प्रचण्ड-ओलीलाई जसपाको डर, गठबन्धन जोगाउन माधव नेपाललाई फकाउँदै

A+ A A-

जनता समाजवादी पार्टी, नेपाल सरकारमा जाने विषयमा अनिर्णित बनेको छ । सरकारका विषयमा निर्णय लिन बुधबार बिहान बोलाइएको केन्द्रीय कार्यकारिणी समितिको बैठकले सरकारमा सहभागी हुने/नहुने विषयमा निर्णय लिन नसकेको हो ।

बैठकमा सरकारमा सहभागी हुने/नहुने विषयमा नेताहरू दुई धारमा विभाजित भएको एक नेताले बताए । त्यसपछि बैठकले सरकारमा सहभागी हुने/नहुने विषयमा निर्णय गर्न सकेन । जसपा सरकारमा सहभागिताको विषयमा अनिर्णित बनेपछि नयाँ सत्ता गठबन्धन बनाएका प्रधानमन्त्री पुष्पकमल दाहाल प्रचण्ड र गठबन्धनको सबैभन्दा ठूलो दल नेकपा एमालेका अध्यक्ष केपी शर्मा ओली नेकपा एकीकृत समाजवादीलाई सरकारमा जसरी पनि ल्याउनुपर्ने दबाबमा छन् ।

जसपा सरकारमा सहभागी नहुँदा नयाँ गठबन्धन नै धरापमा पर्न सक्ने भएकाले प्रचण्ड-ओलीले नेपाललाई फकाउन लागेका हुन् । त्यसैले पनि प्रधानमन्त्री प्रचण्ड मंगलबार साँझ एमाले अध्यक्ष केपी शर्मा ओलीलाई लिए कोटेश्वरस्थित निवासमा नेपाललाई भेट्न पुगेका हुन् ।

नयाँ गठबन्धन बनाउन सहमत भएर जसपाले आठबुँदे सहमतिमा हस्ताक्षर गरेको छ । तर, प्रधानमन्त्री प्रचण्डले मन्त्रिपरिषद् पुनर्गठन गर्दा भने जसपाले मन्त्रीको नाम दिन सकेन । त्यति मात्रै होइन, त्यसपछि जसपा सरकारमा सहभागी हुने/नहुने निर्णयमा पुग्न सकेको छैन । कारण हो, सरकारमा सहभागी हुने/नहुने भन्ने विषयमा पार्टीभित्र दुई धार देखिनु । सरकारमा सहभागिताको निर्णय लिँदा पार्टी नै विभाजन हुन सक्ने त्रास अध्यक्ष यादवलाई छ ।

जसपाले निर्णय लिन ढिलो गरेपछि प्रधानमन्त्री प्रचण्ड र एमाले अध्यक्ष ओलीले नेकपा एसका अध्यक्ष नेपाललाई मनाउन थालेका छन् । जसपा सरकारमा सहभागी नहुने स्थिति बन्दा गठबन्धन नै धरापमा पर्ने भएकाले नेकपा एसलाई जसरी पनि सरकारमा ल्याउनै पर्ने दबाब प्रधानमन्त्री प्रचण्डमाथि छ ।

जसपाकै कारण मन्त्रालय भागवण्डा पनि अड्किएको नेताहरूले बताएका छन् । एमालेका एक पदाधिकारीका अनुसार जसपा सरकारमा सहभागी नहुँदा बहुमत नपुग्ने भएकाले सुरुमा नेकपा एसलाई फकाउनुपर्ने अवस्था सिर्जना भएको छ । 'गठबन्धन त बन्यो तर जसपा सरकारमा सहभागी नहुँदा धरापमा पर्ने देखिन्छ । त्यसैले माधव नेपालको पार्टीलाई मनाएर सरकारमा सहभागी गराउनुपर्छ भन्नेमा प्रधानमन्त्री प्रचण्ड र एमालेध अध्यक्ष ओली पुग्नुभएको छ,' ती पदाधिकारीले भने ।

सरकारमा सहभागी हुने दलहरू टुंगो नलागेकाले मन्त्रालयको भागवण्डा हुन नसकेको एमाले उपमहासचिव प्रदीप ज्ञवालीले बताए । ‘सत्ता गठबन्धनमा कुन-कुन दल सहभागी हुने भन्ने टुंगो लागेको छैन । त्यसैले अहिले कुन मन्त्रालय कसले लिने भन्ने छलफल भएको छैन,' उनले भने । प्रधानमन्त्री प्रचण्डले नयाँ सत्ता गठबन्धन बनाउँदा माओवादी केन्द्रसहित एमाले, रास्वपा र जसपाले साथ दिएका थिए । यी चार दलबीच आठबुँदे सहमतिमा पनि हस्ताक्षर भएको छ । तर, प्रतिनिधिसभामा १२ सिट रहेको जसपा भने सरकारमा जाने/नजाने विषयमा अनिर्णित रहेपछि नयाँ गठबन्धन बनेको तीन दिनसम्म मन्त्रालयको भागवण्डा टुंगो लाग्न सकेको छैन ।

प्रधानमन्त्री प्रचण्डले जनमत पार्टी र नागरिक उन्मुक्ति पार्टीसँग पनि छलफल गरिरहेका छन् । तर, दुवै दलले सरकारमा सहभागी हुनेबारेमा निर्णय गरिसकेका छैनन् । जनमत पार्टी र उन्मुक्ति पार्टी पनि केन्द्रमा सँगै प्रदेश सरकार बनाउन पनि निर्णायक छन् । उन्मुक्ति पार्टीलाई केन्द्र सरकारमा सहभागी गराउन नसक्दा सुदूरपश्चिममा नयाँ गठबन्धनको सरकार बन्न सक्दैन । नागरिक उन्मुक्ति पार्टीले सुदूरपश्चिम प्रदेशको मुख्यमन्त्री मागिरहेको छ । त्यसैले पनि केन्द्रसँगै प्रदेशको समीकरण मिलाउनुपर्ने दबाबमा प्रधानमन्त्री प्रचण्ड छन् ।

राप्रपालाई नयाँ सत्ता गठबन्धनले सरकारमा नल्याउने सुरुमै निर्णय गरेकाले गठबन्धन जोगाउन जसपालाई मनाउनै पर्छ । त्यसैले जसपा नआउँदा नेकपा एसलाई सरकारमा ल्याएर भए पनि सत्ता गठबन्धन बचाउनुपर्ने दबाब प्रचण्ड-ओलीलाई छ । तर, प्रधानमन्त्री प्रचण्डले नयाँ गठबन्धन बनाउँदा आफूलाई थाहा नै नदिएको भन्दै नेपाल रुष्ट बनेका छन् ।

कांग्रेस सभापति शेरबहादुर देउवाले नयाँ गठबन्धनको बहुमत पुग्न नदिन राजनीतिक सक्रियता देखाएका छन् । देउवाले बुधबार बिहान नेकपा एसका अध्यक्ष नेपाललाई भेटेर सरकारमा सहभागी हुन हतार नगर्न भनेका छन् । देउवाले प्रधानमन्त्री प्रचण्डले धोका दिएकाले सरकारमा सहभागी हुन हतार नगर्नसमेत नेपाललाई भनेका छन् । देउवाले नयाँ सत्ता गठबन्धनको बहुमत पुग्न नदिन सक्रियता देखाएपछि प्रधानमन्त्री प्रचण्ड झस्किएका छन् ।

प्रकाशित मिति: बुधबार, फागुन २३, २०८० १२:५९