नयाँ गठबन्धनमा तीन उपप्रधानमन्त्री, रवि मिलाउने जिम्मा ओलीलाई

A+ A A-

नयाँ गठबन्धन सरकारमा तीन जना उपप्रधानमन्त्री बनाउने सहमति भएको छ । नेकपा माओवादीका उपमहासचिव वर्षमान पुन पहिलो पटक उपप्रधान तथा अर्थमन्त्री बन्दै छन् । त्यस्तै एमालेका विष्णु पौडेल उपप्रधान तथा गृहमन्त्री बन्ने सहमति भएको छ ।

त्यस्तै राष्ट्रिय स्वतन्त्र पार्टीका सभापति रवि लामिछान दोस्रो पटक उपप्रधानमन्त्री बन्दै छन् । लामिछानेले गृहमन्त्रीमा दाबी गरेपछि यसको जिम्मा गठबन्धनले एमाले अध्यक्ष केपी शर्मा ओलीलाई दिएको छ ।

यदि रविले गृहमन्त्री नै मागेमा एमालेका विष्णु पौडेलको मन्त्रालय परिवर्तन हुने स्रोतले बतायाे । तर, सकेसम्म गठबन्धनमा ओली र प्रधानमन्त्री पुष्पकमल दाहाल प्रचण्डले लामिछानेलाई गृहमन्त्री नदिने रणनीति अपनाएको स्रोतले बतायाे ।

स्रोतले भन्याे, ‘रविले गृहमन्त्री नै माग्नुभएकाे छ । तर, सकेसम्म अर्थ माओवादी र गृह एमालेले राख्न चाहेको छ । त्यही भएर अन्यमा रविलाई रोजेको मन्त्रालय दिने तयारी भएको छ ।’

लामिछानेलाई भौतिक योजना तथा यातायात अथवा ऊर्जा तथा जलस्रोत मन्त्रालय दिने रणनीतिमा ओली रहेका बताइन्छ ।

कांग्रेससँग गठनबन्धन टुटेपछि आजै नयाँ गठबन्धन बनेको हाे । नयाँ गठबन्धनमा पावर शेयरिङबारे खाका बनाउन चार सदस्यीय कार्यदल गठन गरिएको छ । तर, रवि मिलाउने जिम्मा भने कार्यदललाई नभएर एमाले अध्यक्ष ओलीलाई दिइएको एक नेताले बताए ।

कार्यदलमा एमालेबाट विष्णु पौडेल, माओवादीबाट वर्षमान पुन, रास्वपाबाट रवि लामिछाने र जसपाबाट उपेन्द्र यादव रहेका छन् । नयाँ गठबन्धन बनेसँगै एमाले र रास्वपा सरकारमा सहभागी भएका छन् । आजै तीन दलका तीन जना मन्त्रीले शपथ लिन लागेका छन् ।

प्रकाशित मिति: सोमबार, फागुन २१, २०८० १७:३६