मध्यपश्चिम र सुदूरपश्चिम विश्वविद्यालय: आफ्ना मान्छे उपकुलपति नबन्ने भएपछि प्रक्रिया नै स्थगित

मध्यपश्चिम र सुदूरपश्चिम विश्वविद्यालय: आफ्ना मान्छे उपकुलपति नबन्ने भएपछि प्रक्रिया नै स्थगित

A+ A A-

मध्यपश्चिम विश्वविद्यालय तथा सुदूरपश्चिम विश्वविद्यालयको उपकुलपति नियुक्तिका लागि दरखास्त प्रक्रिया गत आइतरबार स्थगित गरियो । विश्वविद्यालय अनुदान आयोगका अध्यक्ष देवराज अधिकारी संयोजकत्वको सिफारिस समितिले प्रक्रिया नै स्थगित गर्ने निर्णय गर्‍यो ।

दुवै विश्वविद्यालयका लागि ९/९ जनाले आवेदन दिएका थिए । स्रोतका अनुसार सत्तारुढ दलका शीर्ष नेताको दबाबमा प्रक्रिया नै स्थगित गरिएको हो । प्रक्रिया स्थगित गर्नुको कारण भने सिफारिस समितिले खुलाएको छैन ।

vccccccccc noticeeeeee1708598594.png

तर, स्रोतका अनुसार प्राध्यापक संघ संगठनको चर्को दबाबपछि प्रधामन्त्री पुष्पकमल दाहालले पनि प्रक्रिया रोक्न भनेका हुन् । दुवै विश्वविद्यालयमा कांग्रेस र माओवादीका नेताले आफ्नो मान्छे उपकुलपति बनाउन चाहेका छन् । सुदूरपश्चिम विश्वविद्यालयमा कांग्रेस सभापति शेरबहादुर देउवाले आफू निकटकोलाई उपकुलपति बनाउन चाहेको प्राध्यापकहरू बताउँछन् । ‘राजनीतिक लडाइँले प्रक्रिया स्थगित गरिएको हो । ठूला नेता आफूनिकटकोलाई उपकुलपति बनाउन चाहन्छन्,’ सुदूरपश्चिम विश्वविद्यालयका एक प्राध्यापकले भने । यता मध्यपश्चिममा माओवादी र कांग्रेस दुवैको दाबी छ ।

प्रक्रिया रोक्नका लागि प्राध्यापकहरू पनि सक्रिय भएका थिए । प्राध्यापक संघ संगठनले प्रक्रिया रोक्न संसदीय समितिमा निवेदन नै दिएका थिए । एउटै नियमअनुसार पनि त्रिभुवन विश्वविद्यलाय, पूर्वाञ्चल विश्वविद्यालय, मध्यपश्चिम र सुदूरपश्चिममा मापदण्ड फरक भएको भन्दै रोक्न प्राध्यापकहरूले लबिङ गरेको बताउँछन् ।

अनुसन्धानमा त्रिविमा ६, पूर्वाञ्चलमा १५, सुदूरपश्चिम र मध्यपश्चिम विश्वविद्यालयमा अनुसन्धानलाई ३५ अंक छुट्याएको छ । ‘जो मान्छेलाई ल्याउन खोजेको हो, याे मापदण्डभित्र पर्ने नदेखिएपछि स्थगित गरिएको हो,’ एक प्राध्यापकले भने ।

सुदूरपश्चिम विश्वविद्यालयका उपकुलपति अम्मरराज जोशीको १८ फागुनमा र मध्यपश्चिम विश्वविद्यालयका उपकुलपति नन्दबहादुर सिंहको १७ फागुनमा कार्यकाल सकिँदै छ । प्रक्रिया नै रोकिएपछि अब कहिले नयाँ प्रक्रिया सुरु गर्ने भन्ने तय भएको छैन ।