मेस्सी र रोनाल्डोको व्यवहारको आलोचना, के गरे उनीहरूले ? (भिडियो)

A+ A A-

वर्तमान फुटबलका महान् खेलाडीहरू हुन् लियोनल मेस्सी र क्रिस्टियानो रोनाल्डो । युरोपमा एक दशकभन्दा बढी यी दुई खेलाडीले राज गरे । उनीहरूबीचको प्रतिस्पर्धालाई लामो समय विश्वभरका फुटबल समर्थकले खुबै रुचाए पनि ।

यी दुईबीच कसले बढी गोल हान्ने र ट्रफी हात पार्ने भनेर लामो समय होड नै चल्यो । विश्वकप विजेता मेस्सी कीर्तिमानी आठपटकका बालुन डी’ओर विजेता हुन् भने युरोकप विजेता रोनाल्डो पाँचपटकका बालुन डी’ओर विजेता हुन् ।

अहिले उनीहरू युरोपका प्रतिस्पर्धात्मक लिगबाट बाहिर छन् । यद्यपि उनीहरूको चर्चा अझैसम्म रोकिएको छैन । चर्चामा मात्र नभएर यी दुवै खेलाडी पछिल्लो समय एकसाथ विवादमा पनि तानिएका छन् ।

गतहप्ता इन्टर मायामीले अमेरिकी मेजर सक्कर लिगमा रिअल साल्ट लेकसँग प्रतिस्पर्धा गरेको थियो । सो खेलमा मायामीले २–० को जित निकाल्यो तर उक्त खेलपछि मेस्सीको आलोचना सुरु भयो । वास्तवमा मेस्सीले विपक्षी घाइते खेलाडीलाई ड्रिब्लिङ गरेको भन्दै उनको इन्टरनेटमा आलोचना भएको हो ।

रिअल साल्ट लेकका खेलाडी घाइते भएर भुईंमा लडिरहेका हुन्छन्, तर मेस्सीले उनीमाथिबाटै बललाई अगाडि बढाउँछन् । मेस्सीले घाइते खेलाडीलाई देखेपछि उनलाई उठाउनुपर्ने थियो भनेर मानिसहरूले बताइरहेका छन् । मेस्सीले व्यावसायिक खेलाडीको परिचय दिन नसकेको टिप्पणी सुरु भएको छ ।

यसबीचमा रोनाल्डोको पनि आलोचना भइरहेको छ । हिजो आइतबार साउदी प्रो लिगमा रोनाल्डोको अल–हिलालले अल–सबाब क्लबलाई ३–२ गोल अन्तरले हराएको थियो । सो खेल भइरहँदा अल–सबाबका समर्थकहरू मेस्सी–मेस्सी भन्दै चिच्याइरहेका थिए ।

सो क्रममा रोनाल्डोले ती समर्थकहरूतर्फ फर्कंदै खराब इशाराहरू गरेका थिए । यसअघि अन्य खेलहरूमा पनि जब रोनाल्डोलाई मेस्सी–मेस्सी भन्दै विपक्षी समर्थकले जिस्क्याउँथे उनले दर्शकहरूप्रति फर्केर यस्तै व्यवहार देखाउने गरेका छन् ।

त्यस्ता भिडियोहरू सामाजिक सञ्जालमा भाइरल छन् ।