पोखरा महानगरको पर्खालमा युवतीको सन्देश : तँहरूले गर्दा दुर्घटना भयो, सीसीटीभी चेक गर्

पोखरा महानगरको पर्खालमा युवतीको सन्देश : तँहरूले गर्दा दुर्घटना भयो, सीसीटीभी चेक गर्

A+ A A-

तीन दिनअघि पोखरा महानगरपालिकाको कार्यालयमा एउटा यस्तो घटना भयो जसबारे त्यहीँका धेरै कर्मचारीलाई थाहा छैन । महानगरपालिकाको प्रवेशतर्फको पर्खालमा लेखिएको सन्देश गत ६ फागुन बिहानै मेयर धनराज आचार्यको कानमा पुग्यो । महानगरपालिकाको भित्तामा लेखिएको थियो, ‘सिर्जनाचोकको सीसीटीभी चेक गर् । तँहरूले गर्दा मेरो एक्सिडेन्ट भएको हो ।’

यसरी लेखिएको थाहा पाएपछि मेयर आचार्यले त्यसलाई तत्काल रङ लगाएर मेटाउन निर्देशन दिए । उनको निर्देशनअनुसार नै गत ६ फागुन बिहान १० बजे रङ लगाएर त्यो सन्देश मेटाइयो । यो सन्देश ५ फागुन शनिबार रातिदेखि ६ फागुन आइतबार बिहानसम्म लेखिएको हो । त्यसरी किन लेखियो होला भन्नेबारे बुझौँ । यसमा दुई वटा कारण हुन सक्छन् ।

पहिलो, आकाशे पुल

पोखराको सिर्जनाचोकमा एउटा आकाशे पुल छ जुन प्रयोगमा निकै कम आउँछ । त्यही पुलको एउटा पोल सडकको बीचमा बनाइएको छ । त्यहाँ ठोक्किएर दुर्घटना हुने गरेका छन् । त्यसरी नै दुर्घटनामा परेकामध्ये कोही एक जनाले त्यो सन्देश लेखेको हुनसक्ने अनुमान छ ।

दोस्रो, चोक आसपासका खाल्डा

खानेपानी आयोजनाको काम चलिरहेकाले पोखराको ठाउँठाउँमा पाइपलाइन खनिएका छन् । सिर्जनाचोकमा खानेपानी आयोजनाको कामका लागि खाल्डो खनेर त्यत्तिकै छोडिएको छ । त्यही खाल्डोमा परेर दुर्घटनामा परेकामध्ये कसैले त्यसरी सन्देश लेखेको हुनसक्छ ।

जिल्ला ट्राफिक प्रहरी कार्यालय कास्कीको तथ्यांकअनुसार सिर्जनाचोकको एक सय मिटर आसपास चालु आर्थिक वर्षको साउनदेखि मंगलबारसम्म ४२ वटा दुर्घटना भएका छन् । यही दुर्घटनामा परेकामध्ये कसैले वा प्रहरीको अभिलेखमा नभएकाले पनि सन्देश छोड्ने सम्भावना छ । जसरी महानगरपालिकाको पर्खालमा मध्यरातमा कसैले सन्देश लेख्ने आँट गरेको छ त्यो हेर्दा दुर्घटनाले निकै पीडा दिएको बुझ्न सकिन्छ ।

यसरी पर्खालमा कसैले सन्देश छोडेको विषय पोखरा महानगरपालिकाका धेरै कर्मचारीलाई थाहै छैन । ‘आइतबार अफिस आउँदा बाहिर रङ लगाएको देखेको हो । त्यस्तो के लेखेको भन्ने त थाहा भएन,’ ती कर्मचारीले शिलापत्रसँग भने । अर्का कर्मचारीले आफूले पनि रङ लगाएको देखेको तर पर्खालमा लेखिएकोबारे मंगलबार बिहानमात्र सुनेको बताए ।
यो घटनामा संलग्न एक जना युवतीलाई जिल्ला प्रहरी कार्यालय कास्कीले मंगलबार नियन्त्रणमा लिएको थियो ।

महानगरपालिकाका प्रवक्ता मोती तिम्सिनाकाअनुसार ती युवतीलाई ‘किन यसरी लेखेको ?’ भनेर सोधपुछ गर्दा उनी बेहोस भएकी थिइन् । त्यसपछि उनलाई परिवारको जिम्मामा छोडियो । प्रवक्ता तिम्सिनाले बताएअनुसार ती युवतीको ५ महिनाअघि सिर्जनाचोकमा ट्रकले ठक्कर दिएर दुर्घटना भएको थियो । तर, ट्रकले ठक्कर दिएको अवस्थामा उनले किन महानगरपालिकासँग रोष पोखिन् खुल्न सकेको छैन ।

अर्को रोचक कुरा के छ भने जो युवतीले त्यसरी लेखिन् उनले दुर्घटनापछि महानगरसँग रिस पोख्दै आएकी छन् । उनले महानगरपालिकाअघि ल्याएर फोहोर फाल्ने गरेको भेटिएको प्रवक्ता तिम्सिनाले बताए । महानगरको पर्खालमा सन्देश लेखेपछि पनि उनी त्यहाँ फोहोर फाल्न आएकी थिइन् । ‘उनलाई महानगरपालिकासँग निकै चित्त दुखेजस्तो देखिन्छ । दुर्घटना ५/६ महिनाअगाडि ट्रकसँग ठोक्किएर भएको हो,’ उनले भने, ‘पछि फोहोर फाल्न आएको सीसीटीभीमा देखिएपछि उनको स्कुटर नम्बरको आधारमा भेटियो ।’ ती युवती दुर्घटनापछि मानसिक रूपमा विक्षिप्त रहेको बताइएको छ ।

प्रकाशित मिति: मंगलबार, फागुन ८, २०८० २०:५७