बैंकर पक्राउपछि बैंकिङ क्षेत्रमा त्रास, संघले बोलायो आकस्मिक बैठक

A+ A A-

ऋण लगानीमा बढी भ्यालुएसन गरेको आरोपमा प्रहरीले १० जना बैंकरलाई पक्राउ गरेपछि बैंकरहरू आतंकित भएका छन् । नेपाल प्रहरीको केन्द्रीय अनुसन्धान ब्युरो (सीआईबी) ले तत्कालीन सेञ्चुरी बैंकका सीईओहरू तुलसीराम गौतम, मनोज न्यौपानेलगायत १० जनालाई पक्राउ गरेको छ । उनीहरूले ऋण लगानी गर्दा धितोभन्दा बढी लगानी गरेको भन्दै सीआईबीले पक्राउ गरेको हो ।

बैंकरहरू पक्राउ परेपछि बुधबार बैंकर संघको आकस्मिक बैठक बसेको छ । संघको बैठकले ऋण लगानीबारे बैंकको नर्म्स प्रहरीले नबुझेको निष्कर्ष निकालेको छ । सहकारीको रकम हिनामिना गरेका रवीन्द्र चौलागाईंमाथि अनुसन्धान गर्दै जाँदा सीआईबीले पूर्व र बहालवाला बैंकरलाई पक्राउ गरेकाे हो ।

अहिले सीआईबीले पक्राउ गरेको आधारलाई मान्ने हो भने कोही पनि बैंकर बाँकी नरहने नबिल बैंकका डेपुटी सीईओ मनोज ज्ञवालीले उल्लेख गरेका छन् । उनले सामाजिक सञ्जालमा लेखेका छन्, ‘कुनै बैंकले प्रवाह गरेको कर्जा खराब कर्जामा परिणत भयो र ऋण असुलीका क्रममा धितोले खामेन भने बैंकिङ कसुर लगाउने अनि आरएमदेखि सीईओ–बोर्डसम्मलाई हतकडी लगाउने हो भने छ महिना मात्र कर्पोरेट/इन्फ्रामा कर्जा दिन बसेका कुनै बैंकर जेल बाहिर हुँदैनन् । जसलाई मन लाग्छ, एक हप्ता फाइल खोजेर टप्प टिपेर जेल हाले हुन्छ ।’

उनले अगाडि थप उल्लेख गरेका छन्, 'घर कर्जा, व्यक्तिगत कर्जा, रियल इस्टेट कर्जा प्रवाह गर्दा घरजग्गा धितो मूल्यांकन गराई धितोको ५० प्रतिशतदेखि ७० प्रतिशतसम्म दिन मिल्छ तर व्यावसायिक कर्जा/ कर्पोरेट कर्जा/ इन्फ़्रास्ट्रक्चर कर्जा प्रवाह गर्दा स्टक, रिसिबल र परियोजनाको लागतका आधारमा प्रवाह गर्न मिल्छ, यस्तो कर्जामा धितो भनेको उक्त परियोजना, स्टक र रिसिबल मात्रै पनि हुन सक्छ । संसारभरको बैंकिङ प्राक्टिस यही हो ।'

प्रकाशित मिति: बुधबार, फागुन १६, २०८० १५:२८