कर्णालीमा कांग्रेसबाट आजित बनेको माओवादीलाई हाई सञ्चो

A+ A A-

केन्द्रमा नेकपा माओवादी केन्द्र र नेकपा एमालेलगायतका दलहरूबीच नयाँ गठबन्धन बनेपछि कर्णालीमा माओवादीलाई हाई सञ्चो भएको छ । पछिल्ला केही महिनायता प्रदेश सरकार सञ्चालनका विषयमा बारम्बार असन्तुष्टि जनाउँदै आएको कांग्रेस सरकारबाट बाहिरिने भएपछि माओवादीलाई हाई सञ्चो भएको हो ।

कर्णालीमा कांग्रेसले माओवादी नेतृत्वको सरकार आफूखुसी चल्न थालेको भन्दै सरकारबाट बाहिरिने चेतावनी दिँदै आएको थियो । गत मंसिर ४ यता नेपाली कांग्रेस र माओवादीबीच खटपट सुरु भएको थियो ।

नेपाली कांग्रेसले माओवादीलाई जसरी पनि प्रदेश अस्पताल सुर्खेतलाई स्वास्थ्य विज्ञान प्रतिष्ठान बनाउनका लागि तत्काल विधेयक ल्याउन दबाब दिएको थियो । तर, माओवादीले स्वास्थ्य विज्ञान प्रतिष्ठान बनाउनका लागि प्रदेश सरकारले खर्च धान्न नसक्ने र यदि बनाउनैपर्ने अवस्थामा संघीय सरकारसँग समन्वय गरेर प्रतिष्ठान बनाउनुपर्ने अडान लिँदै आएको थियो ।

त्यस्तै, माओवादीले कर्णाली प्रदेशमा सञ्चार क्षेत्र हेर्ने आधिकारिक निकाय सञ्चार प्रष्ठिान बनाउन चाहे पनि कांग्रेसले असहयोग गरेको थियो । प्रदेश अस्पताललाई स्वास्थ्य विज्ञान प्रतिष्ठान बनाउनका लागि कांग्रेसले आन्तरिक मामिला तथा कानुन मन्त्रालयलाई सहमति दिइसकेको थियो । तर, माओवादीले आमसञ्चार प्रतिष्ठान गठनका लागि दुई/दुईपटक सहमति माग गर्दा पनि आर्थिक मामिला तथा कानुन मन्त्रालयले सहमति दिएको थिएन । जसका कारण माओवादी र कांग्रेसबीचको सम्बन्ध टाढिएको थियो ।

केन्द्रमा गठबन्धन फेरिएसँगै कांग्रेस सरकारबाट बाहिरिए पनि माओवादीको नेतृत्व भने कर्णालीमा फेरिने छैन । सोमबार नयाँ बनेको सत्ता गठबन्धनको बैठकले आलोपालोमा नेपाली कांग्रेसले नेतृत्व गरेका प्रदेश एमालेलाई दिने तथा माओवादीले नेतृत्व गरेका प्रदेशमा यथावत् रहने गरी सहमति भएको छ । जसअनुसार नेपाली कांग्रेस नेतृत्वका गण्डकी, लुम्बिनी र सुदूरपश्चिम प्रदेशमा एमाले नेतृत्वको सरकार बन्नेछ भने कर्णाली र बागमतीमा वर्तमान माओवादीकै नेतृत्व रहनेछ । कर्णालीमा एमाले र माओवादी मिल्दा बहुमतको सरकार बन्छ ।