सत्ता गठबन्धन परिवर्तनले अर्थतन्त्र लयमा आउने निजीक्षेत्रको आशा

A+ A A-

शिथिल अथस्थामा पुगेको मुलुकको अर्थतन्त्र सत्ता गठबन्धनमा परिवर्तनसँगै लयमा आउन आशा जगाउने निजीक्षेत्रको विश्वास छ । मुलुकको अर्थतन्त्र मन्दीउन्मुख भएर गम्भीर संकट आउने अवस्थामा पुगेको बेलामा सत्ता समीकरण परिवर्तनपछि अर्थतन्त्रले पनि लय समात्ने निजीक्षेत्रले अपेक्षा गरेको हो ।

राजनीतिक अस्थिरता देखिए पनि नयाँ अर्थमन्त्री र नयाँ समीकरणबाट संकटमा रहेको अर्थतन्त्र पुरानै लयमा आउने अपेक्षा उद्योगी व्यवसायीहरूको देखिएको छ । लामो समय सुस्ताएको नेपाली पुँजीबजारले ११७.७० अंकले वृद्धि भएर नयाँ सत्ता गठबन्धनलाई स्वागत गर्‍यो । तर, मंगलबार भने शेयरबजार उच्च अंकले गिरावट आएको छ । मन्त्रीमण्डल बिस्तारसँगै पुँजीबजारले गति लिने निजीक्षेत्रको अपेक्षा लिएको छ ।

सत्ता गठबन्धनबाट नयाँ अर्थमन्त्रीको रूपमा नेकपा माओवादी केन्द्रका उपमहासचिव वर्षमान पुनको निश्चितजस्तै देखिएको छ । तर, निजीक्षेत्रले पुरानो सत्ता गठबन्धनबाट नभएका र अधुरा कामहरू नयाँ सत्ता समीकरणबाट हुने अपेक्षा राखेको छ । उद्योगी व्यवसायीहरूले मुलुकमा राजनीतिक परिवर्तन धेरै भएको भन्दै अब मुलुकका सबै राजनीतिक दलहरूले आर्थिक सुधारको एजेन्डालाई पहिलो प्राथमिकतामा राख्न जरुरी रहेको बताएका छन् ।

उनीहरूले नयाँ सत्ता समीकरणसँगै शिथिल बनेको अर्थतन्त्रलाई लयमा ल्याएर निजीक्षेत्रको मनोबल उच्च बनाउने पनि आशा रहेको बताए । व्यवसायीहरूले नयाँ सत्ता गठबन्धनले निजीक्षेत्रलाई साथमा लिएर अर्थतन्त्र सुधार गर्ने विश्वास रहेको बताए ।

उनीहरूले प्रधानमन्त्रीदेखि अन्य नेताहरूले मुलुकको अर्थतन्त्र सुधारका लागि नै नयाँ सत्ता गठबन्धन बनाउनुपरेको बोल्दै आएकाले केही सुधार हुने आशा र अपेक्षा रहेको उल्लेख गरे । नेपाल उद्योग वाणिज्य महासंघकी पूर्वअध्यक्ष भवानी राणाले शिथिल अर्थतन्त्रलाई नयाँ सत्ता गठबन्धनबाट बन्ने अर्थमन्त्रीले लयमा ल्याउने काम गर्ने आशा रहेको बताइन् । उनले न्युज एजेन्सी नेपालसँग कुराकानी गर्दै अर्थतन्त्रमा देखिएको समस्या सुधारको आवश्यकता रहेको बेला नयाँ सत्ता परिवर्तनले केही सुधार हुने आशा जगाएको बताइन् । उनले निजीक्षेत्रको मनोबल कमजोर भएको र मुलुकको अर्थतन्त्र आरोलोलाग्दो अवस्था सत्ता समीकरण परिवर्तनले सुधारको संकेत गरेको पनि बताइन् ।

पूर्वअध्यक्ष राणाले पछिल्लो तीन दशकमा निजीक्षेत्रले सबैभन्दा बढी अप्ठ्यारो महसुस अहिले गरेको भन्दै सत्ता गठबन्धन परिवर्तन भएको अवस्थामा निजीक्षेत्रले केही आशा गरेको उल्लेख गरिन् । उनले वर्षौंदेखि निजीक्षेत्र केही परिवर्तनको आशा बोकेर बसेको धारणा राखिन् । उनले नयाँ गठबन्धनमा सहभागी भएका पार्टीका नेता र प्रधानमन्त्री स्वयम् अर्थतन्त्र सुधार गर्न कोर्स करेक्सन गरिएको बताएकाले पनि केही परिवर्तन भएर अर्थतन्त्र लयमा आउने आशामा निजीक्षेत्र रहेको बताइन् ।

न्युज एजेन्सी नेपालसँग कुरा गर्दै उनले सरकारले निजीक्षेत्रलाई साथमा लिएर हिँड्न सके अर्थतन्त्रमा सुधार हुने दाबी गरिन् । उनले सरकारले सबैभन्दा पहिला गिरेको निजीक्षेत्रको मनोबल उकास्न सक्नुपर्ने बताइन् । राणाले सरकारले निजीक्षेत्रलाई सम्मान गर्न सके निजीक्षेत्रको आत्मबल बढ्ने धारणा राखिन् ।

विश्वका अन्य मुलुकहरूमा करदातालाई राज्यले सम्मान गर्ने गरेको भए पनि नेपालमा उद्योगी व्यवसायीहरूलाई त्यो खालको सम्मान अहिलेसम्म गर्न नसकेको धारणा राखिन् । नयाँ मन्त्रीले नयाँ जोशका साथ काम गर्ने आशा लिएको भन्दै निजीक्षेत्र सदैव जुनसुकै राजनीतिक दलबाट आउने अर्थमन्त्रीलाई साथ दिन तयार रहेको बताइन् ।

अर्का उद्योगी व्यवसायी शशीकान्त अग्रवालले सत्ता गठबन्धन परिवर्तन भए पनि मुलुकको आर्थिक नीति र संरचना परिवर्तन नभएको भन्दै नयाँ सत्ता समीकरणले शिथिल अर्थतन्त्र सुधारमा आशा पलाएको बताए । उनले विगत एक वर्षदेखि अर्थतन्त्र सुधारमा कुनै उपलब्धि हासिल नगरेको भन्दै नयाँ आउने अर्थमन्त्रीबाट पुराना मन्त्रीले नगरेका र त्रुटिहरूलाई सच्याएर अगाडि बढ्दा अर्थतन्त्रमा सुधार हुने अपेक्षा रहेको बताइन् । उनले निजीक्षेत्र निराश भइरहेको बेला सत्ता गठबन्धन परिवर्तन हुनु सकारात्मक भएको बताए ।

उनले कम्तीमा नयाँ सत्ता समीकरणले उच्च रूपमा गिरेको निजीक्षेत्रको मनोबललाई उकास्ने आशा रहेको बताए । न्युज एजेन्सी नेपालसँग कुरा गर्दै उनले वर्तमान सत्ता गठबन्धनले निजीक्षेत्रको आशालाई मर्न नदिने अवस्था देखिएको बताइन् । उनले अर्थतन्त्र शिथिल हुँदा उद्योगी व्यवसायीहरूमा मात्रै नभएर समग्र सर्वसाधारण मानिसहरूलाई समेत अप्ठ्यारो बनाएको भन्दै अर्थतन्त्रका समस्याहरू समाधान गर्न राज्यले पहल गर्ने आशा निजीक्षेत्रले लिएको बताए ।

प्रकाशित मिति: बुधबार, फागुन २३, २०८० १५:५१