त्रिवि पदाधिकारीमा भागवण्डाकाे प्रयास, रोक्न सक्लान् उपकुलपति बराल ?

A+ A A-

केदारभक्त माथेमाले ०४९ सालमा त्रिभुवन विश्वविद्यालयको उपकुलपति हुने बेलामा तत्कालीन प्रधानमन्त्री तथा कुलपति गिरिजाप्रसाद कोइरालासमक्ष तीनवटा सर्त राखेका थिए । एक, आफूले टीम बनाउन पाउनुपर्ने । दुई, राजनीतिक हस्तक्षेप गर्न नहुने । तीन, आवश्यक सहयोग गर्नुपर्ने ।

पञ्चायतपछि जनआन्दोलनको रापतापमा प्रजातन्त्रवादीहरूको तर्फबाट उपकुलपति हुन लागेका माथेमाका सर्तलाई प्रधानमन्त्री कोइरालाले स्वीकार गरे । अनि, माथेमा उपकुलपति हुन राजी भए । त्रिभुवन विश्वविद्यालयबाट कुनै बेला निकालिएका माथेमा उपकुलपति हुँदै गर्दा निकै शक्तिशाली भएर गएका थिए । त्यसको प्रभाव देखिएको पनि थियो । उनले आफ्नो रुचीअनुसार रजिष्ट्रार र रेक्टर नियुक्त गरे । अनि, विभागीय प्रमुखहरू पनि माथेमाले आफ्नो अनुकूलतामा क्षमताअनुसार जिम्मेवारी दिए ।

त्यतिबेलाका माथेमाका सर्त सम्झाउने गरी भर्खरै नियुक्त भएका उपकुलपति केशरजंग बरालले पनि टीम बनाउन पाउनुपर्ने बताएका छन् । अर्थात, रेक्टर, रजिष्टरलगायतका पदहरू राजनीतिक भागवण्डाभन्दा पनि उपकुलपतिको योजनालाई सहयोग गर्ने टीम बनाउन पाउनुपर्ने बरालको सर्त छ । बरालले त्यो सर्त प्रधानमन्त्री तथा कुलपति पुष्पकमल दाहाल प्रचण्डसमक्ष राखेका कि राखेनन् ? भन्ने प्रष्ट छैन । यद्यपि, राजनीतिक दलनिकट कर्मचारीहरूका संगठनका नेताहरू स्वागत र बधाईका लागि उपकलपति बरालसमक्ष पुग्दा नियम बाहिरका सर्त लिएर नआउन चाहिँ भनेका छन् । त्यसैले, तुलनात्मक रुपमा आत्मबलसहित बरालले त्रिविको उपकुलपतिको कुर्सी सम्हाल्न पुगेको चाहिँ देखिन्छ ।

तर, उपकुलपतिमा बराल नियुक्त भएको साता दिन नपुग्दै भागवण्डाको गन्ध भने त्रिविमा आउन थालेको छ । त्रिविका प्राध्यापकहरूकाअनुसार अहिले रेक्टर, रजिष्ट्रार र त्रिवि सेवा आयोगको रिक्त एक सदस्य पदमा भागवण्डाको प्रयास हुन थालेको छ । सेवा आयोगको अध्यक्षमा करिब एक वर्षअघि कांग्रेसको कोटाबाट नियुक्त भएका छन् । त्यति नै बेलादेखि रिक्त सदस्यमा भने नियुक्ति हुन सकेको छैन । सदस्यमा माओवादीले दाबी गरिरहेको छ ।

त्यसैगरी, रेक्टर र रजिष्ट्रारमा पनि कांग्रेसले नजर लगाएको छ । स्रोतका अनुसार अहिले कांग्रेसनिकट प्राध्यापकहरूले रजिष्ट्रारमा नजर लगाएका छन् । उपकुलपतिपछि सबैभन्दा बढी शक्तिशाली पद हो रजिष्ट्रार । आर्थिक र प्रशासनिक शक्ति रजिष्ट्रारमा रहेको छ । सोहीकारण उक्त पदमा कांग्रेसनिकट प्राध्यापकले लविङ बढाएका छन् ।

त्यसो त, एकीकृत समाजवादीनिकट प्राध्यापकहरूले पनि भाग खोज्ने संकेत गरेका छन् । हुनलाई पहिला नै सेवा आयोगको अध्यक्षमा दाबी गरेको एकीकृत समाजवादीले अहिलेसम्म केही पनि पाएको छैन । सोहीकारण उनले अहिले भाग खोजेको हो । रेक्टर शिवलाल भुसालको कार्यकाल भने केही समय बाँकी रहेको छ ।

प्रकाशित मिति: शुक्रबार, फागुन १८, २०८० २०:२४