाण्डे अल्पमतमा परेका छन् । गत १४ वैशाखमा मुख्यमन्त्री नियुक्त हुँदा उनलाई कांग्रेसका २७, माओवादीका ७ र स्वतन्त्र निर्वाचित एकीकृत समाजवादीका राजीवको समर्थन थियो ।

अब पाण्डेले संविधानको धारा १८८ (२) अनुसार ३० दिनभित्र संसदबाट विश्वासको मत लिनुपर्छ । कांग्रेसका २७ जना मात्र सांसद भएकाले विश्वासको मत पाउने अवस्था छैन । त्यसैले पाण्डे उपधारा ३ अनुसार स्वतः पदमुक्त हुनेछन् । केन्द्रको समीकरणअनुसार अब गण्डकीमा एमाले, माओवादी मिलेर सरकार बनाउनेछन् ।

अल्पमतको सरकारले भावी सरकारलाई अप्ठ्यारो पार्न सक्ने विषयमा पनि एमालेले आइतबारको संसदीय दलको बैठकमा छलफल भएको थियो । ‘गण्डकी प्रदेश सरकार कामचलाउ सरकारमा परिणत भएको अवस्थामा दीर्घकालीन असर पर्ने खालका कुनै पनि निर्णय नगर्न साथै त्यस्ता कुनै पनि काम कारबाही अगाडि नबढाउन सरकारलाई सचेत गराउने,’ बैठकको निर्णयमा भनिएको छ ।

दलको तर्फबाट आवश्यक संवाद र समन्वय गर्न दल नेता खगराज अधिकारीलाई सबै जिम्मा दिने निर्णय भएको प्रमुख सचेतक गोविन्द नेपालीले जानकारी दिए । त्यस्तै, गण्डकी प्रदेशमा सरकार निर्माणको प्रक्रियामा सहज र स्वाभाविक राजनीतिक निकासका लागि वातावरण निर्माण गर्न सवैलाई आह्वान गर्ने निर्णय भएको नेपालीले बताए । यसको घुमाउरो अर्थ मुख्यमन्त्रीले राजीनामा दिएर मार्ग खाली गर्नुपर्छ भन्ने हो । तर, मुख्यमन्त्री पाण्डे त्यस्तो कदम चाल्ने पक्षमा छैनन् । २३ चैतभित्र उनले विश्वासको मत लिनुपर्छ ।

प्रकाशित मिति: सोमबार, फागुन २८, २०८० १२:२८