त्रिकोणात्मक टी-२० सिरिजः जित्नैपर्ने दबाबका बीच नामिबियाविरुद्ध मैदानमा उत्रँदै नेपाल

त्रिकोणात्मक टी-२० सिरिजः जित्नैपर्ने दबाबका बीच नामिबियाविरुद्ध मैदानमा उत्रँदै नेपाल

A+ A A-

नेपाल, नामिबिया र नेदरल्यान्ड्सबीचको जारी टी-२० अन्तर्राष्ट्रिय त्रिकोणात्मक सिरिजअन्तर्गत नेपालले आज नामिबियाको सामना गर्दैछ । फाइनलमा स्थान बनाउनका लागि जित्नैपर्ने दबाबका बीच आज टीयू क्रिकेट मैदानमा उत्रनेछ ।

नेपालले हालसम्म खेलेका २ खेलमा हार व्यहोरेको छ । त्यस्तै नेदरल्यान्ड्सले दुवै खेल जितेको छ भने नामिबियाले एकमा जित निकाल्दै एक खेलमा पराजित भएको छ । पहिलो खेलमा नामिबियासँग पराजित भएको नेपाल दोस्रो खेलमा नेदरल्यान्ड्ससँग पराजित भएको थियो । उता नामिबियाले नेपाललाई पारजित गर्दा नेदरल्यान्ड्ससँग पराजित भएको थियो ।

लगातार दुई जितपछि डच टिम चार अंकका साथ शीर्षस्थानमा छ । दुईमध्ये एक खेल जितेको नामिबिया २ अंकका साथ दोस्रो स्थानमा छ । लगातार दुई खेल हारेको नेपाल भने अंकविहीन छ ।

अंक तालिकाका शीर्ष दुई टिमबीच उपाधिका लागि फाइनल खेल हुनेछ । यो सिरिजमा तीन टिमले एकअर्काबीच दुई/दुई खेल खेल्नेछन् । बिहीबारसम्म तीनै टिमले दुई/दुई खेल खेलिसकेका छन् भने अब दुई/दुई खेल हुन बाँकी छ ।

नेपालले एक खेल शुक्रबार नामिबियासँग खेल्नेछ भने अर्को खेल शनिबार नेदरल्यान्ड्ससँग खेल्नेछ । यस्तै, आइतबार नामिबिया र नेदरल्यान्ड्सबीच लिग चरणको अन्तिम खेल हुनेछ । यो खेलपछि अंक तालिकाको शीर्ष दुईमा रहने टिम फाइनल पुग्नेछन् ।

बिहीबारको खेल नतिजापछि तीनै टिमको फाइनल पुग्ने सम्भावना कायम छ । तर, यसमा सबैभन्दा कमजोर अवस्था नेपालको छ । अब बाँकी रहेका दुवै खेलमा नेपाल विजयी हुने हो भने नेपाल फाइनल पुग्न सक्छ ।

नेपालले दुवै खेल जित्ने र नाबियाले एक खेल जित्ने अवस्था हुनु भनेको नेदरल्यान्ड्सले दुवै खेल हार्नु हो । यस्तो भएमा तीनै टिमको समान ४ अंक हुनेछ । त्यस्तो बेला नेट रनरेटका आधारमा दुई टिम फाइनल पुग्नेछन् ।

उता नामिबियाले दुवै खेल जित्यो भने नेपालको फाइनल यात्रामा पूर्णविराम लाग्नेछ । किनकि त्यस्तो बेला नेपालले एक मात्र खेल जित्ने अवस्था आउँछ ।

नेपाल फाइनल पुग्न दुईवटा समीकरण छन् । एक नेपालले रन रेटसुधार गर्दै नामिबियालाई हराउने र नेदरल्यान्ड्सले पनि नामिबियालाई हराउने । यो समीकरणमा नेपाल नेदरल्यान्ड्ससँग पराजित भए पनि दुई अंकका साथ फाइनल पुग्न सक्छ ।

दुई नेपालले बाँकी दुवै खेल जित्ने र रनरेट सुधार गर्ने । यो समीकरणमा पनि नेपाल फाइनल पुग्न सक्छ । यो समीकरणमा नेदरल्यान्ड्सले नामिबियालाई पराजित गरे नेपाललाई रनरेटको आवश्यकता पर्ने छैन । किनकि नेपालको चार अंक हुन्छ भने नामिबिया दुई र नेदरल्यान्ड्सको ६ अंक हुन्छ । तर, नामिबियाले नेदरल्यान्ड्सलाई हरायो भने रनरेट निर्णायक हुनेछ ।

प्रकाशित मिति: शुक्रबार, फागुन १८, २०८० ०७:०२