युनिक्याम्पस ग्लोबलको महाराजगञ्ज शाखा उद्घाटन

A+ A A-

युनिक्याम्पस ग्लोबलले महाराजगन्जस्थित पानीपोखरीमा नयाँ शाखा विस्तार गरेको छ । युनिक्याम्पस ग्लोबलका प्रबन्ध निर्देशक विज्ञान श्रेष्ठले आज नयाँ शाखाको उद्घाटन गरेका हुन् ।

उच्च शिक्षा अध्ययनका लागि विदेश जाने योजना बनाएका विद्यार्थीलाई थप सहजता प्रदान गर्ने उद्देश्यले युनिक्याम्पसले आइतबारबाट नयाँ शाखा सञ्चालनमा ल्याएको हो ।

बूढानीलकण्ठ, टोखा, चक्रपथ, सामाखुसी, गोंगबु, लाजिम्पाटलगायत क्षेत्रका विद्यार्थीको सहजतालाई ध्यानमा राखेर नयाँ शाखा सञ्चालनमा ल्याइएको युनिक्याम्पसले जनाएको छ । कोरोनाकालमा केही शाखा बन्द गर्नुपरेको जानकारी दिँदै युनिक्याम्पस ग्लोबलका प्रबन्ध निर्देशक श्रेष्ठले कोरोनाको प्रभाव कम हुँदै गएपछि नयाँ शाखाहरू विस्तार गरेको बताए ।

उच्च शिक्षा अध्ययन गर्न विदेश जान चाहने विद्यार्थीलाई आवश्यक सूचना लिन सहज होस् भन्ने उद्देश्यले शाखा विस्तार गरेको उनको भनाइ छ । नेपाली विद्यार्थीले धेरैभन्दा धेरै छात्रवृत्ति प्राप्त गरेर उच्च शिक्षा अध्ययनका लागि जाओस् भन्ने युनिक्याम्पसको चाहना हुने गरेका जानकारी दिँदै श्रेष्ठले नयाँ शाखाले पनि उक्त कुरालाई पहिलो प्राथमिकतामा राख्ने बताए ।

उनले एक वा दुई वर्ष नेपालमै अध्ययन गरेर पनि कोर्स क्रेडिट ट्रान्फरमार्फत विद्यार्थीले कम शुल्कमा अस्ट्रेलियाबाट आफ्नो अध्ययनलाई पूरा गर्न सक्ने बताए । त्यसका लागि विद्यार्थीले काठमाडौंको डिल्लीबजारस्थित सफ्टवेरिका कलेज अफ आइटी एन्ड ई-कमर्स र मैतिदेवीस्थित सनवे कलेजमा पहिलो वा दोस्रो वर्ष अध्ययन गरेर अस्ट्रेलिया जान सक्छन् ।

परामर्श लिन विद्यार्थीहरूलाई पुतलीसडकसम्म आउनुपर्ने बाध्यताको अन्त्य गर्न शाखा विस्तार गरेको युनिक्याम्पस ग्लोबालका सीईओ घनश्याम घिमिरेले जानकारी दिए । विद्यार्थीले शैक्षिक परामर्श लिन आउँदा विभिन्न समस्या भोग्नुपर्ने अवस्थालाई देखेर विद्यार्थी अनुकूल हुने गरी शाखा विस्तार गरेको उनले बताए । सन् २०२५ सम्ममा काठमाडौं उपत्यकाभित्र थप दुईदेखि तीनवटा शाखा विस्तार गर्ने योजना रहेको समेत उनले जानकारी दिए ।

युनिक्याम्पस ग्लोबल पानी पोखरी शाखाका निर्देशक मिङमार तामाङले जहाँ विद्यार्थी त्यहीँ सेवा भन्ने उद्देश्यले शाखा विस्तार गरेको जानकारी दिए । आगामी एक साताभित्र आउने विद्यार्थीले ९ सय ९९ रुपैयाँमै आईईएलटीएस, पीटीईका पूरा कक्षाहरू लिन सक्ने बताए । सोही पैसामा विद्यार्थीले सम्पूर्ण परामर्श प्राप्त गर्न सक्ने उनको भनाइ छ । अस्ट्रेलियन एजुकेसनका लागि युनिक्याम्पस ब्रान्डका रूपमा स्थापित भइसकेका कारण उच्च शिक्षा अध्ययनका लागि बुझ्न यहाँ आउने विद्यार्थीले सही र सत्य जानकारी प्राप्त गर्न सक्ने उनले बताए ।

करिब २२ वर्षदेखि शैक्षिक परामर्श सेवा दिँदै आएको युनिक्यापसले यसअघि नयाँ बानेश्वर र कुमारीपाटीमा समेत शाखा विस्तार गरिसकेको छ । पुतलीसडकमा केन्द्रीय कार्यालय रहेको युनिक्याम्पसले काठमाडौं उपत्यकाबाहिर बुटवल, पोखरा, भरतपुरलगायत स्थानहरूमा पनि शाखा विस्तार गरिसकेको छ ।

विशेष गरी अस्ट्रेलिया अध्ययन गर्न जाने नेपाली विद्यार्थी केन्द्रमा राखेर काम गर्ने युनिक्याम्पसले अमेरिका, बेलायत, क्यानडा र न्युजिल्यान्डलगायतका देशमा जान चाहने विद्यार्थीलाई समेत परामर्श दिँदै आएको छ ।

प्रकाशित मिति: सोमबार, फागुन २१, २०८० १३:२५