गोविन्द गिरी 'प्रेरणा'को पहिलो लघुकथा सङ्ग्रह सार्वजनिक

A+ A A-

साहित्यकार गोविन्द गिरी ‘प्रेरणा’को पहिलो लघुकथा सङ्ग्रह ‘बीसौँ शताब्दीको अद्वितीय खेल’ विमोचन गरिएको छ । काठमाडौंमा बुधबार आयोजित कार्यक्रममा वरिष्ठ साहित्यकार प्रा.डा. दयाराम श्रेष्ठले पुस्तक विमोचन गरेका हुन् ।

विमोचित लघुकथा सङ्ग्रहबारे समीक्षात्मक टिप्पणी राख्ने क्रममा वरिष्ठ साहित्यकार किशोर पहाडीले लेखक प्रेरणासँगका पुरान दिन स्मरण गरे । ४० को दशकदेखि नै आफूहरूले लघुकथाकाे प्रवर्द्धनमा सँगै पाइला चालेको उनले सम्झिए । ‘गोविन्द गिरी प्रेरणा र म मिलेर नेपाली लघुकथाको त्यतिखेरको स्थितिबारे हिन्दी अखबारमा लेख लेखेका थियौँ । यसको अर्थ के भने हामी त्यही बेलादेखि लघुकथाको उन्नतिका लागि खटेका मान्छे हौँ,’ उनले भने ।

यद्यपि, लघुकथा सङ्ग्रहका रूपमा प्रेरणाको पहिलो पुस्तकले लघुकथाको समुन्नतिमा एउटा इँट्टा थप्ने काम गर्ने उनले विश्वास व्यक्त गरे ।

भूमिका लेखकसमेत रहेका डा. श्रेष्ठले स्रष्टा गिरीको लेखाइ–सीपमा रूपसज्जा वा आवरण–शैलीको विविधता रहेको बताए । ‘जस्तो कि रूपकात्मक प्रस्तुति, मिथकीय स्वैरकल्पनाको चास्नी र अभिधात्मक अभिव्यक्तिका साथै सौन्दर्य घटकको सुन्दर प्रदर्शनले गर्दा नै प्रेरणाका लघुकथाहरू रूपवान् बन्न सकेको श्रेष्ठको भनाइ थियो ।

उनले लघुकथा लेखनका अनेकौं चुनौतीबारे चिन्ता पनि जनाए । भने, ‘जेलाई पनि लघुकथा भनिदिने चलन बढ्दो छ । खासमा लघुकथामा ऐँजेरु पलाएको छ, यसले ठूलो हानि गर्न सक्छ ।’

नेपालमा उत्कृष्ट लघुकथा लेखक गन्ने हो भने पाँचवटा औंला पनि नभाँचिने उनको दाबी थियो । ‘तिनै थोरैमध्ये एक लघुकथाकार हुन् गोविन्द गिरी प्रेरणा’, उनले भने । रमाइलो पारामा प्रा.डा. श्रेष्ठले लेखक गिरीलाई आफ्नो नाम र थरको बीचमा ‘बहादुर’ थप्न सुझाव पनि दिए । यसो गर्दा जहाँ रहे पनि नेपालीपन झल्किने उनको तर्क छ ।

नेपाल स्रष्टा समाजद्वारा प्रकाशित पुस्तकको मूल्य २ सय रुपैयाँ राखिएको छ ।

लेखक प्रेरणाले ६ कथासङ्ग्रह, ६ उपन्यास, पाँच कवितासङ्ग्रह, ४ यात्रा संस्मरण, दुई निबन्धसङ्ग्रह, एक समालोचना, एक हास्यव्यङ्ग्य, एक जीवनी र एक अन्तर्वार्ता गरी २७ पुस्तक प्रकाशित छन् । पछिल्लो पुस्तक उनको २८औँ कृति हो ।

प्रकाशित मिति: बुधबार, फागुन १६, २०८० १४:३१