मुसा मसला एन्ड वाङ्चुक पिक ओपन लिड क्लाइम्बिङ प्रतियोगिता फागुनको अन्तिममा हुने

मुसा मसला एन्ड वाङ्चुक पिक ओपन लिड क्लाइम्बिङ प्रतियोगिता फागुनको अन्तिममा हुने

A+ A A-

काठमाडौं स्पोर्ट क्लाइम्बिङ सेन्टरको आयोजनामा यही फागुन २६ गते 'मुसा मसला एन्ड वाङ्चुक पिक ओपन लिड क्लाइम्बिङ च्याम्पियनसिप २०२४' हुने भएको छ ।

आयोजकले बिहीबार पत्रकार सम्मेलन गर्दै उक्त प्रतियोगिता काठमाडौं महानगरपालिका– १६, कालधारा पकनाजोलस्थित काठमाडौं स्पोर्ट क्लाइम्बिङ सेन्टरमा सञ्चालन हुने जानकारी दिएका हुन् ।

खुल्ला प्रतियोगिता भएाकाले १४ वर्षभन्दा माथिका राष्ट्रिय तथा अन्तर्राष्ट्रिय खेलाडीहरूले यस प्रतियोगितामा भाग लिन सक्ने काठमाडौं स्पोर्ट क्लाइम्बिङ सेन्टरका प्रबन्ध निर्देशक प्रनिलमान श्रेष्ठले बताए ।

आयोजकका अनुसार, प्रतियोगिता अन्तर्राष्ट्रिय महासंघ (आईएफएससी) द्वारा प्रतिपादित नियम र मापदण्डअनुसार संचालन गरिनेछ । प्रतियोगितामा महिला तथा पुरुष गरी अनुमानित ५० जना खेलाडीहरू सहभागी हुनेछन् ।

स्पोर्ट क्लाइम्बिङमा मुख्य गरी बोल्डरिङ, लिड र स्पिड गरी तीन विधा हुने भए पनि अन्तर्राष्ट्रिय नियमअनुसार नै यसपटक लिड प्रतियोगिता गर्न लागिएको श्रेष्ठले जानकारी दिए । यस प्रतियोगितालाई नेपालको राष्ट्रिय खेल संघको रूपमा रहेको नेपाल आरोहण खेलकुद संघ (एनसीएसए) ले पनि मान्यता दिएको छ । यस प्रतियोगिताको प्राविधिक सहयोगीको रूपमा नेपाल राष्ट्रिय पर्वतारोहण पथप्रदर्शक संघ रहेको छ । उनीहरूले प्रतियोगिता अवधिभर निर्णायक मण्डल तथा अन्य प्राविधिक पक्षलाई सम्हाल्नेछन् ।

प्रतियोगिता अवधिभर सुरक्षाको प्रत्याभूति हुने गरी, भैपरी आउने वा हुन सक्ने जोखिम तथा दुर्घटनालाई मध्यनजर गरी सहभागी प्रतियोगीहरू तथा प्राविधिक व्यक्तिहरूको न्यूनतम अवधिसम्मलाई बीमाको समेत व्यवस्था गरिएको छ ।

यस प्रतियोगिताको उद्देश्य भनेको यस खेल र यस खेलकुदमा आबद्ध हुने सम्पूर्ण खेलाडी, खेलकर्मी, प्राविधिक व्यक्ति र अन्य पक्षहरूको मनोबल उच्च राखी अझ यस क्षेत्रको विकास प्रवर्द्धन गर्नुका साथै देशमा साहसिक खेल र पर्यटनको प्रचार प्रसार गरी राजस्वमा टेवा पुर्‍याउनु रहेको प्रबन्ध निर्देशक श्रेष्ठले बताए ।

प्रतियोगिताको क्वालिफिकेसन राउन्ड बिहान ८ देखि १२ बजेसम्म हुनेछ । त्यसबाट महिला ८ र पुरुष ८ खेलाडी अन्तिम चरणमा छनोट हुनेछन् । फाइनल चरणको खेल दिउँसो २ देखि ६ बजेसम्म हुनेछ । अन्तिम चरणपछि फाइनल राउण्डद्वारा महिला तथा पुरुषबाट समान रूपमा प्रथम, द्वितीय र तृतीय विजेताहरू घोषित गरिनेछ । विजेताले नगद २० हजार पाउनेछन् भने दोस्रोले १० हजार र तेस्रोले ५ हजार पाउनेछन् ।

प्रतियोगिताको मुख्य प्रायोजक संयुक्त रुपमा अमेरिकी गैरनाफामूलक संस्था मुसा मसला र नेपालस्थित वाङ्चुक पिक प्रोमोसन रहेका छन् । दुवै संस्थाले विगत तीन वर्षदेखि नेपालमा हुने हरेक स्पोर्ट क्लाइम्बिङ खेलकुद गतिविधिहरूमा सहकार्य गर्नुका साथै उनीहरूले हरेक वर्ष आफैँ पनि प्रतियोगिता आयोजना गर्दै आइरहेका छन् ।

मुसा मसलाका नेपाल प्रतिनिधि लाक्पा शेर्पाले वाङ्चुक पिकले पनि हरेक वर्ष क्लाइम्बिङ प्रतियोगिता गर्दै आइरहेको र दुवै पक्षको उद्देश्य मिलेकाले प्रायोजन गरेको जानकारी दिइन् ।

प्रतियोगिताका अन्य प्रायोजकहरूमा स्पोर्ट क्लाइम्बिङ सेन्टरलाई प्रायोजन गर्दै आइरहेको इटालियन ब्रान्ड स्कार्पा रहेको छ भने अन्य सह–प्रायोजकहरूमा ब्ल्याक डायमण्ड, बीईएल, क्याजुअल एसजी, टक्यो पाउडर इन्डस्ट्रिज, इन्फिनिटी वेयर्स, वज्र फिट्नेस, पाङ्ग्रो र पेरिपिङ्कल सर्भिस रहेका छन् ।

यस्तै, कन्ट्रिब्युसन प्रायोजकको रूपमा फ्रान्समा अवस्थित सुपर क्लाइम्बिङ, हस्पिटालिटी पार्टनरको रुपमा ल्यान्डमार्क होटेल एन्ड रिसोर्ट, मेडिकल पार्टनरको रूपमा स्टार हस्पिटल र सेक्युरिटी पार्टनरको रूपमा भिजन सेकुरिटिज रहेको छ ।

प्रकाशित मिति: बिहीबार, फागुन १७, २०८० १८:२९