मधेश सरकारमा लफडाः मुख्यमन्त्रीले कांग्रेसका मन्त्रीको राजीनामा मागे, पाए राजीनामा नदिने जवाफ

मधेश सरकारमा लफडाः मुख्यमन्त्रीले कांग्रेसका मन्त्रीको राजीनामा मागे, पाए राजीनामा नदिने जवाफ

A+ A A-

केन्द्रीय सरकारमा जसपा सहभागी भएसँगै मधेश प्रदेशका मुख्यमन्त्री सरोजकुमार यादवले कांग्रेसका मन्त्रीहरूसँग राजीनामा मागेका छन् ।

केन्द्रमा बनेको नयाँ सत्ता गठबन्धनमा जनता समाजवादी पार्टी(जसपा) सहभागी भए पनि मधेश प्रदेशमा अझै पुरानै गठबन्धनको सरकार कायम छ । मधेश प्रदेश सरकारको नेतृत्वको पाउनुपर्ने बार्गेनिङ कारण नयाँ सत्ता गठबन्धनमा सामेल हुन बिलम्ब गरेका जसपा अध्यक्ष उपेन्द्र यादवले आइतबार उपप्रधानमन्त्रीको शपथ लिइसकेका छन् ।

नयाँ गठबन्धनभित्र फ्नो नेतृत्व सुरक्षित रहनेमा आश्वस्त भएपछि मुख्यमन्त्री सरोजकुमार यादवले शुक्रबार नै काठमाडौंबाट फर्केलगत्तै कांग्रेसका मन्त्रीहरूसँग राजीनामा दिन आग्रह गरेका थिए । तर, कांग्रेस संसदीय दलका नेता तथा भौतिक पूर्वाधार विकासमन्त्री कृष्णप्रसाद यादवले भने ‘आफूहरूले राजीनामा नदिने र बर्खास्त गर्ने अधिकार तपाईंसँग छ, बर्खास्त गर्नुस्' भनेर मुख्यमन्त्री यादवलाई जवाफ फर्काएको कांग्रेसका एक नेताले बताए ।

यता, जसपा अध्यक्ष उपेन्द्र यादवले आफू सरकारमा सामेल भएपछि मात्र कांग्रेसका मन्त्रीलाई बर्खास्त गर्न मुख्यमन्त्री यादवलाई निर्देशन दिएका थिए । आइतबार उपेन्द्र सरकारमा गइसकेकाले मुख्यमन्त्री यादवले आइतबार कांग्रेसका मन्त्रीहरूलाई हटाउन सक्छन् ।

उता नेकपा एमाले मधेश प्रदेशका नेता सरोज यादवले आफ्नो नेतृत्वमा गठबन्धन सरकार बनाउने तयारीका लागि काठमाडौंमा दौडधुप बढाएका छन् । सत्ता गठबन्धन परिवर्तनसँगै प्रदेशको नेतृत्वमा पनि परिवर्तन हुनुपर्ने उनको तर्क छ । वर्तमान जसपा नेतृत्वको सरकारप्रति जनतामा व्यापक निराशा रहेको र गठबन्धन फेरिए पनि सरकारको नेतृत्व फेरिएन भने जनतामा राम्रो सन्देश नजाने तथा ठूलो दलको हैसियतले आफूहरूले सरकारको नेतृत्व पाउनुपर्ने एमालेका एक प्रदेश सांसदले बताए ।

नेकपा एमालेका संसदीय दलका नेता सरोज यादवले अहिले प्रदेश सरकारको नेतृत्व कसले गर्ने भन्ने विषयमा गठबन्धन दलबीच कुनै सहमति नभएको बताए । उनले भने, ‘एमाले मधेश प्रदेशको सबभन्दा ठूलो पार्टी हो । त्यस हिसाबले सरकारको नेतृत्व हामीले पाउनुपर्ने हो । यद्यपि गठबन्धन दलभित्र यो विषयमा आज छलफल भएपछि मात्रै सरकारको नेतृत्व कसले गर्ने भन्ने निर्णय हुन्छ ।’

हुन त कांग्रेसले पनि मधेश प्रदेश सरकार आफ्नो नेतृत्वमा गठन गर्ने तयारी नगरेको होइन । तर, नेकपा एस गठबन्धनमा सहभागी हुनाले कांग्रेसको त्यो प्रयास असफल हुने अवस्थामा पुगेको छ ।

कांग्रेस २२, जनमत १३, लोसपा ९, राप्रपा, नागरिक उन्मुक्ति पार्टी र नेपाल संघीय समाजवादी पार्टीको एक/एक गरी ४७ मत हुन जान्छ । यस्तोमा नेकपा एसको ७ मत पाएको खण्डमा कांग्रेसले आफ्नो नेतृत्वमा सरकार गर्ने प्रयास थालेको थियो । मधेश प्रदेश सरकार गठनका लागि ५४ मत आवश्यक छ । सरकार गठनका लागि आवश्यक गणित बुझेर नै कांग्रेसका संसदीय दलका नेता यादवले सुरुमा प्रदेशका साना दलका सांसदहरूसँग छलफलसमेत गरेका थिए । तर, नेकपा एस गठबन्धनमा गएपछि त्यो प्रयास सुस्त भएको कांग्रेसका एक प्रदेश मन्त्रीले बताए ।

उनले भने, ‘कांग्रेस नेतृत्वको सरकारको सम्भावना अब कम छ । तर पनि हामी नेकपा एसका केही सांसदहरूलाई रिझाइरहेका छौँ । उहाँहरूले सहयोग गरेको खण्डमा सरकारको नेतृत्व पाउने सम्भावना छ ।’ नेकपा एस राष्ट्रिय पार्टी नभएको र पार्टीको ह्वीप पनि नलाग्ने भएकाले त्यो सम्भावना रहेको उनले बताए ।

प्रकाशित मिति: आइतबार, फागुन २७, २०८० १२:४६