एकै परिवारका तीन सदस्यका चार पुस्तक एकैपटक विमाेचित

A+ A A-

एक १२ वर्षीय बालक जो नेपाललाई अरु देशले उदाहरणका रूपमा लिनसक्ने बनाउनका निम्ति कसरी के गरेर अगाडि बढ्नु पर्दछ भन्ने सपना बोकेर पुस्तक लेख्छन् । नेपालका विशिष्ट व्यक्तिहरूले नेपाललाई स्वीजरल्याड, जापान, सिङ्गापुर जस्तो बनाउँछौँ भन्दै दिएका मन्तव्यहरूबाट कलिलो मानसिकतामा आफ्नै पहिचानसँग जोडेर विश्वको नमुना देश बनाउने चाहना बोकेर नेपाललाई नेपाल नै बनाउने चाहना आफ्ना कृतिहरूमार्फत प्रस्तुत गरेका छन् ।

ज्ञानकुञ्ज माध्यमिक विद्यालयमा कक्षा ७ मा अध्ययनरत १२ वर्षीय बालकले राष्ट्र र राष्ट्रियताप्रतिको भाव पुस्तकमा प्रकट गरेका छन् । अर्को पुस्तक कोभिड महामारीका बेलामा उनले रचना गरेका विभिन्न कथा, कविता, निबन्ध र लेखहरूका सङ्ग्रह मेरा बाल सिर्जनाहरू मार्फत प्रस्तुत गरेका छन् ।

यसैगरी, दशक लामाे सशस्त्र द्वन्द्वले बालबालिकामा परेका प्रभावका विषय र बालबालिका तथा किशोरकिशोरीका विभिन्न पीडादायक यथार्त घटनासँग सम्बन्धित रहेर डा.देवकी आचार्यद्वारा रचना गरिएका १८ वटा कथाहरू सङ्ग्रहित गरी ‘निलीमा र क्यामेरा’ कथासङ्ग्रह प्रकाशन गरिएको छ ।

त्यस्तै, नेपालमा बाल सहभागिताको उठान र बालक्लबको सुरुवातदेखि अहिलेसम्मको ऐतिहासिक पृष्ठभूमिमा रहेर तिलोत्तम पौडेलद्वारा लिखित ‘बाल सहभागिता र बालक्लब’ नामक पुस्तक सहित चारवटा पुस्तक संयुक्त रूपमा विमोचन गरिएको छ । लेखकहरू एकै परिवारका सदस्य हुन् ।

उनीहरूका चार पुस्तक शनिबार एकैसाथ विमोचन भएका छन् । पूर्वपरराष्ट्रमन्त्री प्रदीप ज्ञवालीले बालकले लेखेका किताबले नेपाललाई नेपाल कसरी बनाउन सकिन्छ भनेर लागिरहेका व्यक्तित्वहरूलाई समेत मार्गदर्शन गरेको बताए ।

नेपाल संस्कृत विश्वविद्यालयका उपकुलपति प्रा.डा. यादवप्रकाश लामिछानेले बालक त्रिदेवको आख्यानात्मक विशेषता राम्रो रहेको भन्दै अझै खारिँदै जान शुभकामना दिए । त्यस्तै, ‘नीलिमा र क्यामेरा’ कथासङ्ग्रहाबारे प्रा.डा. दयाराम श्रेष्ठले चर्चा गरेका थिए ।

प्रकाशित मिति: सोमबार, फागुन २१, २०८० ११:४४