फिनटेक एलायन्स नेपाल एसिया फिनटेक एलायन्समा आबद्ध

A+ A A-

फिनटेक एलायन्स नेपाल (एफएएन) एसिया फिनटेक एलायन्स (एएफए) मा आबद्ध भएको छ । एसिया फिनटेक एलायन्सको सदस्यता प्राप्त गरेसँगै अब फिनटेक एलायन्स नेपालले एसिया फिनटेक एलायन्स नेटवर्कभित्र रहेका एसियाभरका प्रख्यात फिनटेक एसोसिएसनहरूसँग एउटै मञ्चबाट हातेमालो गर्दै सहकार्य गर्न सक्नेछ ।

यो साझेदारीले नेपाली फिनटेक कम्पनी र यस क्षेत्रमा आबद्ध प्रोफेसनलहरूको एसिया प्रशान्त क्षेत्रका फिनटेक संघसंस्थाहरूसँग सहकार्य र साझेदारी बढाउन, उत्कृष्ट अभ्यासहरू साझेदारी गर्न र सामूहिक वृद्धिलाई अगाडि बढाउन सहज हुने विश्वास गरिएको छ ।

एसिया फिनटेक गठबन्धनले सिंगापुर, दक्षिण कोरिया, जापान, फिलिपिन्स, ताइवान, इन्डोनेसिया, हङकङ, मलेसिया, थाइल्यान्ड, मङ्गोलिया र अहिले नेपालजस्ता प्रमुख बजारहरूबाट फिनटेक एसोसिएसनहरूको विविध समूहलाई एकसाथ ल्याउँछ । यस सहकार्यले फिनटेक एलायन्स नेपाललाई नेपालको फिनटेक इकोसिस्टमको विकासलाई गति दिँदै क्षेत्रभरका अन्तर्दृष्टि र विशेषज्ञताको लाभ उठाउने राम्रो अवसरहरू प्रस्तुत गर्नेछ ।

फिनटेक एलायन्स नेपालका अध्यक्ष सञ्जीव सुब्बाले भने, 'एसिया फिनटेक गठबन्धनमा सामेल हुन पाउँदा र एसियाभरका सम्मानित फिनटेक संघहरूसँग सहकार्य गर्न पाउँदा हामीले अत्यन्त सम्मानित र गौरवान्वित महसुस गरेका छौँ । यो साझेदारी नेपालमा फिनटेक नवप्रवर्तन र डिजिटल वित्तीय समावेशीकरणको हाम्रो दृष्टिकोणसँग मिल्दोजुल्दो छ र हामी एसियाली फिनटेक समुदायको सामूहिक वृद्धिमा योगदान गर्न पाउँदा उत्साहित छौँ ।'

फिनटेक एलायन्स नेपालका प्रवक्ता विकास सरनले भने, 'हामी विश्वास गर्दछौँ कि एसियामा हाम्रा समकक्षहरूसँग मिलेर काम गर्दा हामीले नयाँ अवसरहरू एक्सप्लोर गर्न सक्षम हुन्छौँ, साझा चुनौतीहरूलाई सम्बोधन गर्न सक्छौँ र फिनटेक परिदृश्यमा प्रभावकारी परिवर्तन गर्न सक्छौँ ।'

नेपालमा फिनटेक इनोभेसन र डिजिटल वित्तीय समावेशीकरणका लागि फिनटेक एलायन्सले नेतृत्वदायी भूमिका निर्वाह गर्दै आइरहेको छ ।

फिनटेक एलायन्स नेपाल नेपालमा फिनटेक नवप्रवर्तन, उद्यमशीलता र डिजिटल वित्तीय समावेशीकरणलाई प्रवर्द्धन गर्न समर्पित एक अग्रणी फिनटेक एसोसिएसन हो । यस कम्पनीले स्टार्टअपहरू, वित्तीय संस्थाहरू, नियामकहरू र प्रविधिप्रदायकहरूलगायत फिनटेक सरोकारवालाहरूबीचको सहकार्यमा सकारात्मक परिवर्तन ल्याउन र नेपालको विकसित वित्तीय परिदृश्यमा फिनटेकको पूर्ण सम्भावनालाई अनलक गर्न उत्प्रेरकको रूपमा काम गर्दछ ।

प्रकाशित मिति: सोमबार, फागुन १४, २०८० १९:०६