पाकिस्तानमा एक महिलालाई भिडले घेरा हालेर कुटपिट गर्न खोजेपछि...(भिडियो)

A+ A A-

पाकिस्तानको लाहौरमा आइतबार एक महिलालाई भिडमा जम्मा भएका मानिसहरूले घेरा हाल्दै कुटपिट गर्न खोजेका थिए । आक्रोशित भिडले महिलाले लगाएको पोशाकमा आपत्ति जनाएका थिए ।

ती महिलाले लगाएको पोशाकमा मुस्लिम धर्मग्रन्थ कुरानका पंक्तिहरू थिए भन्ने उनीहरूको आरोप थियो । ईश्वरलाई निन्दा गरेको भन्दै ती महिलालाई कुटपिट गर्न खोजिएको थियो ।

प्रहरी अधिकारीहरू समयमै सो स्थानमा पुगेका थिए र महिलालाई बचाउन सफल भएका थिए । ती महिलालाई आक्रोशित भिडबाट बचाएसँगै उनको पोशाकमा साँच्चै कुरानका पंक्तिहरू छन् त भनेर अनुसन्धान पनि भयो । तर, उनको पोशाकमा कुरानका पंक्तिहरू भने थिएनन् ।

प्रहरीका अनुसार ती महिला आफ्ना श्रीमान्‌सँग बजारमा किनमेल गरिरहेकी थिइन् । महिलाको लुगामा अरबी अक्षरमा केही शब्द लेखिएका थिए, जसका कारण आक्रोशित भिडले उनीमाथि ईशनिन्दाको आरोप लगाएका थिए । उनीहरूले भनेजस्तै त्यसमा कुरानका कुनै अंश थिएनन् ।

केही बेरमै ठूलो संख्यामा मानिसहरू जम्मा भएका थिए र ती महिला र उनका श्रीमान्‌लाई दुर्व्यवहार गर्न थालेका थिए । भिडले महिला र उनका श्रीमान्‌लाई कुटपिट गर्ने अवस्था सिर्जना भएपछि प्रहरीलाई खबर गरिएको थियो । त्यसपछि धर्मका जानकारको सहयोगमा उक्त मामिला शान्त गराइएको थियो ।

यस घटनाका केही भिडियोहरू सामाजिक सञ्जालमा भाइरल पनि भइरहेका छन्, जसमा एक महिला रेस्टुरेन्टमा बसिरहेकी छिन् र भिडमा रहेका केही व्यक्तिले उनलाई मार्ने धम्कीसमेत दिइरहेका छन् । प्रहरीले महिला र उनका श्रीमान्‌लाई उद्धार गरेपछि यतिबेला प्रहरीको चलाखीका कारण उनीहरूको ज्यान बचेको टिप्पणी हुन थालेको छ ।

ती महिलाले लगाएको पोशाक साउदी अरबको ‘शालिक रियाज’ ब्रान्डको भएको बताइएको छ । साउदी अरबमा अरबी अक्षरमा लेखिएका त्यस्ता लुगाहरू निकै चर्चित छन् । त्यहाँ 'सुन्दर र मीठो'जस्ता शब्दहरू भएको बताइएको छ ।

भिडियो: