इजरायली आक्रमणको विरोध गर्दै एक अमेरिकी सेनाले आफ्नै शरीरमा आगो लगाए (भिडियो)

इजरायली आक्रमणको विरोध गर्दै एक अमेरिकी सेनाले आफ्नै शरीरमा आगो लगाए (भिडियो)

A+ A A-

अमेरिकाको वासिङ्टनमा एक अमेरिकी सेनाले ‘स्वतन्त्र प्यालेस्टाइन’ को नारा लगाउँदै आफैँमाथि आगो लगाएका छन् । राजधानी वासिङ्टन डीसीस्थित इजरायली दूतावासअगाडि नै अमेरिकी सेनाले आफ्नै शरीरमा आगो लगाएका हुन् ।

पहिचान नखुलाइएका ती सेना अमेरिकी हवाई सेनाको सदस्य भएको अन्तर्राष्ट्रिय सञ्चारमाध्यमले जनाएका छन् । आइतबार दिउँसो १ बजेको समयमा यो घटना भएको हो ।

सार्वजनिक भिडियोअनुसार उनले गाजा स्ट्रिपमा इजरायली आक्रमणको विरोध जनाएका छन् । उनले भनेका छन्, ‘म अब गाजामा जारी नरसंहारमा संलग्न हुने छैन । म विरोधको चरम कार्यमा संलग्न हुन लागेको छु,’ आफूलाई आगो लगाउनुअघि उनले भनेका छन्, ‘स्वतन्त्र प्यालेस्टाइन जिन्दावाद ।’

यो घटना सामाजिक सञ्जाल ट्विचमा लाइभ गरिएको थियो, जसलाई लाखौँले हेरेका थिए । तर, आत्महत्यालाई प्रोत्साहित गरेको भन्दै उक्त भिडियो यतिबेला हटाइएको छ । अमेरिकी वायुसेनाका प्रवक्ताले ती व्यक्ति अमेरिकी सेनाकै सदस्य भएको स्वीकार गरेका छन् तर उनको पहिचान भने खुलाइएको छैन ।

(भिडियो)

25 y/o American, serving at the US Air Force has set himself on fire because of “what people in Palestine have been experiencing at the hands of their colonizers”

He is living on a colonized land and his army has outposts all over the world… yet he burned himself for Palestine. pic.twitter.com/nBqgRR5JqI
— Hen Mazzig (@HenMazzig) February 26, 2024

प्रज्वलित इन्धन शरीरमा हालेर आगो लगाएपछि हाल उनको अवस्था निकै गम्भीर भएको बताइएको छ । अमेरिकी सेनाले इजरायली दूतावासकै अगाडि आफूमाथि आगो लगाएर विरोध जनाएपछि यो घटनाले विश्वको ध्यान तानेको छ ।

अमेरिकाले दुईपटक संयुक्त राष्ट्र संघ सुरक्षा परिषद्‌मा भिटो शक्ति प्रयोग गर्दै गाजामा युद्धविरामको प्रस्ताव अस्वीकृत गरिरहँदा र गाजामा झण्डै ३० हजार प्यालेस्टाइनी मारिएको अवस्थामा ती अमेरिकी सेनाले गाजामा नरसंहार बन्द गर भन्दै विरोध जनाएका हुन् ।

इजरायली व्यापक हवाई तथा थल आक्रमणमा गाजा स्ट्रिपमा हालसम्म २९ हजार ६०६ प्यालेस्टाइनीले ज्यान गुमाइसकेका छन् । मारिनेमा १२ हजार ६६० बालबालिका र ८ हजार ५७० महिला पनि छन् । इजरायलतर्फ भने १२ सयले ज्यान गुमाएका छन् ।

इजरायलले गाजामा हमास समाप्त नगरिञ्जेल आक्रमण गरिराख्ने बताएको छ । तर, ती आक्रमणमा सर्वसाधारण मरिरहेका छन् ।

प्रकाशित मिति: सोमबार, फागुन १४, २०८० १२:३४