अमेरिकामा परामर्शदाता थिइन् सुमना श्रेष्ठ, स्वदेश फर्केर भइन् शिक्षामन्त्री

अमेरिकामा परामर्शदाता थिइन् सुमना श्रेष्ठ, स्वदेश फर्केर भइन् शिक्षामन्त्री

A+ A A-

राष्ट्रिय स्वतन्त्र पार्टी (रास्वपा)की सांसद सुमना श्रेष्ठ शिक्षामन्त्री बनिन् । समानुपातिकको जनजाति समूहबाट सांसद बनेकी श्रेष्ठ संसदको शिक्षा समिति सदस्यसमेत थिइन् ।

सुमनाले अमेरिकाको मासाचुसेट्स इन्स्टिच्युट अफ टेक्नोलोजी (एमाइटी) स्लोन स्कुल अफ म्यानेजमेन्टबाट बिजनेस एडमिनिस्ट्रेसनमा स्नातकोत्तर (एमबीए) गरेकी छिन् । त्यसभन्दा अघि उनले अमेरिकाकै ब्रिन मार कलेजबाट अर्थशास्त्र र ह्याभरफर्ड कलेजबाट गणितमा स्नातक गरेकी हुन् ।

काठमाडौंको क्षेत्रपाटीस्थित सरस्वती आवासीय माध्यमिक विद्यालयबाट प्रवेशिका परीक्षा पास गरेकी उनले काठमाडौंको बूढानीलकण्ठस्थित बूढानीलकण्ठ स्कुलबाट ए-लेभल गरेकी छन् ।

२०७२ सालभन्दा अघि सुमना अमेरिकास्थित बोस्टन कन्सल्टिङ ग्रुप (बीसीजी) मा परामर्शदाताका रूपमा कार्यरत थिइन् । त्यसअघि ट्रेड अनालिस्ट (वाणिज्य विश्लेषक) का रूपमा सिटी ग्रुपमा समेत उनले काम गरेकी थिइन् । जब २०७२ सालमा नेपालमा महाभूकम्प गयो, त्यसपछि उनको जीवनको लेन बदलियो । भूकम्पपछि नेपालमा विश्व खाद्य कार्यक्रम (डब्लूएफपी) सँग काम गर्न बोस्टन कन्सल्टिङ ग्रुप (बीसीजी) ले उनलाई नेपाल पठायो । यसरी नेपाल आएपछि भने उनी अमेरिका फर्किनन् ।

नेपाललाई नै कार्यक्षेत्र बनाएर काम गर्न थालेपछिका वर्षहरूमा सुमना नेपाल र नेपालीका लागि सञ्चालन भएका विभिन्न अभियान र कार्यक्रममा आधारभूत तहमै संलग्न भएकी छिन् । भूकम्पपछि प्रवासी नेपालीहरूमार्फत प्राप्त भएको सहायता सामग्री सङ्कलन र वितरणमा संयोजन गरेर होस् वा काष्ठमण्डप पुनर्निर्माणसम्बन्धी उपसमितिलाई नेतृत्व गरेर, अथवा रानीपोखरी बचाउ अभियानमा सक्रिय रहेर, उनी तत्काल आवश्यक सहयोग, सहायतादेखि पुनर्निर्माणसम्मका गतिविधिमा सक्रिय रूपमा सहभागी भइन् ।

त्यति मात्र होइन, कोभिड - १९ को महामारीका बेलासमेत नेपाली नागरिकलाई कोभिड - १९ विरुद्धको खोप प्रदान गर्न अमेरिकी सरकारलाई त्यहाँको सिनेटमार्फत अनुरोध गरिन् । उनी एक सफल उद्यमी पनि हुन् । उनले कारपुल काठमान्डू (Carpool Kathmandu) र मेडिकेसन फर नेपाल (Medication For Nepal) जसलाई अमेरिकी राष्ट्रपति बाराक ओबामाले सन् २०१६ मा क्यालिफोर्नियामा भएको ग्लोबल अन्टरप्रेनरसिप समिटमा खुल्ला हृदयले प्रशंसा गरेका थिए) लगायतका परियोजनाको सुरुवात गरेकी छिन् ।

नाकाबन्दीका कारण देखापरेको इन्धनको समस्यामा नागरिकलाई थोरै भए पनि राहत दिने गरी सुरु गरिएको कारपुल नेपाल र विशेषतः महाभूकम्पपछिको अवस्थामा औषधिजन्य आवश्यकतालाई पूर्ति गर्ने उद्देश्यले सुरु गरिएको मेडिकेसन फर नेपाल दुवै सफल परियोजना हुन् । सुमना गणितमा पनि दख्खल राख्छिन् । गणितमा पनि स्थानविज्ञान (टोपोलोजी) र ज्यामितिमा उनको विशेषज्ञता छ । उनले व्यवस्थापन परामर्शदाताका रूपमा काम गरिसकेकी छिन् ।

त्यस्तै, उनले कोसी कोल्याबोरेटिभ (व्यवस्थापन तथा प्राविधिक परामर्शदाता कम्पनी), नोवाला बायोटेक (स्वास्थ्य उपकरण सामग्री उत्पादन) र बटुका क्रिमरी (आइसक्रिम पार्लर) लगायतका उद्यम स्थापना गरेकी छन् । प्रविधि र अर्थशास्त्रमा विज्ञता भएकी राजनीतिज्ञको रूपमा सुरुवाती चरणमा सुमनाका मूलतः तीनवटा प्राथमिकता छन् । पहिलो, रोजगारी सिर्जना गर्ने (विशेषतः प्रविधिको क्षेत्रमा) । दोस्रो, नेपालको विकासको मुद्दामा प्रवासी नेपालीहरूलाई संलग्न गराउने । र तेस्रो, राजनीतिज्ञहरूको राजनीतिक उत्तराधिकारीको योजना सञ्चालन गर्ने हो ।

व्यवस्थापन परामर्शदाता सुमना श्रेष्ठ, उद्यमी र अभियन्ता पनि हुन् । सुमनाले काष्ठमण्डप पुनर्निर्माण र रानीपोखरी संरक्षण अभियानमा सम्पदाको संरक्षणका लागि स्थानीय तहमा समुदायलाई परिचालन गरी आन्दोलनका अग्रभागमा देखिन्थिन् । विभिन्न व्यवसायहरू स्थापना गरेर रोजगारी सिर्जना गरेकी छिन् ।

प्रकाशित मिति: बुधबार, फागुन २३, २०८० २०:०६