सुदूरपश्चिममा ७६ प्रतिशत बेरोजगारी

A+ A A-

सुदूरपश्चिममा देशमै सबैभन्दा बढी बेरोजगारी रहेको जनाइएको छ । केन्द्रीय तथ्यांक विभागले सुदूरपश्चिममा देशमै सबैभन्दा बढी बेरोजगारी रहेको देखाएको हो केन्द्रीय तथ्यांक विभागको पछिल्लो तथ्यांक अनुसार जनसंख्या अनुपातमा सुदूरपश्चिममा झन्डै ७६ प्रतिशत बेरोजगारी रहेको देखाएको छ । त्यसपछि कर्णाली प्रदेशमा ७५ प्रतिशत बेरोजगारी छ ।

सो तथ्यांक अनुसार सुदूरपश्चिममा जनसंख्या अनुपातको २४ प्रतिशत रोजगारी रहेको छ । कर्णाली प्रदेशमा २४ दशमलव ८ प्रतिशत छ भने मुलुकभर सबैभन्दा बढी तीन नम्बर प्रदेशमा ४३ दशमलव ८ प्रतिशत रोजगारी छ ।

५९ हजार जनसंख्या बेरोजगार

सुदूरपश्चिममा काम गर्ने उमेर समुहका ५९ हजार जनसंख्या बेरोजगार रहेको पाइएको छ । यस प्रदेशमा काम गर्ने उमेर समूहको जनसख्या मध्ये बढी सहरी क्षेत्रमा नै बेरोजगार रहेको पाइएको हो ।

१५ वर्ष वा सो भन्दा बढी उमेर समूहका १८ लाख ८३ हजार जनसंख्या रहेको यस प्रदेशमा ५९ हजार जनसंख्या बेरोजगार रहेको तथ्यांकले देखाएको छ । केन्द्रीय तथ्यांक विभागका अनुसार यस प्रदेशको शहरी क्षेत्रमा ४० हजार र ग्रामीण क्षेत्रमा १९ हजार जनसंख्या बेरोजगार रहेका छन् ।

प्रदेशमा बेरोजगारी दर ११ दशमलव पाँच प्रतिशत रहेको प्रतिवेदनमा उल्लेख छ । सर्वेक्षण अनुसार देशभरीमै सबैभन्दा कम रोजगारमा रहेको जनसंख्या सुदूरपश्चिम नै रहेको छ ।

तथ्यांक अनुसार सबैभन्दा रोजगारमा रहेको जनसंख्या प्रदेश नम्बर ३ मा ४३ दशमलब आठ प्रतिशत र सबैभन्दा कम सुदूरपश्चिम प्रदेशमा २४ दशमलब एक प्रतिशत रहेको छ ।

यस प्रदेशमा प्रदेशमा दुई लाख ९४ हजार पुरुष र एक लाख ६१ हजार महिला गरि चार लाख ५५ हजार जनसंख्या रोजगार रहेको सो तथ्यांकमा उल्लेख छ ।

देशभरीमै श्रम शक्तिमा सहभागिता दर सबैभन्दा बढी ४७ दशमलब एक प्रतिशत ३ नम्बर प्रदेशमा रहेको र सबैभन्दा कम सुदूरपश्चिम प्रदेशमा २७ दशमलब तीन प्रतिशत रहेको देखाएको छ ।

सुदूरपश्चिम प्रदेशमा श्रमशक्तिमा सहभागिता दरमा पुरुष ४५.६ प्रतिशत र महिला १५.७ प्रतिशत रहेको छ । प्रतिवेदन अनुसार प्रदेशमा औसत मासिक आम्दानी १६ हजार तीन सय ५६ रहेकोमा पुरुषको १७ हजार चार सय ४२ र महिलाले १३ हजार पाँच सय ८३ रहेको छ ।

विभागले तेस्रो सर्वेक्षण २०१७ जुलाई देखि २०१८ जुन अर्थात २०७४ असारदेखि २०७५ जेठसम्म तथ्यांक संकलन गरेको तथ्यांक विभाग महेन्द्रनगरका निमित्त कार्यालय प्रमुख गोविन्द न्यौपानेले बताए ।

बेरोजगारी अन्त्य गर्छाै : प्रदेश सरकार

पछिल्लो श्रम शक्ति सर्वेक्षणका आधारमा सो तथ्यांक प्रस्तुत गरिएको जनाइएको छ । प्रदेशमा प्राविधिक शिक्षाको पहुच विस्तार हुन नसकेकाले बेरोजगारी बढ्दै गएको सरोकारवालाले बताएका छन् ।

शिक्षाविद् डा.हेमराज पन्तले प्रदेशमा प्राविधिक शिक्षालय नै नभएकाले बेरोजगारी दर बढेको बताए । उनले भने, ९६ वडा कलेज रहेको सुदूरपश्मिमा सबैले बीएडलगायत सैद्धान्तिक शिक्षामा मात्रै जोड दिएको छ । प्रदेशको बेरोजगारी दर घटाउने हो भने उच्च तहमा प्राविधिक शिक्षामा जोड दिनु पर्छ ।

प्राविधिक शिक्षाका लागि श्रोत, साधन भएर पनि खर्च कसरी गर्ने भन्ने प्रदेशस्तरबाट समन्वय नभएको संघीय सरकारले बताउने गरेको छ ।

प्रदेशले केन्द्रसँग समन्वय गर्न नसकेकाले भएको श्रोत पनि कहाँ लगाउने भन्ने अन्यौलता छ । प्रदेशको बेरोजगारी अन्त्यका लागि आर्थिक गतिविधि सञ्चालन गरिएको प्रदेशका आर्धिक मामिला तथा योजना मन्त्री झपट बोहराले बताए ।

स्थानीय स्तरमै रोजगारीका अवसर सिर्जना गरी युवा पलायन रोक्न तर्फ प्रदेश सरकाले अभियान थालेको मन्त्री बोहराले बताए ।

प्रकाशित मिति: बिहीबार, असोज ३०, २०७६ १२:४६