मैदानभित्र गोलमा जसरी खुसी साट्थेँ, त्यसैगरी टिमको गोलमा खुसी मनाउन आतुर छु: सावित्रा भण्डारी

मैदानभित्र गोलमा जसरी खुसी साट्थेँ, त्यसैगरी टिमको गोलमा खुसी मनाउन आतुर छु: सावित्रा भण्डारी

A+ A A-

नेपाली राष्ट्रिय महिला फुटबल टिमकी कीर्तिमानी स्ट्राइकर सावित्रा भण्डारी 'साम्बा' ले नेपालको प्रतिनिधित्व गर्न पाउनु आफ्ना लागि ठूलो गौरवको कुरा भएको बताएकी छिन् ।

बिहीबार राति हुने वाफ महिला च्याम्पियनसिपको जोर्डनविरुद्धको फाइनल खेलको पूर्वसन्ध्यामा फेसबुकमा स्टाटस लेख्दै सावित्राले नेपालको जर्सी लगाएर मैदानमा बिताएको हरेक सेकेन्ड आफूले अन्तिम खेल जसरी खेलेको र राष्ट्रको प्रतिनिधित्वभ गर्नुभन्दा ठूलो गौरवको कुरा अरु नभएको बताएकी छिन् ।

'देशका लागि खेल्नु मेरो लागि आज पनि उत्तिकै महत्त्वपूर्ण छ, जति मैले गाउँ छोडेर शहर पस्दा त्यो जर्सी लगाउने सपना साँचेको थिएँ,'उनले भनेकी छिन्, 'नेपालको जर्सी लगाएर मैदानमा बिताएका हरेक सेकेन्ड मैले आफ्नो अन्तिम खेल जसरी खेलेको छु । नेपालको प्रतिनिधित्व गर्नुभन्दा ठूलो गौरवको कुरा सायदै अरु होला ।'

सावित्राले आफू आबद्ध क्लबले आफ्ना लागि सहज वातावरण सिर्जना गरिदिएको र यसपटक फिफाले तोकेको भन्दा बढी समय राष्ट्रिय टोलीमा रहने व्यवस्था मिलाएकोमा धन्यवाद दिएकी छिन् । उनले नेपाली टोलीले फाइनल खेल्न थाले पनि आफ्नो व्यावसायिक करिअर र सम्झौतालाई पनि उत्तिकै सम्मान गर्नुपर्ने बताएकी छिन् ।

'वाफ महिला च्याम्पियनसिपमा हामी फाइनल खेल्दैछौँ । तर, एक फुटबल खेलाडी भएपछि मैले आफ्नो व्यावसायिक करिअर र सम्झौतालाई पनि उत्तिकै सम्मान गर्नुपर्छ । क्लबले सधैं मेरो लागि सहज वातवरण सिर्जना गरिदिएको छ । र, यसपटक पनि फिफाले तोकेकोभन्दा बढी समय राष्ट्रिय टोलीमा रहने व्यवस्था मिलाएकोमा धन्यवाद भन्न चाहन्छु,' उनले भनेकी छिन् ।

सावित्राले नेपाली टोलीले फाइनलमा पनि आफ्नो लय कायम राख्दै उपाधि घर लिएर जाने विश्वास व्यक्त गरेकी छिन् । 'मलाई विश्वास छ हाम्रो टोलीले फाइनलमा पनि आफ्नो लय कायम राख्दै उपाधि घर लिएर जानेछ । हामीले एक टिमको रूपमा उच्च प्रदर्शन गरेर फाइनल यात्रा तय गरेका हौँ । प्रतिद्वन्द्वी कठिन भए पनि हामी पुन: एकपटक एकजुट भएर जित हासिल गर्नेछौँ भन्ने विश्वास मैले राखेको छु,' उनले भनेकी छिन् ।

सावित्राले खेलाडीका रूपमा मैदानमा नभए पनि मैदान बाहिर आफ्नो देशको समर्थनमा हुने उल्लेख गरेकी छिन् । 'खेलाडीका रूपमा मैदानमा नभए पनि म मैदानबाहिर आफ्नो देशको समर्थनमा हुनेछु । र, जसरी टिमको गोलमा मैदानभित्र खुसी साट्थेँ, त्यसैगरी टोलीको गोलमा खुसी मनाउन आतुर छु,' उनले भनेकी छिन् ।

वाफ च्याम्पियनसिपको फाइनलमा नेपालले बिहीबार (आज) राति नेपाली समय अनुसार पौने १० बजे जोर्डनको सामना गर्नेछ । तर, सावित्राले भने फाइनल खेल गुमाउने छिन् । सावित्रा नेपाली टिमबाट बिदाइ भएर फ्रान्स फर्किएकी छिन् ।
फाइनल खेल जेद्दाहस्थित प्रिन्स अब्दुलल्ह अल-फैसल स्पोर्ट्स सिटी मैदानमा हुनेछ । वाफ च्याम्पियनसिपमा सावित्रा उच्च गोलकर्ता हुन् । उनले १० गोल गरेकी छिन् ।

प्रकाशित मिति: बिहीबार, फागुन १७, २०८० १२:०१