उपचार खर्च जोहो गर्न नसकेका विकले गरे आर्थिक सहयोगको याचना

A+ A A-

दैलेख जिल्ला चामुण्डा वृन्दासैनी नगरपालिका तिलुखाना वडा नं ४ का स्थायी वासिन्दा रामबहादुर विक (वर्ष २९) यतिबेला रोगमाथि रोगले आक्रान्त हुँदा सहयोगको याचना गरिरहेका छन् । २०७६ सालमा मुटुका दुबै भल्ब (एरोटिक भल्ब रिप्लेस, एभिआर तथा माइट्रल भल्ब रिप्लेस, एमभिआर) गरेका विकलाई अहिले श्रवण शक्ति हराउँदै जाने अर्को रोगले च्याप्दै लगेको छ ।

विकले आफ्नो बलबुताले र अन्य शुभेच्छुकको मद्दतले स्वास्थ्य जाँच त गराए तर स्वास्थ्य जाँचपछि चिकित्सकको सल्लाहअनुसार उपचार गराउन पैसा नहुँदा समस्यामा परेका छन् ।

आर्थिक अवस्था कमजोर पृष्ठभूमिका विकले उपचार खर्च व्यहोर्न सक्ने स्थिति नै छैन । त्रिभुवन विश्वविद्यालय शिक्षण अस्पताल नाक, कान र घाँटी रोग विभागका चिकित्सकले विकलाई कोक्लियर इम्लान्ट गर्न सुझाएका छन् । चिकित्सकहरूले उनलाई २७ लाख रुपैयाँको प्रबन्ध गर्न सुझाएका छन् । उपचार गनै पैसा नभएपछि अहिले उनी दाता, सहयोगी र सहानुभवी, उदार हृदयका व्यक्तिहरूको खोजीमा छन् ।

उनले शनिबार रफत सञ्चार क्लबमा आयोजित एक अपिल कार्यक्रममा सरञ्चारकर्मीसामु यस्तै अनेकन दुखेसो पोख्दै भने, ‘ममा बाँच्ने शक्ति अझै प्रबल छ, हजुरहरूको माध्यमबाट सहयोग जुट्न सकेको खण्डमा म मेरो सानो परिवारलाई लालनपालन गरेर उनीहरूलाई यो देशको सक्षम नागरिक बनाउने धोको रहेको छ ।’

रामबहादुर विकले आफूलाई सहयोग, दान वा दातब्य दिन चाहने उदार हृदयका महानुभावहरूलाई राष्ट्रिय वाणिज्य बैकको खाता नं ५१५०१०००००१५१०१० मा गसहयोग राशि जम्मा गरिदिन वा सिधा सम्पर्क गर्न चाहेमा मोबाइल नम्बर ९७०३९५७८०३ र ९८१४५३७५७७ फोन गर्न आग्रह गरेका छन् । हाल उनी भक्तपुर नगरपालिकाको देकोचोमा दयनीय अवस्थामा डेरा गरेर बसेका छन् ।