प्रचण्डको ब्रिफिङ : कांग्रेसले डामिएका मन्त्री हटाउन दिएन, अर्थमन्त्रीले पटक्कै भनेकाे मानेनन्

प्रचण्डको ब्रिफिङ : कांग्रेसले डामिएका मन्त्री हटाउन दिएन, अर्थमन्त्रीले पटक्कै भनेकाे मानेनन्

फाइल तस्वीर

A+ A A-

प्रधानमन्त्री तथा माओवादी केन्द्रका अध्यक्ष पुष्पकमल दाहाल प्रचण्डले पार्टीको पदाधिकारी बैठकमा कांग्रेसले अख्तियारले बयान लिएका मन्त्रीलाई हटाउन नदिँदा गठबन्धन तोड्नुपर्ने बाध्यता आइलागेको बताएका छन् ।

सोमबार बिहान बसेको पदाधिकारी बैठकमा प्रचण्डले अर्थमन्त्री प्रकाशशरण महतले आफूले भनेको नमानेका कारण गठबन्धन तोड्नुपर्ने भएको ब्रिफिङ गरेको माओवादी सचिव गणेश साहले बताए । उनले प्रधानमन्त्रीको भनाइ भन्दै भने, ‘अर्थमन्त्रीले आफूले भनेको पटक्कै नमान्दा अर्थतन्त्रमा सोचजति आशा जगाउन सकिएन । जसका कारण जनतामा निराशा थपिन थाल्यो । कांग्रेसले सहयोग नगर्दा उता एमालेले वाम गठबन्धन होइन, एकताको तयारी साथ जाऊँ भन्ने प्रस्ताव गरेका छन् । अब कांग्रेससँग अगाडि जान सकिँदैन ।’

प्रचण्डले बैठकमा कांग्रेसले सहयोग नगरेको र महासमिति बैठकमा माओवादी जनयुद्धलाई नचाहिँदो भनेको गुनासाे पनि गरेका छन् । कांग्रेसले कोशीमा सरकार बनाउँदा धोका दिएकाे र पछि राष्ट्रियसभामा पनि धोका दिएकाे गुनासाे प्रचण्डले सुनाएका थिए । अब वामपन्थी मिलेर जानुपर्छ भन्ने भएर नै याे वातावरण बनाइएको प्रचण्डले बताएकाे माओवादी केन्द्रका सचिव देवेन्द्र पौडेलले बताए ।

प्रचण्डको भनाइ भन्दै पोडेलले भने, ‘यताबाट हिँड्दा पनि रिस्क छ । अर्को बाटो हिँड्दा पनि रिस्क छ । एक बाटो रोज्नु नै पर्‍यो । त्यही भएर अर्को बाटोभन्दा वामपन्थी बाटो तुलनात्मक रूपमा सुरक्षित छ । सरकारमा भए पनि सजिलो छ । सडकमा गए पनि सहज छ । अर्थमन्त्रीले सहयोग नगर्दा झन् अप्ठेरो भयो । कांग्रेसले सुरुबाट नै सरकार आफ्नो हो भन्ने सन्देश दिएन ।’

एमालेले वामपन्थी मिलेर जानुपर्छ भन्ने प्रस्ताव गरेकाले यो बाटो हिँड्न तयार भएको प्रचण्डले बैठकमा ब्रिफिङ गरेका थिए । कांग्रेसको एक पक्ष सरकारमा हुने र अर्को पक्षले सरकारको र प्रधानमन्त्रीको खेदो खन्ने काम गरेकाे गुनासाे पनि प्रचण्डले सुनाएका थिए । अन्तिममा आएर शान्ति प्रक्रियामा पनि अत्तो थाप्ने काम गरेको भन्दै प्रचण्डले पार्टी बैठकमा कांग्रेसप्रति गुनासो गरेका पौडेलले बताए ।

सरकारमा कांग्रेसका मन्त्रीहरूको कार्यक्षमता देखिएन भनेर लामो समयदेखि आलोचना भइरहेको थियो । सरकार माओवादीको जस्ताे मात्र भयो भनेर कांग्रेसको संस्थापनइतर समूहले प्रधानमन्त्री र मन्त्रीको चर्को आलोचना गर्दै आएकाे थियाे । गृहमन्त्री फेर्न कांग्रेसले प्रधानमन्त्रीलाई दबाब दिँदै आएकाे थियाे । तर, प्रधानमन्त्री प्रचण्ड गृहमन्त्री होइन अर्थमन्त्री फर्न चाहन्थे ।

कांग्रेस भने अर्थमन्त्रीले देशमा श्रीलंकाको अवस्था आउनबाट जोगाएको भन्दै हटाउन नदिँदा प्रधानमन्त्री प्रचण्डले दबाबमा सरकार चलाउनुपरेको बैठकमा बताएका साहले बताए । साहले भने, ‘प्रधानमन्त्रीले स्थायी समितिको बैठकमा नै कांग्रेसले धोका दिएको र नयाँ तरिकाले सोच्नुपर्ने अवस्था आउन सक्छ भन्ने तरिकाले ब्रिफिङ गर्नुभएको थियो । सरकार सञ्चालनमा कांग्रेसका कारण असहज भएपछि वाम गठबन्धन बनेको हो । यो गठबन्धनको भविष्य पनि ठीक छ । हामी इमान्दार हुँदा पनि कांग्रेसले धोका दियो ।’

प्रकाशित मिति: सोमबार, फागुन २१, २०८० १४:३४