भुटानसँगको सीमाक्षेत्रमा धमाधम बस्ती विस्तार गर्दै चीन

A+ A A-

चीनले एकपटक फेरि भुटानसँगको सीमाक्षेत्रमा आफ्नो बस्ती विस्तार सुरु गरेकाे छ । स्याटेलाइट तस्वीरहरूमा चीनले भुटानसँग सीमा विवाद समाधानको प्रयास भइरहेको बेला विवादित क्षेत्रमा नै आफ्नो गाउँ निर्माण गरेको देखिएको हो ।

चीन र भुटानबीच डोकलाम सीमा विवादपछि सीमा समस्या समाधानका लागि प्रयास भइरहेको छ । तर, यही समयमा उसले विवादित क्षेत्रमा नयाँ गाउँ निर्माण गरिरहेको हो । साउथ चाइना मर्निङ पोस्टका अनुसार चीन र भुटानलाई अलग गर्ने पहाडी क्षेत्रमा चीनले तीनवटा नयाँ गाउँ बनाएको छ, जसको आकार पहिलेको तुलनामा दुई गुणा ठूलो छ ।

चीनले गाउँ निर्माण गरेको क्षेत्र लामो समयदेखि दुई देशबीच सीमा विवाद भएको क्षेत्र हो । चीनले यहाँ १८ परिवारलाई ल्याएर राख्ने तयारी गरिरहेको छ । चीनले निर्माण गरेका सबै घरमा राष्ट्रपति सी चिनफिङको फ्रेम गरिएको फोटो लगाइएको छ । चिनफिङको चित्रपछि रातो ब्यानरमा चिनियाँ र तिब्बती भाषामा राष्ट्रपतिलाई स्वागत भनेर लेखिएको छ ।

तिब्बत फेडेरेसन अफ इन्डस्ट्री एन्ड कमर्सले आफ्नो वक्तव्यमा 'यो त्यहाँ गएका मानिसहरूको पहिलो समूह' भएको जनाएको छ, जसमा तिब्बतको शिगात्से क्षेत्रका ३८ परिवार थिए । भुटानसँगको सीमाक्षेत्रमा बनाइएका तीन गाउँभित्रै नयाँ घरहरू पनि थपिएका छन् । गत वर्षदेखि नै चीनले यो क्षेत्रमा बस्ती विस्तारलाई तीव्रता दिएको छ ।

सन् २०२३ को तुलनामा तमालुङको आकार दुई गुणा भएको छ । स्याटेलाइट तस्वीरअनुसार यहाँ १ सय ४७ वटा नयाँ घर बनाइएका छन् । यो गाउँको विस्तार गर्दै सन् २०२२ को अन्त्यमा ७० घरमा बस्ने २ सय जनासहित २३५ घरसम्म बढाउने गरी डिजाइन गरिएको थियो ।

चीन र भुटानबीच हालसम्म पनि कूटनीतिक सम्बन्ध कायम भएको छैन । तर, दुई देशबीच लामो समयदेखिको सीमा विवाद समाधानका लागि लगातार वार्ता भइरहेको छ । चीनले १२ वटा देशसँगको सीमा विवाद समाधान गरिसकेको छ ।

प्रकाशित मिति: मंगलबार, फागुन ८, २०८० १७:३४