युद्धविरामको विपक्षमा भिटो प्रयोग भएपछि चीनले भन्यो- अमेरिकाले हत्यालाई समर्थन जनायो

युद्धविरामको विपक्षमा भिटो प्रयोग भएपछि चीनले भन्यो- अमेरिकाले हत्यालाई समर्थन जनायो

A+ A A-

हमास र इजरायलबीच जारी युद्ध रोकिनुपर्छ भन्ने युद्धविरामको प्रस्तावलाई अमेरिकाले फेरि अस्वीकार गरिदिएको छ । अमेरिकाले गत वर्षको अक्टोबर ७ यता जारी गाजा युद्धमा संयुक्त राष्ट्रसंघ सुरक्षा परिषद्‌मा दोस्रोपटक भिटो शक्ति प्रयोग गरेको हो ।

यसपटक अल्जेरियाले सुरक्षा परिषद्‌मा युद्धविरामको प्रस्ताव गरेको थियो । सुरक्षा परिषद्‌का १५ सदस्यमध्ये १३ राष्ट्रले युद्ध विरामको पक्षमा मत दिँदा बेलायत यो प्रक्रियामा सहभागी भएन । मंगलबार अमेरिका एक्लै युद्धविरामको विपक्षमा थियो, अमेरिकाले आफ्नो विशेषाधिकार भिटो प्रयोग गरेसँगै राष्ट्रसंघको युद्धविरामको प्रस्ताव अस्वीकृत भइसकेको छ ।

राष्ट्रसंघ सुरक्षा परिषद्‌को स्थायी सदस्य अमेरिकालाई भिटो शक्ति दिइएको छ, जसले बहुमतको निर्णयलाई पनि एक्लैले विरोध गर्ने समार्थ्य राख्छ । अमेरिकासँगै अन्य स्थायी सदस्य चीन, रुस, फ्रान्स र बेलायतसँग पनि भिटो शक्ति छ ।

सुरक्षा परिषद्‌को स्थायी सदस्य अमेरिका जसले विश्वमा शान्ति कायम गर्ने वाचा गरेको छ, उसैले गाजामा जारी युद्धलाई रोक्ने र मानवीय सहायता बढाउने कार्यलाई रोकिदिएपछि उसको विश्वभर आलोचना सुरु भएको छ । अमेरिकाले विश्वमा शान्ति कायम गर्छु भनेर कसम खाएको तर उसैले गाजाका मानिसहरू मरेको हेर्न चाहेको भन्दै टिप्पणी हुन थालेका छन् ।

गत डिसेम्बरमा र हिजो (मंगलबार) दुवै पटक अमेरिकाले युद्धविराम हुनु हुँदैन भनेर भिटो शक्ति प्रयोग गर्दा चीन भने रुष्ट बनेको छ । गाजामा तत्काल युद्धविरामको मागलाई अमेरिकलो भिटो गरेपछि चीनले भनेको छ, ‘यो कदमले अमेरिकाले निरन्तर हत्यालाई समर्थन जनाउँछ भन्ने सन्देश दिएको छ ।’

संयुक्त राष्ट्रसंघका लागि अमेरिकी राजदूत लिन्डा थोमस ग्रिनफिल्डले भने इजरायल र हमासबीच कुराकानी भइरहेकाले तत्काल युद्धविरामको आह्वान गर्ने उपयुक्त समय नभएको टिप्पणी गरेकी छन् । युद्ध अन्त्यका लागि भइरहेका वार्तालाई यो प्रस्तावले खतरामा पार्ने अमेरिकी टिप्पणी छ ।

अमेरिकाले आफ्नो प्रस्तावमा १५ लाख प्यालेस्टाइनीले शरण लिइरहेको रफाह क्षेत्रमा प्रवेश नगर्न इजरायललाई सचेत पनि गराएको छ ।

तर, इजरायलले भने १० मार्चसम्म सबै इजरायली बन्धकलाई नछाडिए रफाहमा आक्रमण गर्ने चेतावनी दिएको छ । हमास र इजरायलबीच गत अक्टोबर ७ यता जारी युद्धमा २९ हजार प्यालेस्टाइनी र इजरायलतर्फ १२ सयले ज्यान गुमाएका छन् । गाजामा इजरायली आक्रमण यति व्यापक छ कि त्यहाँका संरचना पूर्ण रूपमा ध्वस्त भएका छन् ।

प्रकाशित मिति: बुधबार, फागुन ९, २०८० १२:४७