विशाल लक्ष्य पछ्याएकाे नेपाल नामिबियासँग पराजित

A+ A A-

त्रिदेशीय टी-२० क्रिकेट सिरिजअन्तर्गत मंगलबार भएकाे पहिलाे खेलमा नेपाल नामिबियासँग पराजित भएकाे छ । त्रिवि क्रिकेट मैदानमा नेपालले नामिबियासँग २० रनकाे पराजय व्यहाेरेकाे हाे ।

नामिबियाले दिएकाे २ सय ७ रनको विशाल लक्ष्य पछ्याउने क्रममा नेपाली टाेली १ सय ८६ रनमा राेकियाे । नेपाल १८.५ ओभरमा अलआउट भयाे । नेपालका लागि दीपेन्द्रसिंह ऐरीले ४८, रोहितकुमार पौडेलले ४२, कुशल मल्लले ३२ र सोमपाल कामीले २६ रन बनाए ।

नामिबियाका रुबेन ट्रम्पलम्यानले चार तथा बर्नार्ड स्कोल्ट्ज, जान फ्राइलिंक र जान निकोल लोफ्टी एटनले २–२ विकेट लिए । एटनको कीर्तिमानी शतकको मद्दतमा नेपालविरुद्ध नामिबियाले विशाल स्कोर खडा गरेको थियाे । एटनले टी-२० अन्तर्राष्ट्रियमा सर्वाधिक छिटो (कम बलमा) शतक प्रहार गर्ने विश्व रेकर्डसमेत कायम गरेका छन् ।

एटनले ३३ बलमा नेपालविरुद्ध शतक प्रहार गरेका हुन् । उनले ११ चौका र ८ छक्काको मद्दतले शतक प्रहार गरे । यसअघि कुशल मल्लको नाममा यो विश्वकीर्तिमान थियो । मल्लले मंगोलियाविरुद्ध ३४ बलमा शतक प्रहार गर्दै रेकर्ड कायम गरेका थिए । एटनले मल्लको उक्त विश्व रेकर्ड तोडिदिए ।

त्यस्तै, नामिबियाका मिकेल भान लिङ्गेनले २० तथा मलान क्रुगरले नटआउट ५९ रन जोडे । जेपी कोट्जे ११ रनमा आउट हुँदा जान फ्राइलिङ्क ५ रनमा आउट भए । एटनले भने १०१ रन बनाउँदै आउट भएका थिए । त्यस्तै, जेजे स्मित भने १ रनमा नटआउट रहे ।

नामिबियाको ब्याटिङअगाडि नेपालको बलिङ धराशायी भएको थियो । करण केसीले ३ ओभर बलिङ गर्दा ३२ रन दिएर १ विकेट लिए । त्यस्तै, सोमपाल कामीले ३ ओभर बलिङ गर्दा ३४ रन दिए । त्यस्तै, दीपेन्द्रसिंह ऐरीले ४ ओभर बलिङ गरेर ३२ रन दिए भने कप्तान रोहित पौडेलले ४ ओभर बलिङ गर्दै ३० रन दिएर २ विकेट लिए । अविनाश बोहराले पनि १ विकेट लिँदा ४ ओभरमा ४९ रन खर्चिए ।

समान १/१ ओभर बलिङ गरेका कुशल मल्ल र गुल्सन झाले विकेट लिन सकेनन् । मल्लले ७ र झाले १८ रन दिए । नामिबियाले निर्धारित २० ओभरमा ४ विकेटको क्षतिमा २०६ रनको विशाल स्कोर खडा गरेको थियाे ।

प्रकाशित मिति: मंगलबार, फागुन १५, २०८० १४:४५