कांग्रेसमा होडबाजीको चियापान, पार्टी सत्ताको कसरी गर्ने 'रसपान' ?

A+ A A-

नेपाली कांग्रेसका महासमिति सदस्यहरूको सम्मानमा पूर्व महामन्त्री डा शशांक कोइरालाले शनिबार काठमाडौंमा चियापान आयोजना गरे । चियापानमा पार्टीको नेताहरूको भिड लाग्यो । सभापति शेरबहादुर देउवा, महामन्त्रीहरू गगन थापा र विश्व प्रकाश शमा, नेता शेखर कोइराला, कृष्ण सिटौला, प्रकाशमान सिंह, गोपालमान श्रेष्ठलगायतका नेता तथा कार्यकर्ताहरूको बाक्लो जमघट भएको थियो ।

चियापान समारोहमा सम्बोधन गर्दै शशांकले मुलुकको भविष्य कांग्रेससँग भएकाले पार्टीलाई एकढिक्का बनाएर अगाडि बढाउनुपर्नेमा जोड दिए । ‘महासमितिसँगै उत्साह र उमंग बोकेर जिल्ला जाऔँ, आउँदो निर्वाचनमा कांग्रेसलाई सर्वश्रेष्ठ पार्टी बनाऔँ’, डा. कोइरालाले भने ।

उनले सभापति शेरबहादुर देउवाले पार्टीभित्र सबैलाई मिलाएर अगाडि लाने बताए । मुलुकको भविष्य नेपाली कांग्रेससँग भएको जिकिर गर्दै उनले देशको भविष्य कांग्रेससँग भएकाले पार्टीलाई एकढिक्का बनाएर अगाडि बढाउनुपर्नेमा जोड दिए ।

महासमिति सदस्यहहरूलाई उत्साह बोकेर फर्कन भन्दै आगामी निर्वाचनमा कांग्रेसलाई पहिलो दल बनाउन अनुरोध गरे । कांग्रेस एकढिक्का भए यसलाई कुनै शक्तिले हराउन नसक्ने उनले बताए ।

कांग्रेसको महासमिति बैठक ७ देखि १० फागुनसम्म ललितपुरको गोदावरीमा भएको थियो । महासमिति बैठक लक्षित चियापान कार्यक्र महासमिति बैठक उद्घाटनको अघिल्लो दिन ६ फागुनमै शेखर कोइरालाले सुरु गरेका थिए । बीपी अध्ययन प्रतिष्ठानले आयोजना गरेको चियापान कार्यक्रममा शेखर प्रमुख अतिथि थिए भने सहमहामन्त्री भीष्म आङ्दम्बे, केन्द्रीय सदस्यहरू बलबहादुर केसी, मिनेन्द्र रिजाल, दिपक गिरी, चन्द्र भारी, मञ्जु खाँण, रुपा विक, सरिता प्रसाईं, मधु आचार्य, रुक्मणी कोइराला, दिनेश कोइराला, गणेश लामा, गण्डकी प्रदेश सभापति शुक्रराज शर्मा लगायतका नेताहरू उपस्थित थिए ।

महासमिति बैठकको मञ्चबाट सभापति पत्नी आरजु राणा देउवाले महिलाहरूका लागि आयोजना गर्ने चियापानको जानकारी मुख्य सचिव कृष्ण पौडेलले गराएका थिए । आरजुले भव्य दिवा भोज नै आयोजना गरिन् । उनले निर्वाचन कानुनसम्बन्धी छलफल पनि सँगै गरिन् ।

chiyapan arju1708778077.jpg

आरजु आगामी महाधिवेशनबाट पार्टीको प्रभावशाली पदाधिकारी बन्न चाहान्छिन् । महासमितिमा पनि ३३ प्रतिशत महिला अनिवार्य हुनुपर्ने आवाज उठेको छ । उनीहरूले पदाधिकारीमा महिलाको संख्या थप हुनुपर्ने धारणा राखे । महामन्त्री र उपसभापतिमा एक एक जना महिला अनिवार्य गर्न र यो व्यवस्था पार्टीको सबै समितिमा अनिवार्य गर्नुपर्ने माग उनीहरूको थियो ।

बझाङबाट प्रतिनिधित्व गरेकी महासमिति सदस्य चन्द्रा बीसीले पदाधिकारीमा महिला सहभागिता ३३ प्रतिशत किन नपुराएको भन्दै प्रश्न गरेकी थिइन् । सिन्धुलीबाट प्रतितिनिधित्व गरेकी गंगा दाहालले ४० प्रतिशत महिला पार्टीमा क्रियाशील भएको भन्दै एक तिहाई सहभागिताको प्रश्न उठाएकी थिइन् ।

सर्लाहीबाट महासमिति सदस्य पम्फा लामा श्रेष्ठले महिलालाई समानुपातिकमा मात्र राखेको भन्दै प्रत्यक्षमा पनि अवसर दिएर ‘आशन र भाषणमा’ मात्र होइन शासनमा पनि महिलालाई अवसर दिनुपर्ने बताएकी थिइन् । सुर्खेतबाट प्रतिनिधित्व गरेकी रेणु आचार्यले महिलाहरूको प्रतिनिधित्व ५० प्रतिशत हुनुपर्ने माग गरेकी थिइन् ।

फलाम तातेको बेलामा हिर्काउनपर्छ भनेर आरजु चियापानसँगै कानुनको छलफलमा जुटिन् । महिला प्रतिनिधित्व पार्टीमा मात्र नभएर संसदमा समेत हुनुपर्नेमा उनीहरूले छलफल गरे । यो आरजुको रणनीतिक चाल थियो ।

sirjana chiyapan1708778076.jpg

त्यस्तै पूर्व उपसभापति प्रकाशमान सिंहकी पत्नि सिर्जना सिंहले पनि चियापानको आयोजना गरेकी थिइन् । उनले नेपाल महिला संघकी संस्थापक अध्यक्ष (उनकी सास) मंगलादेवी सिंहको फोटो फ्रेम र नारी संघर्षका पाइलाहरू पुस्तक हस्तान्तरण तथा चियापान कार्यक्रम राखेकी थिइन् । सो कार्यक्रमबारे पनि महासमिति बैठकको समापन समारोहबाट जानकारी गराइएको थियो ।

शशांक-देउवा सम्बन्ध

शशांकको नाममा शनिबार चियापान भए पनि सभापति देउवाको धन्यवाद समारोह थियो त्याे । देउवाले आफ्नो उत्तराधिकारीको रुपमा पार्टीभित्रबाट कोही नेता चुनिनसकेको अवस्थामा संस्थापन समूहभित्र उत्तराधिकारी बन्ने प्रतिस्पर्धा छ ।

यस्तोमा शशांकले एक फड्को मारिसकेका छन् । किनकी पार्टीको १४ औं महाधिवेशनमा शशांकले जोखिम मोल्दै कोइराला परिवारका शेखर कोइरालालाई असहयोग गरेका थिए । उनी खुलेर देउवाको पक्षमा पनि देखिएनन् । मौन रुपमा भित्रभित्रै देउवालाई सघाएका शशांकले १५ औं महाधिवेशनमा सभापतिको आकांक्षा देखाएका छन् । कहिले देश दौडाहा गर्छु भन्छन्, कहिले कार्यकर्ताले रुचाएमा बन्ने भन्छन् । कहिले कोइराला परिवार एक ठाउँमा छ भनेर प्रचार गर्छन् । देउवापछिको पार्टी सत्ता हातमा लिन उनी तयार छन् । देउवाकाे झुकाउ पनि शशांकतर्फ बढ्दै गएकाे शनिबारकाे दृश्यले पनि संकेत गरेकाे छ । दुई नेता शनिबार एउटा साेफामा लामै समय बसेका थिए ।

प्रकाशित मिति: शनिबार, फागुन १२, २०८० १९:००