यातायातमा ‘लुट’ : लाग्ने भाडा ३६०, हजार तिर्दै यात्रु

A+ A A-

दोलखाको चरिकोटदेखि काठमाडौंसम्मको सार्वजनिक यातायातको भाडा दर ३ सय ६० रुपैयाँ हो । तर दसैंको मौका छोपेर यातायात व्यवसायीले १ हजारसम्म भाडा असुलेका छन् ।

दसैं मनाउन गाउँ गएकाहरु काठमाडौं फर्किन थालेका छन् । बिहानैदेखि चरिकोट बजारमा काठमाडौं फर्किने यात्रुको भीड लाग्छ ।

आइतबार पनि चरिकोट बजारमा यात्रुको भीड थियो । यात्रुहरु टिकट काउन्टरमा पुग्थे । काउन्टरका कर्मचारीले टिकट छैन भन्दै फिर्ता पठाउँदै थिए । भोलि बिहान ५ बजे आउनुहोस् भन्दै यात्रुलाई फिर्ता पठाउँदै थिए ।

तर चरिकोटमा रहेको अरनिको यातायात सेवा समिति टिकट बुकिङ काउन्टर अगाडि सडकमा सार्वजनिक बसहरु लाइनबद्ध थिए ।

सहचालकहरु ‘हजारमा काठमाडौं, हजारमा काठमाडौं’ भन्दै चिच्याइरहेका थिए । त्यही काउन्टर अगाडि रिजर्भ लैजाने भन्दै प्रत्येक यात्रुसँग चालक र सहचालक प्रतियात्रु एक हजार उठाउँदै थिए । ३ सय ६० को टिकट काट्ने तर प्रतियात्रु हजार उठाउने गरेको यात्रुले गुनासो गरे ।

‘बिहानै आएको टिकट पाइएन,’ यात्रु नेत्रबहादुर खड्काले भने, ‘हजार–हजार उठाएर यात्रुलाई ठगिरहेका छन् ।’

बढी भाडा असुल्नेलाई कारबाही नभएको उनले गुनासो गरे ।

नेत्रबहादुर मात्र हैन सयौं यात्रु अलपत्र अवस्थामा थिए । बालबालिका, जेष्ठ नागरिक घन्टौदेखि सडकमा उभिएर बसेका थिए ।

त्यसपछि, हामीले प्रहरीलाई खबर ग¥यौं । पत्रकारको टोली हौं भनेपछि प्रहरीको टोली सिटी फुक्दै आयो । सडकमा यात्रुहरुको कोलाहल मच्चियो । हजार हजार भन्ने गाडी एकाएक गायब भए । टिकट काउन्टर समेत बन्द गरेर कर्मचारी बाहिर निस्किए ।

‘यहाँ सबैको मिलेमतो छ,’ यात्रु नेत्रबहादुरले भने, ‘सेटिङमा काम हुन्छ ।’

अरनिको यातायात सेवा समितिले भने बढी भाडा नलिएको दाबी गरेको छ ।

‘बढी भाडा लिएका छैनौं,’ समितिका कर्मचारी कृष्ण थपलियाले भने, ‘बढी भाडा लिएको टिकट ल्याउनुहोस् कारबाही गर्छाैं ।’

समितिले बढी भाडा नलिएको दाबी गरेपनि आइतबार काउन्टर अगाडि रहेका बसहरुले हजार हजारमा यात्रु हालिरहेको थियो ।

उता, प्रहरी चौकी सातदोबाटोले बढी भाडा लिने सवारीलाई कारबाही गरेको बताएको छ ।

बढी भाडा लिने ६ वटा बसलाई कारबाही गरेर २ सय ५ यात्रुले तिरेको बढी भाडा फिर्ता गराएको प्रहरी निरीक्षक रेशम बोहराले जानकारी दिए ।

‘बढी भाडा लिने बसलाई कारबाही गरेका छौं,’ उनले भने, २ सय ५ जनाबाट लिएको ७० हजार भन्दा बढी भाडा यात्रुलाई फिर्ता गरेका छौं ।’

यात्रुहरुको बिचल्ली हुँदा पनि सम्बन्धित निकायले सहजीकरण गरेको देखिएको थिएन । कतिपय यात्रुहरु ट्रकसँग लिफ्ट मागेर काठमाडौं फर्किदै थिए ।

प्रकाशित मिति: बुधबार, असोज २९, २०७६ ११:४३