इलाम २ काे उपनिर्वाचनबारे एमालेलाई प्रश्न : सुवासपुत्र सुहाङ नै बन्छन् त उम्मेदवार ?

इलाम २ काे उपनिर्वाचनबारे एमालेलाई प्रश्न : सुवासपुत्र सुहाङ नै बन्छन् त उम्मेदवार ?

A+ A A-

प्रतिनिधिसभा सदस्यका लागि उपनिर्वाचन घोषणा भएसँगै इलाम– २ का लागि राजनीतिक दलहरू निर्वाचनको तयारीमा भिडेका छन् । १५ वैशाख २०८१ मा निर्वाचन आयोगले रिक्त रहेका प्रतिनिधिसभा र प्रदेशसभाका लागि उपनिर्वाचन घोषणा गरेसँगै इलाममा दलहरू तयारीमा जुटेका हुन् ।

इलाम क्षेत्र नम्बर २ मा निर्वाचित भएका नेकपा एमालेका नेता सुवासचन्द्र नेम्वाङको गत २६ भदौमा निधन भएपछि प्रतिनिधिसभा सदस्य पद रिक्त छ । २०५६ सालको प्रतिनिधिसभाको निर्वाचनपछि लगातार निर्वाचन जित्दै आएका नेम्वाङको निधन भएपछि एमालेले कसलाई उम्मेदवार बनाउने भन्ने विषयमा आन्तरिक 'रिसर्च' गर्दै आएको छ ।

नेम्वाङको निधन भएपछि उनका छोरा सुहाङ नेम्वाङलाई एमालेले उपनिर्वाचनमा प्रतिस्पर्धी बनाउने चर्चा एमालेभित्र छ । तर, एमाले इलामका अध्यक्ष महेश बस्नेत भने उपनिर्वाचनमा पार्टीको तर्फबाट कसलाई उम्मेदवार बनाउने भनेर छलफल सुरु नभएको बताउँछन् ।

'मानसिक रूपबाट चुनाव हुन्छ भनेर हामी अगाडिदेखि नै तयार थियौँ । हामीले निरन्तर चुनाव जित्दै आएको ठाउँ भएकाले हामी सांगठनिक रूपमा समेत निर्वाचनको तयारी गर्दै आएका छौँ,' बस्नेतले शिलापत्रसँग भने, 'उम्मेदवारको विषयमा भने अहिले पार्टीमा छलफल सुरु भएको छैन । अब मिति घोषणा भएको छ, उम्मेदवारको विषयमा पार्टीले छलफल सुरु गर्छ ।'

नेकपा एमालेबाट नेम्वाङका छोरा सुहाङ बलिया दाबेदार हुन् । उनले यसअघिनै ‘अवसर आयो भने खुट्टा कमाउँदिनँ’ भनिसकेका छन् । एमाले अध्यक्ष केपी शर्मा ओली पनि सुहाङलाई टिकट दिन सकारात्मक रहेकाे बताइन्छ । फेरि, एमालेमा कुनै नेताको निधन भए परिवारका कोही कसैलाई अवसर दिने थिति नै बसेको छ । यसले गर्दा पनि उपचुनावमा सुहाङ उम्मेदवार बन्ने सम्भावना धेरै छ ।

उनी अधिवक्ता हुन् । उनका बुबा सुवास त वरिष्ठ अधिवक्ता नै थिए । बाजे पनि जिल्ला न्यायाधीश थिए । कानुनी पारिवारिक पृष्ठभूमिका सुहाङ बुबा सुवासजसरी यसपटक राजनीतिमा आउन चाहिरहेका छन् । राजनीतिक उचाइ लिने उपयुक्त अवसर यही हो भन्ने सुहाङलाई लागेको हुन पनि सक्छ ।

इलाममा भएको बुबा सुवासको श्रद्धाञ्जलीसभामा पुगेर उनले भनेका थिए, ‘बुबाका अधुरा सपना धेरै छन् । ती सपना पूरा गर्नका लागि म लागिपर्नेछु ।’ यो अभिव्यक्तिले पनि उनी राजनीतिमा आउन चाहेको त्यतिबेलै चर्चा भएको थियो ।

तर, एमालेकै एक थरी नेताहरू सुहाङलाई टिकट दिन हुँदैन भनेर कस्सिएर लागेका छन् । सुवासका कारण अढाई दशकसम्म अवसर नपाएको र यदि सुहाङले टिकट पाएर चुनाव जिते भने थप तीन दशक अवसर नपाउने चिन्ता उनीहरूमा छ । सुहाङको राजनीतिक तथा सामाजिक योगदान पनि चुनाव क्षेत्रमा नभएकाले उनलाई टिकट दिन नहुने उनीहरूको मत छ ।

गत वर्षको ४ मंसिरमा भएको निर्वाचनमा सत्ता गठबन्धनबाट उम्मेदवार बनेका नेपाली कांग्रेसका इलाम सभापति डम्बर खड्का झिनो मतान्तर (११४ मत)ले पराजित भएका थिए । त्यसबेला सुवासले ३० हजार २० मत र डम्बरले २९ हजार ९०६ मत पाएका थिए ।

कांग्रेसका डम्बरलाई त्यसबेला नेकपा (माओवादी केन्द्र), नेकपा (एकीकृत समाजवादी) र जनता समाजवादी पार्टी (जसपा)को समर्थन थियो । समानुपातिकमा माओवादीले ५ हजार १५३, जसपाले ९०६ र नेकपा एसले ५८६ मत प्राप्त गरेका थिए । यी तीन दलको कूल मत ६ हजार ६४५ मत हो ।

रास्वपाका उम्मेदवार प्रकाश सापकोटाले एक हजार ३८० मत पाएका थिए । मङ्गोेल नेशनल अर्गनाइजेशनका उम्मेदवार मनिबहादुर लिम्बूले एक जहार ३६३, राष्ट्रिय जनमुक्ति पार्टीका उम्मेदवार खड्गप्रसाद पालुङ्वाले एक हजार २७२ मत र जसपाका उम्मेदवार यामप्रसाद लिम्बूले ७२४ मत पाएका थिए । कुमार लिङ्देन नेतृत्वको सङ्घीय लोकतान्त्रिक राष्ट्रिय मञ्चका उम्मेदवार गोविन्द लिम्बूले ६८४ मत र राप्रपा उम्मेदवार गणेश दुलालले ५१० मत पाएका थिए ।

प्रकाशित मिति: आइतबार, फागुन १३, २०८० १६:०५