असन्तुष्ट नेताहरूलाई देउवाले 'भयो छोड्' भनेपछि जुटेकाे थियाे गगनको प्रतिवेदनमा सहमति

असन्तुष्ट नेताहरूलाई देउवाले 'भयो छोड्' भनेपछि जुटेकाे थियाे गगनको प्रतिवेदनमा सहमति

A+ A A-

कांग्रेस महासमिति बैठकअन्तर्गत आजदेखि सुरु हुने बन्दसत्रमा महामन्त्री गगन थापाको प्रतिवेदन प्रस्तुत हुने भएको छ । सुरुमा कांग्रेस संस्थापन थापाको प्रस्तावमा सहमत थिएन । तर, पछि थापाको निर्वाचनअघि गठबन्धन नगर्ने प्रतिवेदन महासमितिमा प्रस्तुत हुने भएको हो ।

सुरुमा थापाको प्रस्तावमा पार्टी सभापति शेरबहादुर देउवाले आपत्ति जनाएका थिए । त्यसपछि देउवा र थापा दुवैले कुरा राख्ने प्रसंग उठेको थियो । तर, मुख्य धारणा के हुने भन्नेमा विवाद भयो । त्यसपछि पदाधिकारी बैठकमा आगामी चुनावमा कांग्रेस एक्लै लड्ने थापाको प्रतिवेदन महासमितिमा प्रस्तुत हुने सहमति भएको एक पदाधिकारीले शिलापत्रलाई जानकारी दिए ।

सुरुमा आज बिहान बस्ने केन्द्रीय समितिमा थापाको प्रस्तावमा भोटिङ गर्ने विषय पदाधिकारी बैठकमा उठेको ती पदाधिकारीको भनाइ छ । 'भोलि बिहान ८ बजे केन्द्रीय समिति बैठक बस्ने र त्यसमा भोटिङ गर्न महामन्त्री तयार हुनुभयो । त्यसरी तर्साउन खोज्दा महामन्त्रीज्यू टसमस नभएपछि उहाँहरू समस्यामा पर्नुभयो । त्यसमा साथीहरूले रोक्दै त्यस्तो गर्नुहुन्न भोटिङ गर्ने कुरा कल्पना गर्न सकिन्न भनेपछि संस्थापन हच्कियो,' ती पदाधिकारीले भने ।

देउवाले पदाधिकारी बैठकमा थापाको प्रतिवेदनमा रहेको रुखमा मात्र मत हाल्नेछौँ भन्ने लाइन हटाउन भने । तर, थापा त्यसका लागि पनि तयार भएनन् । 'कांग्रेसलाई रुखमा मात्र मत हाल भन्ने कुरा लेख्न हामी किन डराउने, यस्तो पनि हुन्छ ?' पदाधिकारी बैठकमा थापाले देउवालाई गरेको प्रश्न सुनाउँदै ती पदाधिकारीले भने ।

थापाको यस्तो प्रश्नपछि देउवाले 'हुन्छ' भनेका थिए । देउवाले हुन्छ भने पनि उपसभापति पूर्णबहादुर खड्का र प्रवक्ता प्रकाशशरण महतले असन्तुष्टि जनाएका ती पदाधिकारीको भनाइ छ । खड्का र महतले अहिल्यै त्यस्तो कुरा गरेर जाँदा गठबन्धनमा समस्या हुन सक्ने तर्फ सचेत गराउन खोजेका थिए । तर, देउवाले उनीहरूलाई 'भयो छोड' भनेपछि सहमति जुटेको हो ।

'सभापतिज्यूले हुन्छ भनेपछि उपसभापति खड्का, प्रवक्ता महतलगायत अवाक् हुनुभयो । बीचमा उहाँहरूले इन्टरफेयर गर्नखोज्नुभएको थियो । सभापतिज्यूले भयो छोड भनेपछि उहाँहरू पनि चुप बस्नुभयो । उहाँहरूको डर गठबन्धन भत्कन्छ बिग्रन्छ अहिलेदेखि एक्लै लड्ने कुरा किन गर्नुपर्‍यो भन्ने थियो । तर, सभापतिले बोलेपछि सबै चुप बस्नुभयो,' ती पदाधिकारीले भने ।

पदाधिकारी बैठकमा यस्तो सहमति भएपछि देउवा प्रधानमन्त्री पुष्पकमल दाहाल प्रचण्डसँग भेट गर्नका लागि बालुवाटार पुगेका थिए । उनले त्यहाँ गठबन्धन नटुट्ने विषयमा विश्वस्त रहन आग्रह गरेका थिए । देउवा प्रकाश ज्वालालाई मन्त्री पदबाट हटाउन नहुने पक्षमा रहेको र त्यसका लागि पनि एकीकृत समाजवादीका अध्यक्ष माधव नेपाललाई लिएर बैठक चल्दाचल्दै बालुवाटार पुगेको ती नेताले बताए ।

'प्रकाश ज्वाला जोगाउनुपर्छ भन्नेमा उपसभापति खड्का हुनुहुन्छ । माधव नेपालको पनि त्यही उद्देश्य हो । माधव नेपाललाई लुपमा राख्नुपर्छ भन्ने छ । त्यही भएर बैठक छाडेर गएका हुन्,' ती पदाधिकारीले भने ।

पदाधिकारी बैठकमा अहिलेको गठबन्धन नभत्काउने र अर्कोपटक कांग्रेस एक्लै चुनाव लड्ने गरी मध्यमार्गी बाटो खोजिएको बैठकमा सहभागी गोपालमान श्रेष्ठले जानकारी दिए । 'अहिलेको गठबन्धन नबिगार्ने र अर्कोपटक कांग्रेस एक्लै लड्ने गरी मध्यमार्गी बाटो खोजिएको हो । पार्टी बिगार्ने कुरा भए पो नमान्ने हुन्छ,' श्रेष्ठले भने ।

प्रकाशित मिति: मंगलबार, फागुन ८, २०८० ०९:२३