प्रहरी नै असुरक्षित : डीएसपी भन्छन्, ‘घरबेटीले पनि हेप्छन्’

A+ A A-

डडेल्धुराका अधिकांश प्रहरी चौकी भवनविहीन छन् । आफ्नै भवन नहुँदा नागरिककोे सुरक्षामा चौबीसै घण्टा तैनाथ रहने प्रहरीहरु भाडाको भवनमा बस्न बाध्य छन् । भाडाकै भवन पनि जीर्ण र जोखिमपूर्ण छन् ।

डडेल्धुराका विभिन्न स्थानीय तहमा रहेका ६ प्रहरी चौकी भाडाका जीर्ण भवनबाटै सुरक्षा प्रदान गरिरहेका छन् ।

जिल्लाको भित्री मधेसमा पर्ने भारतसँंगको सीमा प्रहरी चौकी तातापानी, स्याउले, गाङखेत, रुपाल, देवलदिव्यपुर, आलिताल प्रहरी चौकी भाडाका भवनमा छन् ।

तातापानी चौकीले मासिक रुपमा ३ हजार ९ सय ९३, स्याउले ६ हजार, गाङखेत ३ हजार ३ सय २८, रुपाल ३ हजार ७ सय २७, देवलदिव्यपुर ३ हजार ९ सय ९३ र आलिताल प्रहरी चौकीले ३ हजार ९ सय ९३ रुपैयाँ तिर्ने गरेको जिल्ला प्रहरी कार्यालय डडेल्धुराको लेखा शाखाले जनाएको छ ।

तीन वर्षमा चौकीहरुले भाडाबापत मात्रै ९ लाख १ हजार २ सय रुपैयाँ तिरेका छन् ।

जिल्लाका अधिंकाश चौकीहरुको अवस्था नाजुक छ । आलिताल गाउँपालिकामा रहेको शीर्ष प्रहरी चौकीको हालत त झनै खराब रहेको जिल्ला प्रहरी कार्यालय डडेल्धुराले जनाएको छ ।

जिल्ला प्रहरीको ब्यारेक ३ वर्षदेखि भाडाको घरमा

जिल्ला प्रहरी कार्यालय डडेल्धुराको ब्यारेक तीन वर्षदेखि भवनविहीन छ । आफ्नो भवन जीर्ण भएपछि ब्यारेकलाई भाडाका घरमा सारिएको थियो ।

भाडामा लिएको भवनको एउटा कोठामा ४ प्रहरी बस्ने गरेका जिल्ला प्रहरी कार्यालय डडेल्धुराका प्रहरी नायब उपरीक्षक दाधिराम न्यौपानेले बताए । ब्यारेकमा प्रहरी हवल्दार र जवान गरी ४४ जना छन् ।दधिराम न्यौपाने, प्रहरी नायब उपरीक्षक, जिल्ला प्रहरी कार्यालय डडेल्धुरा

जिल्ला प्रहरी कार्यालयबाट झण्डै ३ सय मिटर दुरीमा रहेको घरमा बस्ने प्रहरीलाई आकस्मिक कामका लागि बोलाउन समस्या पर्ने गरेको डीएसपी न्यौपानेको भनाइ छ ।

दिनरात विभिन्न भीड नियन्त्रण तथा सुरक्षामा खटिने प्रहरीले व्यवस्थित बसोबासको अभावले आफैं असुरक्षित महशुस गरिरहेको उनले बताए । ‘एक त आफ्नो भवन नहुँदा महँगो रकम तिरेर भाडाको घरमा बसेका छौं, घर मालिकको तनाव छँदैछ,’ डीएसपी न्यौपानेले भने, ‘त्यसपछि ४४ प्रहरी उतै बस्छन्, अपरझट केही पर्यो भने बोलाउन समस्या छ । गाउँजस्तै स्थानमा भाडाको घरमा बसेका छन्, घरमा घेरबार केही छैन् । भीड नियन्त्रणमा वा अन्य ठाउँमा कोसँग कस्तो रिस हुन्छ, त्यसैले प्रहरी नै असुरक्षित छन् ।’

हल्वदारभन्दा माथिल्लो ओहदाका प्रहरी अधिकारीका लागि भने जिल्ला प्रहरी कार्यालयमा बस्ने व्यवस्था छ । भाडाको घरमा बस्ने प्रहरी खानादेखि शौचालयका लागि पानी लिन पनि जिल्ला प्रहरी कार्यालय परिसरमा आउनुपर्ने बाध्यता रहेको प्रहरी जवान नवीन पन्तले बताए । ‘४४ जना छौं । पानी १५ मिनेट आउँछ, शौचालय जान पनि पुग्दैन्,’ पन्तले भने, ‘सुत्न पनि एउटै रुममा ४ जना, दंगा आएको बेला ५ जनासम्म सुत्नुपर्छ । ड्युटी आउन जान पनि समस्या नै छ ।’

३ वर्षमा १५ लाख ८४ हजार भाडामा खर्च

ब्यारेक भवन आफ्नो नहुँदा डडेल्धुरा प्रहरीले अहिले मासिक ४४ हजार र वर्षमा ५ लाख २८ हजार भाडाबापत तिर्ने गरेको छ । पछिल्लो ३ वर्षमा घरभाडामा मात्रै १५ लाख ८४ हजार खर्च भएको प्रहरी नायव उपरीक्षक न्यौपानेले बताए ।

जनताको सुरक्षाका लागि खटिने सुरक्षाकर्मी नै भवन अभावमा बस्नुपर्दा कार्यसम्पादनमा असर परिरहेको उनले बताए । ‘सामान्यतया खाने, बस्ने, शौचालयलगायतका आधारभूत कुरा परिपूर्ति नहुँदा प्रहरीको दैनिक कार्यसम्पादनमा असर परिरहेको छ,’ उनले भने, ‘यो आर्थिक वर्षको मंसिर महिनामा नयाँ भवन तयार गर्ने क्रममा छौं ।’मुद्दाको अधिकार जिप्रकालाई मात्रै हुँदा समस्या

मुद्दा चलाउने अधिकार जिप्रकालाई मात्रै हुँदा पनि समस्या भइरहेको उनले बताए । ‘जिल्लाको आधा जति जनसंख्या रहेको भित्री मधेस क्षेत्रमा कसैले घटना घटाएपछि त्यो व्यक्तिमाथि अनुसन्धान गर्न र मुद्दा चलाउन जिल्ला सदरमुकाम ल्याउनुपर्छ,’ उनले भने, ‘यहाँ जिप्रका ल्याउनैपर्ने अर्को कुरा के हो भने हामीले मुद्दा दर्ता गर्ने भनेको अदातलमा हो, अदातलमा त्यो मान्छेलाई पेस नै गर्नुपर्छ । त्यसैले पनि समस्या हुन्छ ।’

सवारी साधन अभाव

पर्याप्त सवारी साधन नहुँदा आपतकालीन सेवा दिनसक्ने अवस्था नरहेको उनले सुनाए । ‘कसैले राति कहीँ घटना घटेपछि तत्काल प्रहरी पुग्नै सक्दैन । मोटारसाइकल छ । मोटरसाइकलमा दुई जना जान सक्ला तर ठूलो घटना घटाएको खण्डमा दुई जनाले नियन्त्रण गर्नसक्ने अवस्था रहँदैन,’ उनले भने, ‘मेलाहरुमा कहिलेकाहीँ यस्तै घटना हुन्छन् । मोटरसाइकल त जाला तर, गाडी पठाउन सकिँदैन । ठूलो जनशक्ति पठाउन सकिँदैन ।’

दरबन्दी अनुसारका प्रहरी छैनन्

जिल्ला प्रहरी कार्यालय डडेल्धुरा ३ सय ५० जना प्रहरीको दरबन्दी छ । तर, अहिले २ सय ५० को हराहारीमा मात्रै प्रहरी छन् । विभिन्न स्थानमा आवश्यकताअनुसार अस्थायी प्रहरी पोष्ट भएकाले पनि जनशक्ति अभाव रहेको डीएसपी न्यौपानेले बताए । डडेल्धुरामा एक जवानले कम्तीमा ४ सय नागरिकलाई सुरक्षा दिनु पर्ने अवस्था छ ।

प्रकाशित मिति: बुधबार, असोज २९, २०७६ ०८:२०