राहुल गान्धीले पटक–पटक ऐश्वर्या रायको नाम लिएर भाषण गरेपछि‍...

A+ A A-

भारतीय कांग्रेसका पूर्वअध्यक्ष तथा लोकसभा सांसद राहुल गान्धी अचेल 'भारत जोडो न्याय यात्रा'मा छन् । भ्रमणका क्रममा उनले आरक्षण, बेरोजगारी र उद्योगपतिसँगको सम्बन्धलाई लिएर मोदी सरकारलाई निशाना बनाएको देखिन्छ ।

राहुलले आफ्नो वक्तव्यमा ओबीसी समुदाय र गरिबहरूको मुद्दा पनि उठाउने गरेका छन् । यस क्रममा २२ जनवरी २०२४ मा श्री राम मन्दिरमा भएको प्राण प्रतिष्ठा कार्यक्रमलाई लिएर उनले दिएको बयान यतिबेला चर्चामा छ ।

आफ्नो भ्रमणका क्रममा गान्धीले श्री राम मन्दिरको कार्यक्रममा कुनै गरिब, पिछडिएको, दलित वा आदिवासीलाई नदेखेको भए पनि अमिताभ बच्चन, ऐश्वर्या राय र गौतम अडानीलगायतका उद्योगपतिहरू अवश्य देख्नुभएकाे हाेला भनेर धेरैपटक भाषण ठाेकेका छन् ।

तर, श्रीराम मन्दिरको प्राण प्रतिष्ठाका लागि आयोजित कार्यक्रममा ऐश्वर्या राय र गौतम अडानी सहभागी भएका थिएनन् । अहिले भारतकी केन्द्रीय मन्त्री स्मृति इरानी र गायिका सोना महापात्राले राहुलको भनाइप्रति आपत्ति जनाएका छन् ।

राहुल गान्धीले ऐश्वर्या रायको बारेमा कहिले के भने ?

फेब्रुअरी १२ मा राहुल गान्धीले छत्तीसगढको कोरबामा भनेका थिए, ‘तपाईंले राम मन्दिरको उद्घाटन समाराेह देख्नुभएको होला । त्यसमा गरिब मान्छे देख्नुभयो ? मैले अमिताभ बच्चनलाई देखेँ । ऐश्वर्या राय देखिएकी थिइन् । अडानी पनि देखा परे । अम्बानी देखिए । सबै व्यवसायीहरू देखिन्थे । मैले त्यहाँ गरिब मान्छे देखेन । सबै अर्बपतिहरू देखिन्थे ।'

यसपछि पनि राहुलले भ्रमणका क्रममा धेरैपटक भनेका थिए, ‘मिडियाले हाम्रो दृष्टिकोण देखाउँदैनन् । तपाईंले २४ सै घण्टा मिडियामा नरेन्द्र मोदी जी देख्नुहुन्छ । ऐश्वर्या राय देख्नुहुन्छ । अमिताभ बच्चन मोदीकाे छेउमा घुमिरहेका देखिन्छन् ।' भ्रमणका क्रममा एकपटक राहुलले अझ अगाडि बढेर भनेका थिए, 'भारतको मिडियामा गरिबलाई नदेखाउनुहोस् । देखाउन चाहनुहुन्छ भने ऐश्वर्या रायलाई नाच्दै देखाउनुपर्छ ।'

राहुल गान्धीको यस्तो टिप्पणीलाई लिएर सामाजिक सञ्जालमा विभिन्न खाले प्रतिक्रियाहरू आइरहेका छन् ।

स्मृति इरानी र सोना महापात्राले के भने ?

स्मृति इरानी भारतकी सांसद हुन् । इरानीले २०१९ को लोकसभा चुनावमा राहुल गान्धीलाई पराजित गरेकी थिइन् । इरानीले एक निजी च्यानलसँग कुरा गर्दै राहुल गान्धीले ऐश्वर्या रायलाई लिएर दिएको बयानबारे प्रतिक्रिया दिएकी छन् ।

‘यो निकै नराम्रो कुरा हो । मैले आजसम्म राहुल गान्धीको लागि यो शब्द प्रयोग गरेको छैन । आफ्नो बुबाको साथीको बुहारीलाई अपमान गर्न नछोड्ने व्यक्तिबाट के आशा गर्ने ?'

सोना महापात्राले पनि राहुलको भनाइमा टिप्पणी गरेकी छिन् ।

सोनाले सामाजिक सञ्जालमा लेखेकी छन्, ‘केही राजनीतिज्ञहरूले राजनीतिक फाइदा उठाउन आफ्नो भाषणमा महिलाको अपमान गरिरहेका छन् । प्रिय राहुल गान्धी, पक्कै पनि कसैले तपाईंको आमा र बहिनीलाई विगतमा यसरी अपमान गरेको हुनुपर्छ । राम्रोसँग थाहा हुनुपर्छ । र हो, ऐश्वर्या राय निकै सुन्दर नृत्य गर्नुहुन्छ ।'

कर्नाटक बीजेपीको सोशल मिडिया ह्यान्डलले पनि ऐश्वर्या रायलाई लिएर राहुल गान्धीको बयानको निन्दा गरेको छ ।

ऐश्वर्या राईले सन् १९९४ मा मिस वर्ल्डको उपाधि जितेकी थिइन् । उनले धेरै हलिउड फिल्ममा पनि अभिनय गरेकी छिन् । यस्तो अवस्थामा राहुल गान्धीले भारतको गौरव ल्याएको ऐश्वर्याको अपमान कसरी गर्न सक्छन् भनेर सामाजिक सञ्जालका प्रयाेगकर्ताहरूले पनि प्रश्न गरेका छन् ।

प्रकाशित मिति: बिहीबार, फागुन १०, २०८० १५:५९