खाद्य व्यवस्था कम्पनी जनकपुरधाम लक्ष्यअनुसार धान खरिद गर्न असफल

A+ A A-

खाद्य व्यवस्था तथा व्यापार कम्पनी लि. प्राविधिक कार्यालय जनकपुरधामको यो वर्ष धान खरिद गर्ने लक्ष्य पूरा गर्न असफल भएको छ । संघीय सरकारको स्वामित्वमा रहेको सो प्रादेशिक कार्यालयलाई संघीय सरकारले चालु आर्थिक वर्षमा ३० हजार क्वीन्टल सोना मनसुली धान खरिद गर्ने लक्ष्य दिएकोमा ४५.६९ क्वीन्टल मात्र धान खरिद भएको छ । चालु आर्थिक वर्षमा एक लाख ५३ हजार ६ सय ९ रुपैयाँ मूल्यबराबरको ४५.६९ क्वीन्टल मात्र धान खरिद गर्न सकिएको सो कार्यालयका निमित्त प्रमुख गंगाप्रसाद साहले बताए ।

सरकारले यस वर्ष किसानसँग समर्थन मूल्य प्रतिक्वीन्टल ३ हजार ६ सय ६२ मा धान खरिद गर्न भनेको थियो । तर, कर्मचारीहरू किसानको खेतमै पुगेर धान किन्न नगएको, प्रचारप्रसार नगरी उल्टै निजी गल्ला व्यापारिकहरूको आर्थिक प्रलोभनमा पनि लक्ष्यअनुसारको धान खरिद नभएको सोही कार्यालयका एक कर्मचारीले बताए ।

तर, सरकारले तोकेको न्यूनतम समर्थन मूल्यभन्दा बजारका व्यापारीहरूले किसानसँग बढी मूल्यमा धान किन्न थालेपछि कम्पनीले लक्ष्यअनुरुपको धान किन्न नसकेको सूचना अधिकारी रामपुकार मण्डलले दाबी गरे । संघीय सरकारले तोकेको लक्ष्य प्राप्ति गर्न बजार मूल्यभन्दा बढी दिएर हामीले किसानसँग धान किन्न नसकेको मण्डलले बताए ।

धान किन्न सरकारी संयन्त्र किसानको खेतबारीसम्म पुग्नुपर्ने किसानहरूको भनाइ छ । ‘किसानहरूले सरकारलाई किन धान बेच्न चाहँदैनन् ? त्यस विषयमा सरकार गम्भीर हुनुपर्ने हो,’ जनकपुरधाम कुर्थाका किसान ललन पण्डितले भने, ‘व्यापारीले दिने मूल्यभन्दा सरकारले दिने मूल्य कम भएको छ, त्यस कारण किसानको लागत पनि नउठ्ने देखेपछि किसानहरू निजी व्यापारीलाई धान बेच्न बाध्य भए ।’

प्रकाशित मिति: आइतबार, फागुन १३, २०८० १८:३३