सरोज यादव नेतृत्वको मधेश सरकार संकटमा, जनमतको दुवै हातमा लड्‌डु

A+ A A-

केन्द्रमा नयाँ सत्ता गठबन्धन बनेपछि त्यसको प्रभाव मधेश प्रदेश सरकारमा पर्ने भएको छ । सत्ता गठबन्धनबाट कांग्रेस बाहिरिएपछि नेकपा एमालेसहितका दलसँग मिलेर केन्द्रमा नयाँ सत्ता गठबन्धनको सरकार बनेपछि मधेश प्रदेशमा नयाँ शिराबाट सरकार गठन हुने भएको छ । नयाँ सत्ता गठबन्धनअनुसार मधेशमा नेकपा एमालेसहितका दलहरूको गठबन्धन सरकार हुने भएको छ ।

नयाँ सत्ता गठबन्धमा प्रधानमन्त्री पुष्पकमल दाहालले जनमत पार्टीलाई समावेश गर्ने प्रयास गरिरहेका छन् । तर, जनमतले सत्ता गठबन्धनमा सामेल हुनका लागि मुख्यमन्त्री पहिलो सर्त राखेपछि वर्तमान जसपाका नेता सरोजकुमार यादव नेतृत्वको सरकार संकटमा परेको छ ।

हुन त जनमतले सहयोग नगरेको खण्डमा पनि वर्तमानमा एमालेको २४, जसपाको १९, माओवादी केन्द्रको ९, नागरिक उन्नमुक्ति पार्टीको १, एक स्वतन्त्र वा रिजवान अन्सारी नेतृत्वको नेपाल संघीय समाजवादी पार्टीको एक सांसदको सहयोगमा सरकारका लागि आवश्यक पर्ने ५४ मत पुर्‍याएर सरकार बनाउन सक्छन् । प्रदेशसभामा सांसदहरूको संख्या १ सय ७ छ । नयाँ गठबन्धनको सरकार सरकार बनाउन दुई मत घटी हुन्छ ।

त्यसैगरी, विपक्षी दल बन्न पुगेका कांग्रेसको २३, जनमतको १३, लोसपाको ९ र नेकपा एकीकृत समाजवादी पार्टी ६ गरी ५२ मत हुन्छ । यी दलहरूलाई पनि सरकार बनाउन दुई मत मात्र अपुग हुने देखिन्छ । अर्थात् जनमत, लोसपा र नेकपा एसमध्ये कुनै पार्टी नयाँ सत्ता गठबन्धनमा सहभागी नभएको खण्डमा कांग्रेसले पनि सरकार गठनको तयारी गर्ने सम्भावना छ । यही गणितको फाइदा उठाउँदै जनमतले सरकारमा सहभागिताका लागि मुख्यमन्त्री पहिलो सर्त राखेको छ ।

जनमत पार्टीका उपाध्यक्ष तथा प्रदेश सांसद वसन्तकुमार कुशवाहाले भने जसपा नेतृत्वको वर्तमान सरकार भ्रष्टाचार र कमिसनमा लिप्त रहेकाले त्यसको नेतृत्वमा जनमत पार्टी सहभागी नहुने बताए । 'सरकारको रवैयाकै कारण हामी एक महिनाअघि सरकारबाट अलग भएका हौँ,' उनले भने, ‘तर अहिले फेरि उसैको नेतृत्वमा जाने कुरै आउँदैन । त्यस कारण हाम्रो पहिलो सर्त मुख्यमन्त्री हामीले पाउनुपर्छ भन्ने हो ।’

'विगतमा पनि जसपाले एक वर्ष, जनमतले २ वर्ष र कांग्रेसले २ वर्ष सरकारको नेतृत्व गर्ने भनेर गठबन्धनभित्र सहमति भएर सरकारमा सामेल भएका थियौँ,' उनले भने,‘ तर जसपा त्यो सहमतिअनुसार चलेन । त्यसैले पनि अब सरकारको नेतृत्व जनमतले पाउनुपर्छ ।’ हामीलाई सरकारको नेतृत्व नदिएको खण्डमा कांग्रेससँग मिलेर सरकार गठनको प्रयास गरिने उनले बताए । जनमतलाई नेतृत्व दिन कांग्रेस तयार रहेको उनले दाबी गरे ।

अहिले मधेश प्रदेशमा जसपाले नेतृत्व गरिरहेको सरकारलाई नेपाली कांग्रेस, लोसपा, नेकपा एससहितका दलको समर्थन छ । तर, केन्द्रमा नयाँ गठबन्धन बनेसँगै मधेश प्रदेशमा पनि अब नयाँ गठबन्धनका लागि आज छलफल हुने माओवादी केन्द्रका मधेश प्रदेशका संसदीय दलका नेता भरत साहले जानकारी दिए ।

नयाँ सत्ता गठबन्धन बनेपछि नयाँ शिराबाट प्रदेश सरकार गठन हुने साहले बताए । उनले भने, ‘मधेश प्रदेशमा अब कुन पार्टीको मुख्यमन्त्री हुने भन्ने विषयमा छलफल हुन बाँकी नै छ । आज प्रदेश सरकारबाट केन्द्रमा छलफल भएपछि मात्रै नयाँ शिराबाट सरकार गठनको विषयमा छलफल हुन्छ ।’ जनमत, लोसपा र नेकपा एसमध्ये कुनै एक दललाई पनि सहभागी नगराएको खण्डमा नयाँ सरकार गठनमा कठिनाइ हुन सक्ने उनको भनाइ छ ।

जसपाले पछिल्लो ६ वर्षदेखि मधेश प्रदेश सरकारको नेतृत्व गर्दै आएको बताउँदै नेता साहले भने, ‘अब जसपाले सरकारको नेतृत्व छोडेर अन्य पार्टीलाई दिनुपर्छ । गठबन्धनमा विगतमा भएको सहमतिअनुसार आलोपालो सरकारको नेतृत्व पाउनुपर्छ ।’ तर जसपाले तत्काल मधेश प्रदेश सरकारको नेतृत्व नछोडने अडानमा देखिन्छ ।

प्रकाशित मिति: मंगलबार, फागुन २२, २०८० १३:०६