आशा अभिनित 'उपहार' फागुन २५ मा रिलिज हुँदै

A+ A A-

नेपाली चलचित्र ‘उपहार’ यही फागुन २५ गते रिलिज हुने भएको छ । यो चलचित्रले सेन्सर बोर्डबाट ‘यू’ अर्थात् युनिभर्सल सर्टिफिकेट पाएको छ । यससँगै अब सबै उमेर समूहका दर्शकले यो फिल्म हेर्न पाउनेछन् ।

रेखा फिल्म्स र कपनगढी सिनेमा प्रालिको ब्यानरमा रेखा थापा प्रस्तुतकर्ता रहेको फिल्ममा रेखा थापा, पुजा शर्मा, बेनिशा हमाल, सुष्मा कार्की, आशा भुषाल, राजाराम पौडेल, किरण केसी, मुकुन भुसाल, तेज गिरी, समर्पणजंग कार्की, शिशिर राणा, अंशु महर्जन, विनोद पौडेल, शोभारस घिमिरे, मञ्जु श्रेष्ठ, कमल भट्ट र सरिता राजोपाध्यायलगायतको अभिनय छ ।

फिल्मका निर्माता सुलभ प्रतिक र समीक्षा देउजा हुन् भने बलराम शाही ठकुरी कार्यकारी निर्माता हुन् । फिल्ममा विष्णु कल्पित घिमिरेको छायांकन, अर्जुन पोखरेल र बाबुल गिरीको संगीत, मित्र डि गुरुङको सम्पादन रहेको छ ।

अभिनेत्री आशा भुसालले चर्चित अभिनेत्री रेखा थापाले निर्माण गरेको चलचित्र उपहारमा समावेश हुन पाउनु गौरवको विषय भएको बताइन् । चलचित्रमा फरक खालको चरित्रमा अभिनय गर्न पाउनु आफ्नो सौभाग्य भएको भुसालको भनाइ छ । आफूलाई अभिनयको विद्यार्थी ठान्ने उनी नयाँ पुराना सबैखाले अभिनेताहरूबाट धेरै कुराहरू सिक्न पाएको बताउँछिन् ।

अभिनेत्री आशा भुसालले चलचित्रका साथै थुप्रै टेलिचलचित्र, म्युजिक भिडियो, लघु चलचित्रहरूमा अभिनय गरिसकेकी छन् । मध्यम वर्गीय परिवारबाट चलचित्र क्षेत्रमा प्रवेश गरी दरिलो आत्मविश्वास र अथक साधनाका कारण आफूले यो सफलता पाएको उनको भनाइ छ ।

उनले एउटी आमाले ९ महिना कोखमा राखेर बच्चा जन्माउने दिनको जस्तै आफूलाई फिल्म रिलिज हुने दिनले उत्साह र कौतुहलता थपिएको बताइन् । उनी भन्छिन्, ‘मलाईजस्तै छटपटी पक्कै दर्शकलाई पनि भएको छ । पक्कै पनि उहाँहरूले मन पराइदिनुहुनेछ भन्ने अपेक्षा छ ।’

प्रकाशित मिति: बुधबार, फागुन २३, २०८० १६:१९