फक्रँदै किम–पुटिन दोस्ती, पुटिनले किमलाई पठाए कार उपहार

A+ A A-

पाँच महिनाअगाडि मात्र उत्तर कोरियाली सर्वोच्च नेता किम जोङ उन हरियो रेल चढेर रुस पुगेका थिए । सेप्टेम्बरमा रुस पुग्दा उनको भेट रुसी राष्ट्रपति भ्लादिमिर पुटिनसँग भयो ।

त्यसबेला किम र पुटिनबीच विभिन्न क्षेत्रमा साझेदारी गर्ने सम्झौता भयो, जसमध्ये प्रमुख सम्झौतामा भूउपग्रह विकासमा उत्तर कोरियालाई रुसले सहयोग गर्ने उल्लेख थियो । अमेरिकाले तत्काल विरोध जनायो र भन्यो, ‘क्षेप्यास्त्र प्रणाली र भूउपग्रह प्रणालीका प्रविधि उस्तै हुन्छन्, अब रुस र उत्तर कोरियाले मिलेर शक्तिशाली हतियार बनाउनेछन्, जुन राष्ट्रसंघको नियमको उल्लंघन हुनेछ ।’

त्यसअघि नै अमेरिकाले उत्तर कोरियाले रुसलाई हतियार दिइरहेको आरोप लगाएको थियो । युक्रेनले पनि उत्तर कोरियाली हतियार युक्रेनी भूमिमा फेला परेको दाबी गरेको थियो । त्यस कारण सो भेटमा उत्तर कोरिया र रुसबीच हतियार सम्झौता भएको पनि अनुमान छ ।

पुटिन–किम भेटको पाँच महिनापछि फेरि यतिबेला किम र पुटिनको चर्चा सुरु भएको छ । उनीहरूबीचको मित्रता फक्रँदै गएको टिप्पणी हुन थालेको छ । पुटिनले किमलाई महँगो कार उपहारस्वरुप उत्तर कोरिया पठाएपछि उनीहरूको दोस्तीको चर्चा भएको हो ।

उत्तर कोरियाली समाचार संस्था केसीएनएले भनेको छ, ‘उत्तर कोरियाली नेता किम जोङ उनलाई रुसी राष्ट्रपति भ्लादिमिर पुटिनले विशेष व्यक्तिगत सम्बन्धको कदरस्वरूप कार उपहार दिनुभएको छ ।’

रुसमा निर्मित कारको ब्रान्ड र मोडल भने खुलाइएको छैन । किमको व्यक्तिगत प्रयोगका लागि फेब्रुअरी १८ मा उक्त कार प्योङयाङलाई हस्तान्तरण गरिएको थियो ।

पुटिनले कार उपहार पठाएसँगै यस कार्यले संयुक्त राष्ट्रसंघका प्रतिबन्धहरूको उल्लंघन भएको टिप्पणी सुरु भएको छ । किनभने लगातार क्षेप्यास्त्र र हतियार परीक्षणपछि उत्तर कोरियामाथि राष्ट्रसंघले विभिन्न प्रतिबन्धहरू लगाएको छ, जसले उत्तर कोरियामा सबै किसिमको सवारीसाधन निर्यात गर्न निषेध गर्छ ।

प्रकाशित मिति: मंगलबार, फागुन ८, २०८० १३:१०