वर्षमान अर्थमा लगभग पक्का, रविले गृहको दाबी छोडेनन्

A+ A A-

सत्ता गठबन्धनको अहिले जारी बैठकमा अर्थ मन्त्रालय माओवादीले पाउने सहमति जुटेको छ । माओवादीले अर्थ मन्त्रालय लिने भएपछि वर्षमान पुनलाई आज नै मन्त्रीको शपथ खुवाएर बजेटको प्रक्रिया अगाडि बढाउने तयारी थालिने स्रोतले बताएको छ ।

तर, गृह मन्त्रालयमा राष्ट्रिय स्वतन्त्र पार्टीका सभापति रवि लामिछानेले दाबी नछोडेकाले सहमति हुन सकेको छैन । बैठकमा दलहरूबीच मन्त्रिपरिषद् विस्तारको विषयमा छलफल भइरहेको छ । गृह मन्त्रालयमा एमाले र रास्वपाले दाबी नछोडेको बताइन्छ ।

प्रधानमन्त्रीले अर्थ मन्त्रालय आफूले राख्न चाहेकाले एमालेले पनि गृहमा दाबी गरिरहेको छ । सुरुमा एमालेले पनि अर्थ मन्त्रालयमा दाबी गरेको थियो । गृह मन्त्रालयका लागि सबैभन्दा बढी दाबी रास्वपाले गरेको छ ।

गत वर्ष पनि पहिला लामिछाने गृहमन्त्री बनेका थिए । तर, उनले छोटो समयमा नै राजीनामा दिनुपरेको थियो । त्यसपछि उनले सरकार नै छोडेका थिए । अहिले पनि प्रधानमन्त्रीले रास्वपा र एमालेलाई मिलेर जान आग्रह गरेको बताइन्छ ।

यदि गृहमन्त्री रवि लामिछाने वा एमालेले पाउने टुंगिएमा आजै शपथ हुने सम्भावना रहेको बताइन्छ । पौडेलले अर्थ र गृह मन्त्रालय पाए एमालेबाट सरकारको नेतृत्व गर्ने स्रोत बताउँछ । यदि अर्थ र गृह मन्त्रालय नपाए पौडेल सरकारमा सहभागी नहुने बताइन्छ ।

पुन र पौडेलले यो गठबन्धन बनाउन महत्त्वपूर्ण भूमिका खेलेका थिए । तर, गठबन्धनले मन्त्रालय भागवण्डा मिलाइसकेको छैन । उता गठबन्धन भत्काउन कांग्रेस नेताहरू सक्रिय रूपमा लागेका छन् । आजै बिहान कांग्रेस सभापति शेरबहादुर देउवा र रमेश लेखक नेकपा एकीकृत समाजवादीका अध्यक्ष भेट्न कोटेश्वर पुगेका थिए ।

प्रकाशित मिति: बुधबार, फागुन २३, २०८० १२:१८