किसानलाई अलैंची भित्र्याउने चटारो

A+ A A-

तेह्रथुमका किसानहरूलाई कालो सुनले परिचित अलैंची भित्र्याउने चटारो सुरू भएको छ । गत वर्ष मूल्यमा गिरावट आएर निराश बनेका किसान यस वर्ष भने राम्रो मूल्य पाउने आशामा छन् ।

केही वर्षअघि १ लाख ५ हजार रुपैयाँप्रतिमनसम्म पुगेको अलैंचीको मूल्य खस्किँदा किसानमा निराशा छाएको थियो । तर पनि, थोरै लगानीमा धेरै आम्दानी लिन सकिने भएकाले किसानहरूले अलैंची खेती नै रोजेका छन् ।

वैदेशिक रोजगारका लागि विभिन्न मुलुकमा गरेको श्रम गाउँमै गरे राम्रो आम्दानी हुने सोचका साथ अलैंची खेती सुरू गरेको छथर गाउँपालिका–६ का कमल मगरले बताए । उनले भने, ‘विदेश गएर फर्किए पनि यहाँ आएर दुःखै गर्ने हो । हामी कृषिमै निर्भर छौं । त्यसैले केही वर्ष बाहिर बसेर समय बिताउनुभन्दा बेलैदेखि अलैंची खेती सुरू गरेको हुँ । आफ्नो भनेको दिर्घकालीन पनि हो ।’

किसानहरूले पाखो बारीदेखि लिएर करेसाबारीसम्म अलैंची खेती लगाउँदै आएका छन् । खाली जमिन तथा ओसिलो ठाउँमा यो खेतीलाई बिस्तार गर्दै आएको किसानहरूले बताउने गरेका छन् । स्थानीय किसानले ५ देखि ५० रोपनीसम्मको क्षेत्रफलमा अलैंची खेती गर्दै आएको र अन्नबालीभन्दा यसले नै राम्रो आम्दानी भएकाले अलैंची खेती नै रोजेको छथर गाउँपालिका–६ सुदापका जीवन मगरले बताए । उनले भने, ‘अन्य खेतीभन्दा अलिक सजिलो मलाई यो खेती लाग्यो । त्यसैले गरेको हुँ । यहाँ निकै अलैंची खेती हुन्छ ।

जग्गा हुनेले ५० रोपनीभन्दा बढीमा खेली लगाएका छन् ।’ जिल्लामा ७ सय २३ हेक्टर क्षेत्रफलमा अलैंचीको खेती गर्दै आएका किसानहरूको समस्या समाधानका निम्ती सरकारले अलैंचीको गुणस्तरअनुसार मूल्य निर्धारण गरी बजार व्यवस्थापन गर्न सके मात्र किसानहरूलाई राहत मिल्ने किसान नारायण लिम्बूले बताए ।

उनले भने, ‘जुनसुकै कृषि उत्पादनमा पनि कृषक मारमा पर्ने भनेको मूल्यले नै हो । सरकारी स्तरबाटै उचित मूल्य निर्धारण र बजार व्यवस्थापन भए अरू केही चाहिँदैन ।’ यतिबेला बजारमा अलैंची २८ हजारदेखि ३२ हजार रुपैयाँ प्रतिमनमा खरिद बिक्री हुँदै आएको व्यापारीहरूले बताएका छन् ।

नयाँ अलैंची भित्र्याएसँगै अब अलैंचीको मूल्य बढ्ने आशमा उनीहरू छन् । जिल्लाका ईवा, ह्वाकु, संक्रान्ति, खाम्लालुङ एक दर्जन गाउँमा बगानकै रूपमा सयौं हेक्टरमा व्यावसायिक अलैंची खेती हुँदै आएको छ ।

प्रकाशित मिति: बुधबार, असोज २९, २०७६ १४:१४