जित्न बिर्सेकाे नेपाल : गुल्सनलाई कहिलेसम्म माैका ?

A+ A A-

क्रिकेटमा नेपालले होम ग्राउन्डमा खेलेका पछिल्ला खेलमध्ये एक मात्र जितेको छ भने पाँच खेलमा हार व्यहोर्नुपरेको छ । नेपालले त्रिवि मैदान कीर्तिपुरमा एक महिनाभित्र सात ओडीआई र दुई टी– २० आई खेलेको छ जसमा चार ओडीआई जितेको छ ।

आईसीसी विश्वकप लिग २ को त्रिकोणीय सिरिजको तयारी स्वरुप नेपालले क्यानडासँग तीन ओडीआईको द्विपक्षीय सिरिज खेलेको थियो । जुन क्लीन स्वीप गर्‍यो । तर, त्यसपछि भने नेपालले त्रिवि मैदानमा लगातार हार व्यहोरिरहेको छ । अवस्था यस्तो बनेको छ कि मानौँ, अहिले नेपालले जित्न भुलिसकेको छ ।

आफ्नो टिमको हौसला बढाउन त्रिवि मैदानमा हजारौँ खेलप्रेमी जाने गर्छन् । हरेकपटक जितको आशा बोकेर त्रिवि पुग्नेहरू खेल सकिँदा निराश भएर फर्किन्छन् ।

नामिबिया, नेदरल्यान्ड्स र नेपाल सहभागी लिग २ मा नेपालले एक मात्र खेल जित्यो, तीन खेलमा हार व्यहोर्‍यो । नेपालले हार व्यहोरेका सबै तीन खेलमा ब्याटिङ कमजोर देखिएको थियो ।

लिग २ पछि मंगलबार सुरु भएको यी तीन देश सहभागी त्रिकोणीय टी– २० सिरिजका सुरुका दुई खेलमा नेपाल पराजित भएको छ । मंगलबार नामिबियासँग २० रनले पराजित भएको नेपाल बुधबार २ रनले पराजित भयो ।

यसरी नेपालले लगातार हार व्यहोर्दा टिमको कम्बिनेसनमै प्रश्न उठ्न थालेको छ । नामिबियाले दिएको २०७ रनको लक्ष्य पछ्याएको नेपालले पहिलो बलमा ओपनर कुशल भुर्तेलको विकेट गुमायो । आसिफ शेख पनि जम्न सकेनन् ।

नामिबियासँगको खेलमा पराजित भएपछि बुधबार नेदरल्यान्ड्ससँगको खेलमा नेपालले दुई परिवर्तन गरेको थियो । हार्ट हिटर विवेक यादवको सट्टा बायाँहाते मिडियम प्रेसर प्रतिश जीसी खेले भने फास्ट बलर अभिनाश बोहोराको स्थानमा स्पिनर ललित राजवंशी प्लेइङ ११ मा समेटिए । तर, नतिजामा भने कुनै परिवर्तन भएन । यी दुवै खेलमा अलराउन्डर गुल्सन झाले मौका पाए ।

गुल्सनले बुधबारको खेलमा मौका नपाउने अनुमान थियो । तर, उनले मौका पाए । जबकि उनले बुधबार बलिङ पनि गरेनन्, ब्याटिङमा एक बल पनि सामना नगरी नटआउट रहे ।

बुधबारको खेलमा नेपाल चार फास्ट बलर, एक विशेषज्ञ स्पिनर, अरु ब्याटरको कम्बिनेसनमा मैदानमा उत्रिएको थियो । तर, झाले बलिङ नै गरेनन् भने बाँकी तीन फास्ट बलरले पनि कोटाअनुसार बलिङ गरेनन् । करण केसीले तीन, सोमपाल कामीले एक र प्रतिश जीसीले तीन ओभर बलिङ गरे । विशेषज्ञ स्पिनर राजवंशीले ४ ओभर बलिङ गर्दा बिनाविकेट ४२ रन बनाए । बाँकी ९ ओभर भने पार्टटाइम बलरले बलिङ गरे । करणले तीन ओभरमा २९ रन दिएर एक विकेट लिए भने सोमपालले एक ओभरमै १४ रन दिए । प्रतिशले तीन ओभरमा बिनाविकेट २९ रन दिए ।

पार्टटाइम बलर दीपेन्द्रसिंह ऐरीले ४ ओभरमा एक मेडन राख्दै २० रन मात्र दिए भने कुशल मल्लले ४ ओभरमा ३७ रन दिएर एक विकेट लिए । अरु बलर विकेटविहीन रहे । यसरी पार्टटाइम बलरबाट बलिङ गराउनु थियो भने लगातार निराश पारिरहेका गुल्सनलाई किन प्लेइङ ११ मा राखिएको हो ? यो बुझ्नै नसकिने पहेली बनेको छ ।

गुल्सनले खेलेका पछिल्ला दश खेलमा निकै निराशाजनक प्रदर्शन गरेका छन् । दक्षिण अफ्रिकामा भएको यू– १९ विश्वकपमा उनले सबै खेल खेले । तर, ब्याटिङ र बलिङ दुवैमा योगदान दिन सकेनन् । यस्तै, लिग २ मा सिनियर टिमबाट सबै खेलमा मौका पाएका उनले त्यहाँ पनि निराशाजनक प्रदर्शन गरे ।

उनले यू– १९ का ५ खेलमा १, ३, १, १८ र २ गरी २५ रन मात्र बनाएका थिए भने बलिङतर्फ ३, ०, १, ० र २ गरी ६ विकेट लिएका थिए ।

यस्तै, लिग २ का तीन खेलमा मौका पाएका उनले ५ र २१ गरी २६ रन बनाए । एक खेल भने उनले ब्याटिङ गर्नु परेन । बलिङतर्फ कुनै सफलता पाउन सकेनन् । यस्तै, टी २० आईका दुई खेलमध्ये एक खेलमा १२ रन बनाए भने एक खेलमा कुनै बल खेल्न पाएनन् । बलिङ पनि एक खेलमा मात्र गरेका उनले एकै ओभरमा १८ रन दिए तर विकेटविहीन रहे ।

अहिले टिममा रहेका खेलाडीले झालाई रिप्लेस गर्न नसक्ने अवस्था भने होइन । जस्तो कि बुधबारको खेलमा उनीबाट बलिङ गराउनु थिएन भने एक थप ब्याटर अनिल साह वा विवेक यादवलाई खेलाउन सकिन्थ्यो । जबकि अनिलले लिग २ र क्यानडासँगको सिरिजमा पाएको मौकामा राम्रो प्रदर्शन गरेका थिए ।

प्रकाशित मिति: बुधबार, फागुन १६, २०८० १६:४७