कर्णालीकाे एक स्थानीय तहमा अझै बैंक पुगेनन्

A+ A A-

कर्णाली प्रदेशकाे एउटा स्थानीय तहमा अझैसम्म वाणिज्य बैंकहरू पुग्न सकेका छैनन् । नेपाल राष्ट्र बैंकको तथ्यांकअनुसार कर्णालीका जम्मा ७९ वटा स्थानीय तहमध्ये एउटामा वाणिज्य बैंकको शाखा पुग्न नसकेको हो ।

राष्ट्र बैंकका अनुसार कर्णाली प्रदेशमा २०७६ असारमा ५ वटा स्थानीय तहमा वाणिज्य बैंक नपुगेकोमा अहिले त्यो संख्या घटेर एक स्थानीय तहमा मात्र बैंकका शाखा पुग्न नसकेका हुन् । अब यो आर्थिक वर्षभित्रमा यस प्रदेशका सबै स्थानीय तहमा बैंकका शाखा पुगिसक्ने नेपाल राष्ट्र बैंकको भनाइ छ ।

कर्णाली प्रदेशको बैंक नपुगेको कालिकोटको महावै गाउँपालिमा कृषि विकास बैंकले चार दिनअघि नै आफ्नो शाखा खोलिसकेको नेपाल राष्ट्र बैंक शाखा कार्यालय नेपालगञ्जले जनाएको छ ।

जाजरकोटको जुनिचाँदे गाउँपालिकामा केन्द्रको विषयमा भएको विवादका कारणले बैंक स्थापना हुन नसकेको र कृषि विकास बैंक अहिले पनि जान तयार रहेको नेपाल राष्ट्र बैंक नेपालगञ्जका प्रमुख मुक्ति सापकोटाले बताए । ‘कर्णाली प्रदेशका अरु सबै स्थानीय तहमा बैंकको स्थापना भइसकेको छ,’ उनले भने, ‘जुनिचाँदे गाउँपालिकाको केन्द्रका विषयमा विवादको समस्याका भएको छ ।’

जाजरकोट जुनिचाँदे गाउँपालिकाका अध्यक्ष कृष्णबहादुर केसीले बैंकको स्थापना नहुँदा समस्या भएको बताए । ‘अहिले पनि बैंकको स्थापना भएको छैन,’ उनले भने, ‘बैंकिङ कारोबार गर्नका लागि सदरमुकाम नै धाउनुपर्ने बाध्यता छ ।’

केन्द्रका विषयमा गाउँपालिकाको दुईतिहाइ बहुमतले पारित गरेको लुहादहमा बैंकको स्थापना गर्न भनेको तर बैंकले अहिलेसम्म पनि शाखा स्थापना नगरेको गाउँपालिका अध्यक्ष केसीले बताए । ‘कृषि विकास बैंकको शाखा स्थापना गर्ने कुरा थियो,’ उनले भने, ‘विवाद भए पनि गाउँपालिकाको दुई तिहाइले केन्द्रको स्थापना गर्ने स्थानमा बैंकको शाखा खोल्नुहोस् भनेका छौं । उहाँहरूले अहिलेसम्म खोल्नुभएको छैन ।’

प्रकाशित मिति: बिहीबार, असोज ३०, २०७६ १८:१६