सूर्यज्योति लाइफद्वारा सिलाइकटाइ तालिम सञ्चालनका लागि १० थान मेसिन तथा सामग्री वितरण

सूर्यज्योति लाइफद्वारा सिलाइकटाइ तालिम सञ्चालनका लागि १० थान मेसिन तथा सामग्री वितरण

A+ A A-

सूर्यज्योति लाइफले महिलाहरूको सीपमूलक सिलाइकटाइ तालिम सञ्चालन गर्ने उद्देश्यले १० थान सिलाइ मेसिन तथा सोसँग सम्बन्धित सामग्रीहरू हस्तान्तरण गरेको छ । कम्पनीले ११४औँ अन्तर्राष्ट्रिय नारी दिवसको अवसर पारेर फूलबारी सामुदायिक पुस्तकालय तथा स्रोत केन्द्र, मध्यविन्दु – ३, नवलपरासीलाई ती सामग्रीहरू हस्तान्तरण गरेको हो ।

सूर्यज्योति लाइफले आफ्नो संस्थागत सामाजिक उत्तरदायित्वअन्तर्गत विपन्न वर्गका महिलाहरूको आर्थिक क्षमता वृद्धि गर्नका लागि निरन्तर रूपमा सीपमूलक सिलाइकटाइ तालिम सञ्चालन गर्ने उद्देश्यले ती सामग्रीहरू हस्तान्तरण गरेको जनाएको छ ।

उक्त संस्थाले विभिन्न सरकारी तथा गैरसरकारी संस्थाहरूको सहयोगबाट वित्तीय साक्षरता, सीपमूलक प्रविधि शिक्षा, खेलकुद, जलवायु परिवर्तन न्यूनीकरण, अनुकूलनसम्बन्धी गतिविधि, खेलकुद तथा साक्षरता कक्षासम्बन्धी विभिन्न गतिविधिहरु सञ्चालन गर्दै आइरहेको छ ।

फूलबारी सामुदायिक पुस्तकालय तथा स्रोत केन्द्र, मध्यविन्दु– ३, नवलपरासीमा आयोजित उक्त कार्यक्रममा संस्थाका अध्यक्ष, अम्बरबहादुर महतो, सचिव, काशीराम पाठक तथा संस्थाका पदाधिकारीहरूसहित रोटरी क्लब नवलपरासीका पदाधिकारी, स्थानीय जनप्रतिनिधि, तालिममा सहभागी महिला र सूर्यज्योति लाइफका क्षेत्रीय प्रबन्धक ईश्वर विकल सापकोटाको उपस्थिति थियो ।

कार्यक्रममा कम्पनीका क्षेत्रीय प्रबन्धक सापकोटाले सामग्री हस्तान्तरण गर्दै यस प्रकारको सहयोगले विपन्न वर्गका महिलाहरूको आर्थिक क्षमता वृद्धि गर्न टेवा पुग्नेमा आफू विश्वस्त रहेको बताए । फुलबारी सामुदायिक पुस्तकालय तथा स्रोत केन्द्रका अध्यक्ष महतोले विपन्न तथा पिछडिएका महिलाहरूको सीपमा विकास गरी उनीहरूलाई आर्थिक समुन्नतिको बाटोमा बढाउन सकिन्छ भनेर नै यस्ता खालका तालिम आयोजना गरिएको र यसमा सूर्यज्योति लाइफले साथ दिएकोमा आभार व्यक्त गरे ।