मेस्सीले आफ्नो आठौँ बालन डी’अर पनि दानमा दिए

A+ A A-

अर्जेन्टिनी स्टार लियोनल मेस्सीले आफ्नो आठौँ बालन डी’अर अवार्ड पनि दान गरेका छन् । बालन डी’अर विश्वकै सबैभन्दा प्रतिष्ठित व्यक्तिगत फुटबल अवार्ड हो । हरेक फुटबलर यो अवार्ड एकपटक भए पनि जित्न चाहन्छन् ।

मेस्सीले भने आफूले जितेका सबै बालन डी’अर अवार्ड दानमा दिएका छन् । स्मरण रहोस्, मेस्सी यो अवार्ड सबैभन्दा बढी आठपटक जित्ने कीर्तिमानी खेलाडी हुन् । मेस्सीपछि क्रिस्टियानाे रोनाल्डोले पाँचपटक यो अवार्ड हात पारेका छन् ।

गोल डटकमका अनुसार पहिलेका ७ वटा बालन डी’अर मेस्सीले आफ्नो पूर्व क्लब बार्सिलोनाको संग्रहालयलाई दानमा दिएका थिए । उनले इन्टर मायामी क्लबमा हुँदा पाएको बालन डी’अर पनि बार्सिलोनाको संग्रहालयलाई दिएका हुन् ।

मेस्सीले गतवर्ष युवा स्टार अर्लिङ हालान्ड र केलिएन एम्बाप्पेलाई उन्छिनै आठौँ बालन डी’अर हात पारेका थिए । मेस्सीले यतिबेला आफ्नो वाचा पूरा गरेको टिप्पणी हुन थालेको छ । किनभने मेस्सीले एकपटक भनेका थिए, ‘मैले जे हासिल गरेको छु त्यो सबै बार्सिलोनाको हो । बालुन डी’ओर, गोल्डेन बुट सबै उपाधि बार्सिलोनाको संग्राहलयमा छ ।’

वास्तवमा मेस्सी स्पेनको बार्सिलोना फुटबल क्लबलाई आफ्नो दोस्रो घर मान्छन् । मेस्सीले २१ वर्षसम्म बार्सिलोनाबाट फुटबल खेलेका थिए, उनलाई क्लब छाड्ने चाहना थिए । उनी आफूले पाउँदै आएको तलबको ५० प्रतिशत तलब कटौती गर्न सहमत थिए, तर ठूलो ऋणमा भएका कारण बार्सिलोनाले मेस्सीलाई सन् २०२१ मा गुमाउनु पर्‍याे, मेस्सीलाई तलब दिने स्थितीमा बार्सिलोना थिएन ।

मेस्सी बार्सिलोनाका सर्वाधिक गोलकर्ता हुन्, उनले उक्त क्लबबाट ६७२ गोल गरेका थिए । बार्सिलोनाले पाँचपटक यूईएफए च्याम्पियन्स लिग जितेको छ । मेस्सीको उपस्थितिमै बार्साले चारपटक यो उपाधि हात पारेको थियो । यस्तै मेस्सीले बार्सिलोनाबाट १० ला लिगा, ७ कोपा डेल रे, ८ स्पेनिस सुपरकप, ३ युरोपियन सुपर कप र ३ क्लब विश्वकप उपाधि हात पारेका थिए ।

वास्तवमा फुटबल क्लब बार्सिलोनाकै सम्मानमा मेस्सीले आफ्ना सबै बालन डी’अर उक्त क्लबको संग्रहालयलाई दान दिएका हुन् ।

प्रकाशित मिति: बुधबार, फागुन ९, २०८० १४:००