नेकपा एससँग एकता गरेर एमाले संसदकाे ठूलो दल बन्न लागेको हो ? (भिडियो संवाद)

A+ A A-

एमाले उपमहासचिव विष्णु रिमालले देश निरन्तर ओरालो लागेपछि अघिल्लो गठबन्धन भत्काउन आफ्नो पार्टी कांग्रेस र माओवादी केन्द्र दुवैसँग संवादमा रहेको बताएका छन् ।

अहिलेको सत्ता गठबन्धनलाई उनले १० पुस २०७९ कै सहमतिको निरन्तरताका रूपमा व्याख्या गरेका छन् । अर्थतन्त्र बिग्रेको अवस्थामा दुई ठूला पार्टी मिलेर भए पनि जनतामा आशा जगाउन एमालेले प्रयत्न गरेको तर कांग्रेस निदाएर बसेकाले माओवादी केन्द्रसँग नयाँ गठबन्धन भएको बताएका छन् । शिलापत्रसँग भिडियो संवाद गर्दै नेता रिमालले भने, ‘कांग्रेस सरकारमा हुँदा सुतेर बस्यो । बिग्रिएको–भत्किएको पत्तो पाएन । हटेपछि अहिले अस्वाभाविक दौडधुप गर्दै छ ।’

सरकारबाट हटेको एक दिन नहुँदै कांग्रेस छटपटिएर अस्वाभाविक दौडधुपमा लागेको उनको भनाइ छ । ‘त्यसरी छटपटाउन आवश्यक छैन । हामी त चुप लागेर बसेका थियौँ त,’ उनले भने । एमाले–माओवादी केन्द्रबीच नयाँ सत्ता गठबन्धन बनेपछि कांग्रेसले प्रधानमन्त्री पुष्पकमल दाहाल प्रचण्डलाई अल्पमतमा पार्ने रणनीति लिएको छ । त्यसका लागि एमाले अध्यक्ष केपी ओली, रास्वपा सभापति रवि लामिछाने र एकीकृत समाजवादीका अध्यक्ष माधव नेपाललाई प्रधानमन्त्रीको अफर गरेको खबर बाहिरिएका छन् ।

नयाँ गठबन्धन बनाउँदा प्रधानमन्त्री प्रचण्ड र एमाले अध्यक्ष ओलीबीच को कति समय प्रधानमन्त्री हुने भन्ने लिखित सहमतिसमेत नगरिएको रिमालले खुलाए । ‘त्यसबारे लिखित केही भनिएको छैन । मुख्य कुरा अहिलेको निराशा कसरी चिर्ने भन्ने नै हो,’ उनले भने ।

नयाँ सत्ता गठबन्धनपछि कतिपयले वाम ध्रुवीकरण र एकताको पनि चर्चा गरेका छन् । एमाले अध्यक्ष ओलीनिकट नेता रिमाल भने तत्काल त्यस्तो सम्भावना नरहेको दाबी गर्छन् । ‘अहिल्यै वाम एकता भन्नु साह्रै कच्चा हुन्छ । हामीले एकपटक एकता गरेर चेतिसकेका छौँ,’ उनी भन्छन्, ‘त्यसैले अहिले एकता गर्न हतारिन्नौँ । पहिले डेलिभरी दिने हो । गठबन्धनको औचित्य पुष्टि गर्ने गरी काम गरेपछि वाम पार्टीहरू नजिक आएछन् र फरक पार्टी चाहिन्न भन्ने भएछ भने अलग कुरा । नत्र अहिले सत्ता गठबन्धन मात्र हो ।’

नयाँ गठबन्धनमा एकीकृत समाजवादीलाई ल्याउन एमाले अध्यक्ष ओली स्वयम् कोटेश्वरस्थित माधव नेपाल निवास पुगे । त्यसले दुई पार्टीबीच दूरी घटेको धेरैको आकलन छ । कतिपयले अब एमाले र नेकपा एसबीच पार्टी एकता हुने अनुमानसमेत गरेका छन् । त्यो अनुमान किन पनि स्वाभाविक छ भने एसका अध्यक्ष नेपालले एक महिनाअघि राष्ट्रिय परिषद् बैठकमा जनताको बहुदलीय जनवाद (जबज)को विचार छाड्न नसक्ने उद्घोष गरे । त्यसले दुई पार्टी वैचारिक रूपमा नजिकिएका छन् ।

पछिल्लो भेटमा एमाले अध्यक्ष ओलीले विगतको तितो बिर्सेर सहकार्यका लागि आग्रह गरेका थिए । त्यसो भए नेकपा एससँग एकता गरेर एमाले संसदको ठूलो दल बन्न लागेको हो ? उपमहासचिव रिमालले त्यस्तो सम्भावना अस्वीकार मात्र गरेनन्, एमालेका लागि माओवादी केन्द्र र नेकपा एस दुवै समदूरीमा रहेको बताएका छन् । ‘एमालेका लागि माओवादी र एसबीच दूरी उस्तै हो । हिजो नेकपामा हामी एकैठाउँ थियौँ, अहिले तीन ठाउँमा छौँ । अहिले एकता वा मर्जरतिर लागेकै छैनौँ,’ उनले भने ।

ओली र नेपालको सम्बन्ध अहिले सुध्रिएको स्वीकार्न पनि उनी तयार भएनन् । यी दुई नेताबीच गत वर्ष राष्ट्रपति चुनावकै बेला दूरी घटेको स्मरण गर्दै रिमालले भने, ‘उहाँहरूबीच राष्ट्रपति चुनावले दूरी घटाएको थियो । पटक–पटक भेटेर राष्ट्रपति नै अफर गरेको हो नि ।’

एमाले एकता वा मर्जरतिरभन्दा २०८४ को चुनावमा बहुमत ल्याउने मिसनमा रहेको उनले बताए । ‘एसमा लागेका साथीहरू फर्किराख्नुभएको छ । उहाँहरूलाई आउन कुनै प्रतिबन्ध छैन । पार्टी एकताको विषय भने अहिले प्रवेश भएको छैन,’ रिमालले भने, ‘हिजो हतारमा एकता गर्दा एमालेले क्षति ब्यहोर्‍यो, अहिले त्यता जाँदैनौँ ।’

विस्तृत भिडियो संवाद :